वीरगंज । सशस्त्र प्रहरी बल, नेपाल नं. १३ गण मुख्यालय पर्साले दुई दिनको कारबाहीमा रु. २३ लाख ५८ हजार ९० बराबरका अवैध सामान तथा ओसारपसारमा प्रयोग भएका सवारीसाधन बरामद गरी वीरगञ्ज भन्सार कार्यालयमा बुझाएको छ ।
सशस्त्र प्रहरीले दिएको जानकारीअनुसार आइतबार र साेमबार नं. १३ गण मुख्यालय पर्सा, सीमा सुरक्षा गुल्म मुख्यालय वीरगञ्ज, बिओपी सिर्सिया तथा सीमा सुरक्षा गुल्म मुख्यालय भिखमपुरबाट खटिएका टोलीहरूले विशेष सूचनाका आधारमा तथा नियमित चेकजाँचका क्रममा विभिन्न स्थानमा कारबाही गरेका हुन् ।
कारबाहीका क्रममा भन्सार छली गरी नेपालतर्फ ल्याइँदै गरेका कपडा, फलफूल, हार्डवेयर सामग्री, कम्प्युटर पार्ट्स (सीपीयू प्रोसेसर), मोटरसाइकलका पार्ट्स, किराना सामान, कस्मेटिक सामग्री, मदिरालगायतका सामान बरामद गरिएको छ । साथै अवैध ओसारपसारमा प्रयोग भएका म्याजिक भ्यान, टाँगा तथा घोडासमेत नियन्त्रणमा लिइएको सशस्त्र प्रहरीले जनाएको छ ।
उक्त कारबाही वीरगञ्ज महानगरपालिका–१४ गण्डक चोक, वडा नं. १६ इनर्वा र भगवा तथा वडा नं. १ छप्कैयालगायतका सीमा क्षेत्रमा सञ्चालन गरिएको थियो ।
बरामद गरिएका सम्पूर्ण सामान तथा ओसारपसारमा प्रयोग भएका सवारीसाधन आवश्यक कानुनी कारबाहीका लागि वीरगञ्ज भन्सार कार्यालय, पर्सामा बुझाइएको सशस्त्र प्रहरी बल, नेपाल नं. १३ गण मुख्यालय पर्साका सूचना अधिकारी सशस्त्र प्रहरी नायब उपरीक्षक मोहनराज निरौलाले जानकारी दिए ।
