वीरगंज । पर्साको विन्दवासिनी गाउँपालिकाबाट सशस्त्र प्रहरीले ३९ किलोभन्दा बढी गाँजाजस्तो देखिने पदार्थसहित एक जनालाई नियन्त्रणमा लिएको छ ।
सशस्त्र प्रहरी बल नेपाल नं. १३ गण हेडक्वार्टर पर्साका अनुसार शनिबार राति करिब ११ः५५ बजे विन्दवासिनी गाउँपालिका–४ मधवलस्थित क्षेत्रमा विशेष सूचनाका आधारमा चेकजाँच तथा निगरानी गर्ने क्रममा उक्त पदार्थ बरामद गरिएको हो ।
वि.ओ.पि. अमरपट्टी, वि.ओ.पि. प्रसौनीभाठा र प्रहरी चौकी अमरपट्टीबाट संयुक्त रूपमा खटिएको टोलीले इटियाहीबाट मधवलतर्फ आउँदै गरेका व्यक्तिहरूमाथि निगरानी गरिरहेको थियो । प्रहरी टोलीलाई देखेपछि उनीहरूले तीन वटा मोटरसाइकल र तीन वटा झोला झाडीतर्फ फालेर भाग्ने प्रयास गरेका थिए ।
संयुक्त टोलीले उनीहरूमध्ये एक जनालाई नियन्त्रणमा लिन सफल भएको थियो । झोला जाँच गर्दा ३९ किलो २५० ग्राम गाँजाजस्तो देखिने पदार्थ फेला परेको प्रहरीले जनाएको छ ।
घटनास्थलबाट तीन वटा मोटरसाइकलसमेत नियन्त्रणमा लिइएको छ । नियन्त्रणमा लिइएका व्यक्ति, बरामद पदार्थ तथा मोटरसाइकललाई आवश्यक अनुसन्धान तथा कानुनी कारबाहीका लागि प्रहरी चौकी अमरपट्टीमा बुझाइएको छ ।
घटनामा संलग्न अन्य फरार व्यक्तिहरूको खोजी भइरहेको सशस्त्र प्रहरीले जनाएको छ ।
