वीरगंज । जिल्ला ट्राफिक प्रहरी कार्यालय पर्साले सडक दुर्घटना न्यूनीकरण तथा ट्राफिक नियमप्रति जनचेतना अभिवृद्धि गर्ने उद्देश्यले ‘२ पाङ्ग्रे सवारी चालकसँग २ मिनेट’ नामक सचेतनामूलक अभियान सञ्चालन गरेको छ ।
अभियानअन्तर्गत वीरगंजका प्रतिमाचोक, मुर्ली, गण्डक, परवानीपुरलगायतका व्यस्त क्षेत्रसँगै ग्रामीण क्षेत्रका मिलनचोक, बहुअर्वा र ठोरीमा दुई पाङ्ग्रे सवारी चालकसँग प्रत्यक्ष संवाद गरी ट्राफिक नियमबारे जानकारी प्रदान गरिएको हो ।
कार्यक्रमका क्रममा चालकहरूलाई हेल्मेटको अनिवार्य प्रयोग, मोटरसाइकलमा तीन जना वा सोभन्दा बढी सवार नगर्ने, मादक पदार्थ सेवन (मापसे) तथा लागूऔषध सेवन (लापसे) गरी सवारी नचलाउने, तीव्र गतिमा सवारी नहाक्ने, आवश्यक सवारीसम्बन्धी कागजात साथमा राख्ने तथा ट्राफिक नियमको पूर्ण पालना गर्न आग्रह गरिएको थियो ।
जिल्ला ट्राफिक प्रहरी कार्यालय पर्साका प्रमुख प्रहरी निरीक्षक दिपेन्द्र श्रेष्ठका अनुसार प्रत्येक चालकसँग करिब दुई मिनेट प्रत्यक्ष संवाद गर्दै सुरक्षित यात्रा, जिम्मेवार चालकको भूमिका र सडक दुर्घटना न्यूनीकरणका उपायबारे सचेतना फैलाइएको हो ।
उनले यस्ता जनचेतनामूलक अभियानले चालकमा ट्राफिक नियमप्रति जिम्मेवारीबोध बढाउने र सडक दुर्घटना न्यूनीकरणमा सकारात्मक योगदान पुग्ने विश्वास व्यक्त गरे ।
जिल्ला ट्राफिक प्रहरी कार्यालय पर्साले आगामी दिनमा पनि जिल्लाका विभिन्न स्थानमा यस्ता सचेतनामूलक कार्यक्रमलाई निरन्तर सञ्चालन गर्दै सडक सुरक्षा संस्कृतिको विकास र दुर्घटना न्यूनीकरणमा विशेष जोड दिने जनाएको छ ।
