वीरगंज । ठाकुरराम बहुमुखी क्याम्पस वीरगंजमा परीक्षामा मोबाइल प्रयोग गरेको विषयलाई लिएर बिहिबार विद्यार्थी नेताका दुई समूहबीच विवाद हुँदा कुटाकुट भएको छ । घटनामा दुई जना विद्यार्थी घाइते समेत भएका छन् ।
बिहीबार क्याम्पसमा एमए फस्ट सेमेस्टरको परीक्षा सञ्चालन भइरहेका बेला परीक्षा हलमा मोबाइल फोन प्रयोग गरेको विषयलाई लिएर विवाद सुरु भएको थियो । विवाद बढ्दै गएपछि क्याम्पस परिसरमै दुई समूहबीच कुटाकुट भएको र स्थिति नियन्त्रणमा लिन प्रहरीले लाठीचार्जसमेत गरेको प्रत्यक्षदर्शीले वताएका छन् ।
क्याम्पसका एक कर्मचारीका अनुसार परीक्षा दिइरहेका स्ववियु सदस्य आयुष यादव क्याम्पसले निर्धारण गरेको सिट प्लानअनुसारको कोठामा नबसी अर्कै कोठामा बसेका थिए । परीक्षामा खटिएका निरीक्षकले उनलाई निर्धारित कोठामा जान आग्रह गर्दा विवाद भएको थियो ।
त्यसैक्रममा परीक्षा अनुगमनका लागि पुगेका स्ववियु सभापति राजकुमार यादवले परीक्षाको मर्यादा पालना गर्न आग्रह गर्दा उनीहरूबीच थप विवाद भएको थियो । परीक्षा हलमै यादवको साथबाट मोबाइल फोनसमेत भेटिएपछि विवाद थप चर्किएको थियाे ।
क्याम्पस प्रमुख डा. केशव यादवले स्ववियु सदस्य आयुष यादवको साथमा रहेको मोबाइल जफत गरेपछि उनी आक्रोशित बनेको र फोनमार्फत बाहिरबाट आफ्ना समर्थकहरूलाई क्याम्पसमा बोलाएको कर्मचारीले बताएका छन् ।
त्यसपछि आयुष यादव र राजकुमार यादव पक्षबीच क्याम्पस परिसरमै हानाहान भएको थियो । स्थिति नियन्त्रणमा लिन पुगेको प्रहरीले लाठीचार्ज गरेको थियो ।
कुटाकुटमा वीरगंज महानगरपालिका–२४ का अन्दाजी २३ वर्षीय सुनिल यादव र वीरगंज–१० का अन्दाजी २५ वर्षीय राजु श्रीवास्तव घाइते भएका छन् । दुवै जना क्याम्पसका विद्यार्थी रहेको र उनीहरूको नारायणी अस्पतालमा उपचारको लागि पठाइएकाे प्रहरीले जनाएको छ ।
घटनामा संलग्न रहेको आरोपमा स्ववियु सदस्य आयुष यादवलाई प्रहरीले नियन्त्रणमा लिएको छ । उनलाई प्रहरी हिरासतमा राखेर घटनाबारे अनुसन्धान भइरहेको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक चक्रबहादुर मल्लले जानकारी दिए ।
डीएसपी मल्लका अनुसार परीक्षा सञ्चालन भइरहेका बेला क्याम्पसले तोकेको भन्दा फरक कोठामा परीक्षा दिन बसेका स्ववियु सदस्य यादव र परीक्षा अनुगमनका क्रममा पुगेका स्ववियु सभापति यादव पक्षबीच विवादपछि कुटाकुट भएको हो ।
