[real3dflipbook id=”382″]
जगरनाथपुर १ मा माओवादीकाे पार्टी प्रबेश तथा कमिटी गठन
वीरगंज । पर्साको निर्वाचन क्षेत्र नम्बर ४ मा नेकपा (माओवादी केन्द्र) ले पार्टी प्रवेश र कमिटि गठनलाई निरन्तरता दिएको छ । सोमबार पनि जगरनाथपुर गाउँपालिकाकाे वडा नं. १, पान्डेपुर, पिडारीमा पार्टी प्रवेश तथा वडा कमिटी गठन कार्यक्रम गरेकाे छ ।
कार्यक्रममा जसपा परित्याग गरी वडा समितिका ५० जना नेता कार्यकर्ताहरु नेकपा माओवादी केन्द्रमा प्रवेश गरेकाे वताइएकाे छ । नवप्रवेशीहरुलाई कार्यक्रमका प्रमुख अतिथि नेकपा माओवादी केन्द्रका केन्द्रीय सदस्य टेक बहादुर शाक्य, विशिष्ट अतिथि केन्द्रीय सदस्य बिरेन्द्र प्रसाद यादव, प्रदेश सदस्य सलाउद्दीन अहमद लगायतले स्वागत गरेका थिए ।
कार्यक्रममा केन्द्रिय सदस्यद्वय शाक्य र यादव, प्रदेश सदस्य अहमद, कृष्णमोहन प्रसाद यादव, नेता सरिफ गद्दी, सहरुम गद्दी, गोरा थारु, शिव प्रसाद लगायतले मन्तव्य राखेका थिए ।
यसैबीच सोमबार नै शिव प्रसाद महतोको अध्यक्षता ३१ सदस्यीय वडा कमिटी गठन गरिएको नेकपा माओवादी केन्द्र मधेस प्रदेश समितिका सदस्य सलाउद्दीन अहमदले जानकारी दिए ।
वीरगंजमा पुन: एक सहकारीले बचतकर्ताको करोडौं रकम लिएर फरार
वीरगंज । वीरगंज महानगरपालिका वडा नम्बर १ छपकैया बहि पुलस्थित रहेको मानव समाज बचत तथा ऋण सहकारी संस्थाले बचतकर्ताको करोडौं रुपैया लिएर फरार भएका छन् । संस्थाका अध्यक्ष वीरगंज महानगरपालिका वडा नम्बर १ सिसोबारी छपकैया निवासी मुन्ना पटेल लगायत संस्थाका पदाधिकारीहरुले आफुहरुले जम्मा गरेकाे करिब १ करोड रुपैया भन्दा बढी रकम लिएर फरार भएकाे बचतकर्ताले वताएका छन् ।
संस्थाका संचालक समितिका सम्पूर्ण पदाधिकारीहरु पनि सम्पर्कमा छैनन्, स्थानिय बचतकर्ता अलि हुसैनले भने, ‘”संस्थाका अध्यक्ष पटेल लगायत अन्य पदाधिकारीहरु विगत ६ दिनदेखि सम्पर्क विहिन रहेका छन् । नत उनीहरुको फोन नै लागेको छ, सोसल मिडियामा अनलाईन रहेपनि सम्पर्क हुन सकेको छैन ।”
आफू संस्थामा जम्मा गरेको २ लाख २५ हजार रुपैया झिक्न जाँदा विगत ६ दिन सहकारी संस्थाको कार्यालयमा ताल्चा लगाईएको पाएपछि सहकारी भागेको शंका लागेको थियो । पटेलको मोबाईल नम्बर ९८०७१४५८७९ मा सम्पर्क गर्दा अहिले पनि स्वीच अफ छ । संस्थाका सयौं सदस्यहरुले गरेको नियमित बचत र फिक्स डिपोजिटको करिब १ करोड भन्दा बढी जम्मा भएको रकम लिएर सम्पर्क विहिन भएको उनले बताए ।
साेमबार बिहान अध्यक्ष पटेलको घर घेराउ गर्न जाँदा उनका पिता रघुनाथ राउत कुर्मीले आफूसंग मुन्ना सम्पर्कमा नरहेको जनाएका छन । उल्टै आक्राशित हुदै मुन्नाका पिता कुर्मीले आफूलाई सोधेर रकम जम्मा गरेको हो ? भन्ने बचतकर्ता संग प्रश्न गर्दै मेरो सम्पर्कमा मुन्ना नरहेको बताएका थिए ।
पिडित बचतकर्ताहरुले सहकारी संस्था विरुद्ध जिल्ला प्रहरी कार्यालयमा उजुरी दिने तयारी गरेका छन । बचतकर्ता हुसैनले भने, ‘परिवारले समेत मुन्ना बारे जानकारी नगराएपनि आफूहरु उनी सहित संस्थाका पदाधिकारी विरुद्ध उजुरी दिने तयारी गरेका छौ ।’
बचतकर्ता रकम झिक्न जाँदा निरन्तर ४/५ दिन सम्म सहकारी संस्था बन्द रहेको देखेपछि सहकारी संस्था फरार भएको शंका गरिएका थिए । खोजिनिती गर्दै जाँदा सहकारी संस्थाका अध्यक्ष पटेलसहित संस्थाका अन्य पदाधिकारी समेत सम्पर्क विहिन भएपछि सहकारी संस्थाले करोडौ लिएर फरार भएको स्थानियलाई शंका लागेको छ ।
सहकारी संस्थामा दैनिक ज्यालादारी गर्ने, ठेला रिक्सा चलाउने देखि लिएर तरकारी बेच्ने लगातयका करिब जनताले दैनिक एक सय रुपैया भन्दा बढी जम्मा गर्ने गरेका छन । तर सहकारी संस्था फरार भएपछि उनीहरु विचल्लीमा परेका छन । कसैले आफनो छोरीको विवाह गर्नलाई समेत दैनिक ज्यालादारी गरेर बचत गर्ने गरेका थिए ।
वीरगंजमा हाल आधादर्जन भन्दा बढी सहकारी संस्थाहरुले पर्सेली जनताको करोडौ रुपैया लिएर फरार भएपनि एक दुई जना बाहेकलाई प्रहरीले अहिले सम्म पक्राउ गर्न सकेको छैन । अव्यवस्थित र अनियन्त्रित सहकारी संस्थालाई नियन्त्रण गर्न गठित सहकारी संस्थाका छाता संगठनले पनि यसलाई नियन्त्रण गर्ने काम गरेको छैन ।
बधुवा मजदूर मुक्त नेपाल एक ऐतिहासिक उपलब्धी : अध्यक्ष बिक
वीरगंज । रास्ट्रिय दलित नेटवोर्क (आरडिएन) नेपालका अध्यक्ष गणेश बिकले बधुवा मजदुर मुक्त नेपाल निर्माण एक एतिहासिक उपलब्धि भएको बताएका छन् ।
आरडिएनको २२ औ स्थापना दिवसकाे अवसरमा आयाेजित सप्ताह ब्यापी कार्यक्रम अन्तर्गत साेमबार अध्यक्ष बिकले एक प्रेस बिज्ञपति जारी गर्दै सामन्ती अवशेसको रुपमा रहेको बधुवा मजदुरको प्रथाको मुक्ती एतिहासिक उपलब्धि भएको बताएका छन् ।
जारी प्रेस बिज्ञप्तिमा राष्ट्रिय दलित नेटवर्क आरडिएन नेपाल वि.संं. २०५७ भाद्र ६ गतेका दिन दलित समुदायका बहुआयामिक समस्याहरुको दीर्घकालिन समाधानका लागि जातीय छुवाछूत र भेदभाव विनाको अर्को नेपाल संभव छ, आउनुहोस निर्माण गरौं भन्ने मूल नाराकासाथ स्थापना गरिएको थियाे ।
आरडिएन नेपालको स्थापनमा उठाएका कतिपय मुद्दाहरु स्थानीय हुँदै राष्ट्रिय अनि अन्तराष्ट्रियकरण भई सही ढंगले संबोधन भएका छन् । हलिया मुक्ति तथा पुनःस्थापना पश्चात उस्तै समस्याका रुपमा रहेको पूर्वी नेपालको हरवाचरवाको मुक्तिको आन्दोलनमा आरडिएन नेपालको नेतृत्वदायी भूमिकाका कारण यही २०७९ श्रावण २ गते प्रधानमन्त्रीले नेपाल सरकारका मन्त्रीहरू, साँसदहरु, संवैधानिक आयोगका प्रमुख तथा प्रतिनीधिहरु, उच्च पदस्थ कर्मचारीहरुसहित हलिया, कमैया तथा हरवाचरवा आन्दोलनका अगुवाहरुको उपस्थिति रहेको एक भव्य समारोहका बीच अनुचित ऋणको खारेजीसहित हरवाचरवा मुक्तिको घोषणा गरेका थिए ।
हरवाचरवाको मुक्तिको घोषणासँगै अब नेपालमा सामन्तवादका अवशेषहरुका रुपमा रहेको प्रथाहरु औपचारिकरुपमा अन्त्य भएका छन र नेपाल बधुँवाप्रथा मुक्त राष्ट्र भएको जारी विज्ञप्तीमा उल्लेख गरिएकाे छ ।
आरडिएनले विज्ञप्ती मार्फत नै स्थापनाकालदेखि नै कमैया, हलिया तथा हरवाचरवा प्रथाको अन्त्य गर्ने लक्ष्यका साथ आन्दोलनको निर्माण गरेको हुनाले यो वर्षको स्थापना दिवसका सन्दर्भमा गौरव अनुभूति गर्दै देशैभरिका मुक्त कमैया, कम्लरी तथा हलिया विशेषगरी हरवाचरवा प्रथाको जीवन व्यथित गरेका दाजुभाइ तथा दिदिबहिनीहरुप्रति बधाई तथा शुभकामना व्यक्त गरेकाे छ ।
विज्ञप्तीमा यस ऐतिहासिक दिवसका सन्दर्भमा सर्वप्रथम नेपाल सरकारलाई हरवाचरवा पुनःस्थापना तथा कमैया कमलरी तथा हरलियाहरु जो अझै पुनःस्थापना हुन बाँकी छन । उनीहरुको पुनःस्थापनाका लागि संविधानसभा सदस्य श्याम श्रेष्ठको संयोजकत्वमा गठित मुक्त कमैया, कम्लहरी, हलिया र हरवाचरवा सम्वन्धी वस्तुस्थितिको अध्ययन प्रतिवेदन २०७९ को अक्षरसः कार्यान्वन गर्न जोडदार माग गरिएको छ ।
साथै एक कार्यान्वयन संरचनाको गठन गरी आगामी निर्वाचन पूर्व मुक्त हरवाचरवाको तथ्याँक संकलन गर्ने काम सम्पन्न गर्न समेत आरडिएनले माग गरेकाे छ ।
आफ्नो हकहितका लागि जसरी मुक्तिको आन्दोलनमा बन्धनको प्रवाह नगरी सक्रीयतापूर्वक त्याग गर्नु भयो त्यसैगरी पुनःस्थापनाको आन्दोलनमा अझ सशक्त रुपमा एक भएर लाग्न मुक्त हरवाचरवा, हलिया तथा कमैया र कम्लरी आन्दोनका अगुवाहरुलाई आव्हान पनि बिज्ञपति मार्फत गरिएको छ ।
कलैयास्थित एक अडिट फर्ममा छापा, कागजात र कम्प्युटर नियन्त्रणमा
वीरगंज । राजस्व अनुसन्धान विभाग काठमाडौँबाट खटिएको टोलीले बाराको कलैयास्थित प्रभु साह कानुले सञ्चालन गरेको अडिट फर्ममा छापा मारी कागजात र कम्प्युटर नियन्त्रणमा लिएको छ ।
फर्मद्वारा नक्कली भ्याट बिल जारी गरी करोडौँको राजस्व छली गरेको तथा नक्कली अडिटको सही, छाप र हस्ताक्षर गरी बारा, पर्साका दर्जनौँ औद्योगिक तथा व्यापारिक फर्मको अडिट गर्दै आएका सूचनाको आधारमा राजस्व अनुसन्धान विभागबाट खटिएको टोलीले आवश्यक कागजात र कम्प्युटर नियन्त्रणमा लिएको राजस्व अनुसन्धान विभागका उप महानिर्देशक एवं प्रवक्ता प्रद्युमन प्रसाद उपाध्यायले जानकारी दिए ।
बाराको प्रसौनी गाउँपालिका ६ निवासी कानुले लामो समयदेखि प्रशिक्षार्थी अडिटरको प्रयोग गरी बारा, पर्साका औद्योगिक कलकारखाना, व्यापारिक फर्महरूको अडिट गर्दै आएको र नक्कली भ्याट बिल, अडिटको सही छापा र हस्ताक्षर समेत गरी राजस्व छल्दै आएको भेटिएपछि विभागबाट खटिएको टोलीले कागजात नियन्त्रणमा लिएको तर कानु भने फरार रहेको प्रवक्ता उपाध्यायले वताए ।
कानु जस्तै बारा, पर्सामा नक्कली अडिट फर्म खोलेर राजस्व छल्ने ठूलो गिरोह रहेको र यो घटनापछि नक्कली अडिट गर्ने फर्म खोलेका व्यक्तिहरूबिच खैलाबैला मच्चिएको छ ।
नेसुपा पर्साका अध्यक्ष चाैरसिया जसपा प्रबेश
वीरगंज । नेपाल सुशासन पार्टी पर्साका अध्यक्ष मधुसुदन चौरसिया जनता समाजवादी पार्टी (जसपा) प्रबेश गरेका छन् ।
काठमाण्डौस्थित जसपाको केन्द्रीय कार्यालयमा आयोजित एक कार्यक्रमका बिच पार्टी अध्यक्ष उपेन्द्र यादव, वन तथा वातावरण मन्त्री प्रदीप यादव, मधेश प्रदेशका मुख्यमन्त्री लालबाबु राउत, वीरगञ्ज महानगरपालिकाका प्रमुख राजेशमान सिंह लगायतले चौरसियालाई गम्छा लगाएर पार्टीमा स्वागत गरेका हुन् ।
स्थानिय तह निर्वाचन अघि नेपाल सुशासन पार्टी प्रबेश गरेका चाैरसिया साेही पार्टीबाट बिन्दवासिनी गाउँपालिका अध्यक्षमा चुनाव समेत लडेका थिए । त्यस अघि तत्कालिन राष्ट्रिय जनता पार्टी (राजपा) निकट विद्यार्थी संगठन पर्साका उनी अध्यक्षसमेत थिए ।
सुशासन पार्टीबाटै मूलधारको राजनीति शुरु गरेका चौरसियाले समयको मागअनुसार विकास, समृद्धि र सुशासनको गन्तव्यसम्म पुग्नका लागि बाटो परिवर्तन गरेको वताएका छन् ।
विस्थापितहरुको समस्या समाधानका लागि पहल गर्छु : मन्त्री यादव
वीरगंज । वन तथा वातावरणमन्त्री प्रदीप यादवले कोशी टप्पु वन्यजन्तु आरक्ष विस्थापितहरुको समस्या समाधानका लागि पहल गर्ने बताएका छन् ।
कोशी टप्पु वन्यजन्तु आरक्ष विस्थापितहरुको समस्या समाधान गर्ने आयोगले साेमबार बुझाएको प्रारम्भिक प्रतिवेदन बुझ्दै मन्त्री यादवले विस्थापितहरुको समस्याका विषयमा सरकारले गहन रुपमा अध्यनगरी समस्या समाधनका लागि पहल गर्ने बताए । उनले भने, “मुअव्जा नपाउँदा विस्थापितहरु लामो समयदेखि पीडित बनेका छन्, पीडतहरुका समस्या समाधानका लागि पहल गर्ने छु ।”
यसैगरी मन्त्री यादवले कोशी टप्पु वन्यजन्तु आरक्ष विस्थापितहरुको हकमा आवश्यक जानकारी बुझन मन्त्रालय मातहतका निकायलाई निर्देशन समेत दिए ।
कोशी टप्पु वन्यजन्तु आरक्ष विस्थापितहरुको समस्या समाधान गर्ने आयोगका अध्यक्ष राजकुमार राईले आयोग गठन भएपछि हालसम्म आयोगले गरेका काम कारवाहीका विषयमा एक प्रारम्भिक प्रतिवेदन तयार गरी मन्त्री यादवलाई बुझाए ।
आयोगका अध्यक्ष राईले बुझाएकाे उक्त प्रारम्भिक प्रतिवेदनमा टिओआरमा उल्लेख भए अनुरुपका र जग्गा मुअव्जा नपाएका कोशी टप्पु वन्यजन्तु आरक्ष विस्थापितहरुको हकमा घरवासको निमित्त जग्गा व्यवस्थापन हुनु पर्ने, अन्यको हकमा सम्पूर्ण अध्ययन अनुसन्धान गरी उचित व्यवस्थापन हुनु पर्ने उल्लेख गरिएको छ ।
विक्रम सम्वत् २०३३ सालमा कोशी टप्पु वन्यजन्तु आरक्षको विस्तार गर्ने क्रममा सरकारले सुन्सरी र सप्तरीमा करिब चार हजार भन्दा बढी बिगाह जग्गा अधिग्रहण गरेको थियो । जग्गा अधिग्रहणका बखत जग्गाको सट्टामा जग्गा दिने सहमती गरिएको भएपनि त्यहाँका विस्थापितहरुले अहिलेसम्म पनि जग्गा नपाएको गुनासो रहेको छ ।
कतिपयलाई सरकारले जग्ग धनी प्रमार्ण पुर्जा दिई मालपोतको तीरो तिर्दै आएपनि उक्त जग्गा पीडितहरुले भोगचलन गर्न नपाएको र गैर विस्थापितहरुले कब्जा गरेको कोशी टप्पु वन्यजन्तु आरक्ष विस्थापितहरुको समस्या समाधान गर्ने आयोगका बिज्ञ सल्लाहकार श्याम लम्सालले जानकारी दिए । उनका अनुसार आरक्ष पीडतका समस्या समाधानका लागि हाल सम्म २१ वटा आयोग गठन भएपनि समस्या समाधान हुन नसकेको पीडितहरुको गुनासो रहेको छ ।
फिराेजकाे मृत्यु, उपचारमा लापरवाही गर्नेमाथी कारवाहीकाे माग गर्दै प्रदर्शन
वीरगंज । वीरगंज हेल्थ केयर अस्पतालले उपचारमा लापरवाही गरेको भन्दै बिरामीका आफन्तहरुले विरोध प्रदर्शन गरेका छन् । पर्साको छिपहरमाई गाउँपालिका–२ चेर्गाहा निवासी ३२ वर्षीय फिरोज मियाँ अन्सारीकाे उपचारमा लापरवाही गर्ने वीरगंज हेल्थ केयर अस्पताल एवं चिकित्सकलाई कारवाहीको माग गर्दै विरोध प्रदर्शन गर्नुका साथै जिल्ला प्रशासन कार्यालय र जिल्ला प्रहरी कार्यालय पर्सा घेराउ गरेका छन् ।
‘डा.आशिफ अन्सारीलाई पक्राउ गर, झोलाछाप डाक्टरलाई कारवाही गर’, ‘वीरगंज हेल्थकेयरका सञ्चालक डा. अबुलहैसलाई कारवाही गर, वीरगंज हेल्थकेयर हस्पिटल मुर्दावाद’, ‘डाकटर होइन हत्यारा हो, डा. आशिफलाई जेल गर’ लगायतका नारायुक्त प्लेकार्ड बोकी आफन्तले वीरगंज घण्टाघरस्थित विरोध प्रदर्शन गरेका हुन् । विरोध प्रदर्शन पश्चात् उनीहरुले जिल्ला प्रशासन कार्यालय र जिल्ला प्रहरी कार्यालय पर्साकाे मुल गेटमा २ घण्टा धर्ना समेत दिएका थिए ।
पत्थरीबाट पीडित भई वीरगंज हेल्थकेयर अस्पतालमा भर्ना भएका छिपहरमाई निवासी ३२ वर्षीय फिरोज मियाँको गत साउन २७ गते डा. आशिफ अन्सारीले शल्यक्रिया गरेका थिए । डा. मियाँले गरेको पहिलो शल्यक्रिया असफल भएपछि दोस्रो शल्यक्रियाका क्रममा भित्रि नसा काटिएर अनियन्त्रित रक्तश्राव हुँदा विरामीको अवस्था चिन्ताजनक भएको स्थानीय नविन सिंहले जानकारी दिए ।
साधारण पत्थरीको शल्यक्रियाका लागि अस्पताल भर्ना भएका फिरोजलाई डा. आशिफ अन्सारीको चरम लापरवाहीले उनकाे स्वास्थ्य अवस्था झन बिग्रिएपछि थप उपचारकाे लागि काठमाडाैं लगिएकाे थियाे । काठमाडाैंस्थित मेडिसिटी हस्पिटलकाे आइसियु कक्षमा राखेकाे उनकाे उपचार गर्ने क्रममा आइतबार राति मृत्यु भएकाे उनले वताए ।
पत्थरीको शल्यक्रियामा खासै समस्या हुने नगरेको अवस्थामा डा. आशिफले दुई–दुई पटक शल्यक्रिया गरेको र शल्यक्रियाको क्रममा नशा नै काटिदिएकोले रक्तश्राव अनियन्त्रित भएर विरामीको अवस्था चिन्ताजनक भएपछि हेलिकप्टरबाट काठमाडाैं पठाएकाे थियाे ।
यसबारे जिल्ला प्रहरी कार्यालयमा जाहेरी दिएको ४ दिन वितिक्यो तर, प्रहरीद्वारा कुनै किसिमको कारवाही प्रक्रिया अगाडि नबढाइएकाे पिडित पक्षकाे गुनासाे छ । अस्पताल सञ्चालक र चिकित्सकलाई कारवाही प्रक्रिया अगाडि नबढाएसम्म आन्दोलन जारी नै राख्ने नेपाली कांग्रेस पर्साका सह सचिव समेत रहेका सिंहले वताए ।
यसै बिच नेपाल चिकित्सक संघ नारायणी वीरगंजले अंसारीकाे शल्यक्रिया गर्ने क्रममा आवश्यक पर्ने सबै सावधानी अपनाइएकाे जनाएकाे छ ।
चिकित्सक संघका सचिव डा. नाैषाद हकले एक प्रेस विज्ञप्ती जारी गर्दै वीरगंज हेल्थ केयर अस्पतालमा कार्यरत डा. आसिफ अंसारी तथा विभिन्न चिकित्सक तथा प्राविधिक स्वास्थ्यकर्मीहरुकाे टिमलले मिति २०७९ साउन २७ गते आफ्नाे पेशागt दायित्व अन्तर्गत अन्सारीकाे शल्यक्रिया गर्ने क्रममा आवश्यक पर्ने सबै सावधानीहरु अपनाउदा अपनाउदै पिन निजकाे स्वास्थ्य अवस्था बिग्रदै गएकाे र अस्पतालकाे स्राेत साधनले नभ्याएपछि निजलाई थप उपाचारकाे लागि मेडिसिटी अस्पतालमा रेफर गरिएकाे जनाएका छन् ।
भारतीय आरकेष्ट्राका ९ नर्तकीसहित १२ जना पक्राउ
वर्दिवास । कृष्ण अष्टमीका बेला उत्तेजक नृत्य प्रस्तुत गरी सांस्कृतिक प्रदुषण फैलाएको आरोपमा प्रहरीले भारतीय आरकेष्ट्रा समुहलाई नियंत्रणमा लिएको छ । इलाका प्रहरी कार्यालय गाैशालाले ९ नर्तकीसहित १२ जनालाई पक्राउ गरेको हो ।
महाेतरीकाे गौशाला नगरपालिका वडा नं. २ निगौलबाट ४ नर्तकी तथा वडा नं. ११ लक्ष्मीनियाबाट ५ नर्तकी र उक्त समूहका ३ पुरुषलाई नियंत्रणमा लिएको गौशाला प्रहरीले जनाएको छ । उनीहरु महोत्तरी प्रशासनको आदेश विपरित नेपाल भित्रिएको प्रहरीको आरोप छ ।
पक्राउ परेका दुवै आरकेष्ट्रा समुह भारत विहार सीतामढी जिल्लाका भएको प्रारंभिक छानवीनमा खुलेको प्रहरीले जनाएको छ । उनीहरुले कृष्ण अष्टमीको अवसरमा नाचगानका लागि भाडामा आएको प्रहरी सोधपुछका क्रममा बताएका छन् ।
आरकेष्ट्रा नियन्त्रण गर्न घटनास्थल पुगेको प्रहरी टोलीमाथि ढुङ्गामुढा र अवरोध गर्ने २ जना स्थानीयलाई पनि प्रहरीले पक्राउ गरेको छ । अश्लील र उत्तेजक रुपमा प्रस्तुत हुने भारतीय नर्तकीकै कारण विगतका वर्षमा विभिन्न आपराधिक घटना घटनुकासाथै स्थिति नियन्त्रणमा लिन प्रहरीले गोलिसमेत चलाउनु परेको हुँदा प्रशासन कार्यालयले भदौ २ गते सार्वजनिक सूचना जारी गरी आर्केष्ट्रा निषेध गरेको थियो ।
प्रशासनको आदेश अटेर गर्दै भाडामा ल्याइएका आरकेष्ट्रा समुहले सांस्कृतिक प्रदुषण फैलाएको भनि स्थानीयले समेत विरोध गरेका थिए । नियन्त्रणका लागि ईलाका प्रहरी कार्यालय गौशालाका प्रहरी निरीक्षक रन्जन मिश्रको कमाण्डमा शनिवार मध्यराति घटनास्थल पुगेको प्रहरीले उनीहरुलाई पक्राउ गरेको थियो ।
प्रहरीले सम्झाइ बुझाई नृत्य नगर्न आग्रह गरिरहेकोबेला लक्ष्मीनियामा केही उच्छृङ्खल समुहले प्रहरीमाथि आक्रमणको प्रयास र प्रहरी चौकीमा ढुङ्गामुढा गरेपछि राति स्थिति तनावपूर्ण बनेको थियो । समुहको ढुङ्गामुढाबाट कान्तिवजार प्रहरी कार्यालय भवनमा भौतिक क्षति पुगेको छ । घटनास्थलबाट गौशाला ११ लक्ष्मीनियाका ४६ वर्षिय कमलेश कर्ण र ३० वर्षिय सन्जयकुमार यादवलाई समेत प्रहरीले पक्राउ गरेको छ ।
उनीहरुमाथि सार्वजनिक शान्तिविरुद्धको कसुरमा मुद्दा चलाइएको गौशाला प्रहरी निरीक्षक मिश्रले बताए । दुवैमाथि अग्रिम कारवाहीका लागि आइतवार फाईलसहित प्रशासन कार्यालयमा पेस गरिएकाे गौशाला प्रहरीले जनाएको छ ।












