वीरगंज । पर्सा क्षेत्र नं. १ का प्रतिनिधिसभा सदस्य हरि पन्तले पथलैया–वीरगञ्ज औद्योगिक करिडोरका उद्योगहरूबाट निस्कने रासायनिकयुक्त फोहोर पानीका कारण सिर्सिया नदी दुर्गन्धित नालामा परिणत भएको भन्दै तत्काल नदी संरक्षणका लागि ठोस कदम चाल्न सरकारको ध्यानाकर्षण गराएका छन् ।
मंगलबार प्रतिनिधिसभाको बैठकमा बोल्दै सांसद पन्तले उद्योगहरूले प्रशोधन नगरी सिधै सिर्सिया नदीमा रासायनिकयुक्त फोहोर पानी मिसाउँदै आएको आरोप लगाए। यसले सदियौँदेखि बग्दै आएको ऐतिहासिक सिर्सिया नदीको अस्तित्व नै संकटमा परेको उनको भनाइ थियो।
उनले एक समय लोकआस्थाको महान् पर्व छठमा सिर्सिया नदीमै उभिएर अर्घ्य दिने परम्परा रहेको स्मरण गराउँदै अहिले नदीको अवस्था यति दयनीय बनेको बताए कि दुर्गन्धका कारण छठ पर्वका बेला समेत नदीमा खुट्टा टेक्न नसकिने अवस्था सिर्जना भएको छ।
सांसद पन्तले सिर्सिया नदी अहिले लामखुट्टेको प्रमुख प्रजननस्थल बनेको उल्लेख गर्दै नदी आसपासका बासिन्दा दुर्गन्ध र लामखुट्टेको समस्याले राति चैनसँग सुत्नसमेत नसक्ने अवस्था रहेको बताए।
उनले पछिल्ला केही वर्षदेखि सिर्सिया नदीको प्रदूषण गम्भीर समस्या बन्दै आए पनि संघीय, प्रदेश र स्थानीय सरकारले चुनावी घोषणापत्रमा मात्रै विषय समेट्ने बाहेक समस्या समाधानका लागि प्रभावकारी काम नगरेको आरोप लगाए।
सांसद पन्तले यसपटक राष्ट्रिय स्वतन्त्र पार्टीप्रति विश्वास व्यक्त गरेका वीरगञ्जवासीले सिर्सिया नदीको सफाइ र पुनर्जीवनको ठूलो अपेक्षा राखेको उल्लेख गर्दै सम्माननीय सभामुखमार्फत सरकारसँग यथाशीघ्र ठोस योजना ल्याई सिर्सिया नदीलाई पुनर्जीवन दिन आग्रह गरे।
उनले सिर्सिया नदीको संरक्षण केवल वातावरणीय मुद्दा नभई जनस्वास्थ्य, धार्मिक आस्था र वीरगञ्जको समग्र जीवनसँग जोडिएको विषय भएकाले सरकारले उच्च प्राथमिकताका साथ काम गर्नुपर्नेमा जोड दिए।
