वीरगंज । जनसेवा, स्वास्थ्य सचेतना तथा सामाजिक सुरक्षासम्बन्धी जानकारी समुदायसम्म पुर्याउने उद्देश्यले सञ्चालित ‘जनसेवा अभियान–पर्सागढी नगरपालिका’ अन्तर्गत पर्सागढीका विभिन्न बस्तीमा जनजागरण तथा जनसहभागितामूलक कार्यक्रम सम्पन्न भएको छ ।
रास्वपा महाधिवेशन प्रतिनिधि डा. चन्द्र भूषण सिंहको आयोजनामा सञ्चालित युवा अभियानअन्तर्गत पर्सागढी नगरपालिका–६ शिव टोल, वडा नं. ७ रघुनाथपुर र वडा नं. १ भटनी गाउँमा पुगेर स्थानीयलाई स्वास्थ्य परामर्श तथा सामाजिक सुरक्षासम्बन्धी जानकारी दिइएको हो ।
कार्यक्रममा चिकित्सकले स्थानीय नागरिकलाई स्वास्थ्य परामर्श प्रदान गर्नुका साथै वर्षायाममा लामखुट्टेको टोकाइबाट फैलिने डेंगुलगायतका रोगबाट बच्ने उपाय, व्यक्तिगत तथा सामुदायिक सरसफाइ र रोग रोकथामका व्यवहारबारे जानकारी गराएका थिए ।
लामखुट्टेजन्य रोगबाट बच्ने सन्देश समुदायसम्म पुर्याउने उद्देश्यले कार्यक्रममा सांकेतिक रूपमा झुलसमेत वितरण गरिएको थियो । रोग लागेपछि उपचार गर्नुभन्दा रोग लाग्न नदिन समुदायस्तरमै सचेतना र रोकथामलाई प्राथमिकता दिनुपर्नेमा अभियानले जोड दिएको छ ।
यस्तै, स्वास्थ्य तथा सामाजिक सुरक्षा सेवाबाट वञ्चित नागरिकलाई राज्यबाट उपलब्ध सेवासुविधाको पहुँचमा ल्याउने उद्देश्यले स्वास्थ्य बिमा, निःशुल्क स्वास्थ्य बिमा, ज्येष्ठ नागरिक तथा अपाङ्गता भएका व्यक्तिका लागि उपलब्ध स्वास्थ्य बिमालगायतका विषयमा जानकारी दिइएको थियो ।
आर्थिक अभावका कारण उपचारमा समस्या भोगिरहेका विपन्न नागरिकले विपन्न नागरिक औषधि उपचार कोषमार्फत प्राप्त गर्न सक्ने उपचार सहायता तथा सहुलियतका विषयमा समेत स्थानीयलाई जानकारी गराइएको आयोजकले जनाएको छ ।
अभियानमार्फत जनताको घरदैलोमै पुगेर स्वास्थ्य समस्या बुझ्ने, स्वास्थ्य परामर्श दिने, सरकारी सेवासुविधाबारे जानकारी गराउने तथा सेवाबाट वञ्चित नागरिकलाई सम्बन्धित निकायसँग जोड्ने कार्यलाई प्राथमिकता दिइएको छ ।
कार्यक्रममा रास्वपा पर्सागढीका सभापति कविराज अर्याल, युवा नेताहरू समीर अन्सारी, रौनक सिंह, जोखू मियाँ, रवि राज यादव, विनय ओझा, मिनबहादुर भण्डारी, बिकेस राय थारु, जयकरण यादव, रामकिशोर राय थारु र जयप्रकाश यादवलगायत पर्सागढी नगरका रास्वपा नेता तथा अभियानकर्मीहरूको सहभागिता रहेको थियो ।
आयोजक समूहका अनुसार ‘जनसेवा अभियान’लाई आगामी दिनमा पर्सागढीका अन्य गाउँ तथा समुदायमा समेत विस्तार गरिनेछ । स्वास्थ्य, जनकल्याण, सामाजिक सुरक्षा तथा जनजागरणका कार्यक्रमलाई चरणबद्ध रूपमा समुदायको घरदैलोसम्म पुर्याउने लक्ष्य रहेको आयोजकले जनाएको छ ।
