वीरगंज । त्रिभुवन राजमार्गअन्तर्गत वीरगंजको मुख्य सडकको दायाँ–बायाँ २५/२५ मिटर क्षेत्र खाली गराउने अभियान अन्तिम चरणमा पुगेको छ । सडक डिभिजन कार्यालय हेटौंडाले थालेको सडक विस्तारअन्तर्गत संरचना हटाउने अभियान अहिले तीव्र पारिएको हो ।
शनिबार वीरगंजको माइस्थान क्षेत्रमा डोजर प्रयोग गरी सडक सीमाभित्र रहेका संरचना हटाइएको छ । सडक डिभिजन कार्यालयका वीरगंज फोकल पर्सन दुर्गा प्रसादका अनुसार अब करिब ६० वटा घर तथा अन्य संरचना हटाउन बाँकी छन् ।
उनका अनुसार बाँकी रहेका संरचनाहरू पनि एक साताभित्र हटाउने कार्य सम्पन्न गर्ने लक्ष्य राखिएको छ । अब मुख्यतः ठूला घर तथा व्यावसायिक संरचना हटाउन बाँकी रहेको उनले बताए ।
वीरगंजको मुख्य सडक क्षेत्रमा रहेका पम्पम बिल्डिङ, हिमालयन बैंक, सिद्धार्थ बैंक, डाबरको भवनलगायतका ठूला संरचनाहरू अझै हटाउन बाँकी छन् ।
त्रिभुवन राजमार्गअन्तर्गत वीरगंजको मुख्य सडक विस्तारका लागि सडकको दायाँ र बायाँ २५/२५ मिटरभित्र पर्ने संरचना हटाउने अभियान सञ्चालन भइरहेको छ । सडक डिभिजन कार्यालयले सडक सीमाभित्र पर्ने संरचना हटाउँदै सडक विस्तारका लागि आवश्यक क्षेत्र खाली गराउँदै आएको छ ।
