काठमाडौं । प्रभु साह नेतृत्वको आम जनता पार्टी (आजपा) ले राज्यको तल्लो तहमा कार्यरत श्रेणीविहीन कर्मचारीहरूलाई हटाउने सरकारको निर्णयको कडा विरोध गर्दै उक्त निर्णय तत्काल फिर्ता लिन माग गरेको छ ।
बुधबार पार्टीका प्रवक्ता तिलक थापा मगरद्वारा जारी प्रेस वक्तव्यमा चौकीदार, ड्राइभर, भान्से, कार्यालय सहयोगी, स्वीपर लगायतका श्रेणीविहीन कर्मचारीहरूलाई हटाउने निर्णय अन्यायपूर्ण, अमानवीय र श्रमको अवमूल्यन गर्ने कदम भएको उल्लेख गरिएको छ ।
वक्तव्यमा दशकौँदेखि इमान्दारीपूर्वक राज्यको सेवा गर्दै आएका राष्ट्रसेवक कर्मचारीहरूलाई कुनै ठोस आधारबिना सेवाबाट हटाउने कार्य कानूनी शासनको उपहास भएको जनाइएको छ । गरिब तथा श्रमिक वर्गका नागरिकले काम गर्ने यस्ता पदबाट राज्यले सेवा त लिने तर अधिकार र सुरक्षा नदिने प्रवृत्ति विभेदपूर्ण रहेको आजपाको आरोप छ ।
आजपाले गणतन्त्र स्थापनापछि राजनीतिक नेतृत्वले स्थायी दरबन्दीलाई करारमा रूपान्तरण गरेर कर्मचारीमाथि अन्यायको सुरुवात गरेको दाबी गर्दै अहिले ती कर्मचारीलाई हटाएर निजी कम्पनीमार्फत ‘आउटसोर्सिङ’ प्रणालीबाट सेवा सञ्चालन गर्ने तयारी गोपनीयता, सुरक्षा र सुशासनका दृष्टिले समेत जोखिमपूर्ण रहेको जनाएको छ ।
वक्तव्यमा लामो समयदेखि कुशलतापूर्वक सेवा दिँदै आएका श्रेणीविहीन तथा तल्लो तहका कर्मचारीहरूलाई हटाउने प्रक्रिया तत्काल रोक्न र उनीहरूलाई स्थायी दरबन्दीमा समायोजन गरी अन्य राष्ट्रसेवक कर्मचारीसरह सेवा–सुविधा उपलब्ध गराउन सरकारसँग माग गरिएको छ ।
साथै, आजपाले राज्यको तल्लो तहमा रहेर सेवा गर्ने कर्मचारीहरूको रोजीरोटी र मानवीय संवेदनामाथि प्रहार नगर्न सरकारलाई आग्रह गर्दै उनीहरूको भविष्य सुरक्षित गर्न आवश्यक कदम चाल्न चेतावनी दिएको छ ।
