काठमाडौं । देशलाई संकटबाट जोगाउन ‘फेक शासनविरुद्ध निर्णायक आन्दोलन’ आवश्यक रहेको निष्कर्षसहित जेनजी अगुवाहरूले आन्दोलन पुनर्गठन गर्ने घोषणा गरेका छन् । शनिबार काठमाडौंमा आयोजित पत्रकार सम्मेलनमार्फत उनीहरूले आगामी भदौ २३ गते सरकारलाई खबरदारी गर्दै ज्ञापनपत्र बुझाउने घोषणा गरेका हुन् ।

‘कमन जेनजी नेपाल’ले आयोजना गरेको जेनजी संवाद कार्यक्रममा सहभागी अगुवाहरूले जेनजी आन्दोलनको समीक्षा गर्दै सरकारले युवा पुस्ताका मागलाई बेवास्ता गरेको आरोप लगाए । उनीहरूले राज्यले युवाको धैर्यतालाई कमजोरीका रूपमा बुझेको भन्दै अब आन्दोलनलाई थप सशक्त बनाउने चेतावनी दिएका छन् ।

कमन जेनजी नेपालका अध्यक्ष विकेश साहले भदौ २३ गते खबरदारी ¥यालीसहित सरकारलाई ज्ञापनपत्र बुझाउने बताए । जेनजी आन्दोलनका पीडितलाई न्याय दिलाउन तथा आन्दोलनका माग सम्बोधन गराउन सरकारलाई दबाब दिन कार्यक्रम आयोजना गर्न लागिएको उनको भनाइ छ ।

साहले जेनजी आन्दोलनका क्रममा भएका घटनाबारे गठन भएको छानबिन आयोगको प्रतिवेदनअनुसार दोषीमाथि कारबाही गर्न सरकार असफल भएको आरोप लगाए । उनले जेनजी आन्दोलनमा संलग्न युवामाथि भएका हिंसाका दोषीलाई तत्काल कारबाही गर्न माग गरे ।

‘जेनजीका हत्यारालाई कारबाही गर्न सरकार असफल देखिएको छ । सरकारले दोषीलाई यथाशीघ्र कारबाही गरोस् । कारबाही गर्न सक्दैन भने कुर्सीमा बस्ने अधिकार छैन,’ साहले भने ।

जेनजी आन्दोलन सुशासन, रोजगारी, भ्रष्टाचार नियन्त्रण तथा राज्य संरचनामा आमूल परिवर्तनका लागि भएको भए पनि वर्तमान सरकारले ती माग सम्बोधन गर्न नसकेको उनले आरोप लगाए ।

उनले जेनजी आन्दोलनका नाममा सम्झौता गर्ने र आन्दोलनका माग कमजोर बनाउने प्रयास भएको भन्दै त्यसबारे जवाफ दिनुपर्ने बताए । ‘जेनजीका ठेकेदार र राज्यका ठेकेदारसँग प्रश्न गर्ने समय आएको छ,’ साहले भने, ‘सम्झौताको नाममा जेनजी आन्दोलनमाथि घात किन गरियो र आन्दोलनका माग सम्बोधन गर्न कुन शक्तिले रोक्यो ?’

राज्यप्रति नागरिकको विश्वास घट्दै गएको दाबी गर्दै साहले देशको अस्तित्व र जेनजी आन्दोलनको सम्मान जोगाउन आमूल परिवर्तन आवश्यक रहेको बताए ।

उनले परिवर्तन चाहने जेनजी संगठन तथा अभियन्ता, राजनीतिक दलका नेता, नागरिक समाज, सक्रिय युवा तथा अन्य शक्तिहरूलाई एकजुट हुन आह्वान गरे । सरकारले माग सम्बोधन नगरे दोस्रो चरणको जेनजी आन्दोलन गर्न बाध्य हुने चेतावनीसमेत उनले दिए ।

पत्रकार सम्मेलनमा रवि किरण हमाल, सौरव भण्डारी, कृष्ण मोहन सहनी, दीपेन्द्र विक, अमृत बोहरा, अभिनव वाग्ले, उज्ज्वल शर्मा, रोनिश साहलगायत जेनजी अगुवाहरूको सहभागिता थियो । विभिन्न जेनजी संगठनमा आबद्ध उनीहरूले संयुक्त रूपमा भदौ २३ गते खबरदारीसहित ज्ञापनपत्र बुझाउने बताएका छन् ।

अगुवाहरूले आगामी आन्दोलन आफूहरूको रहर नभई बाध्यता भएको दाबी गर्दै परिवर्तन चाहने युवा, राजनीतिक दल, नागरिक समाज तथा राष्ट्रवादी शक्तिलाई एकजुट हुन आह्वान गरेका छन् ।

काठमाडौं । सरकार विरुद्ध आन्दोलनको घोषणा गरेको कमन जेनजी नेपालले शनिबार काठमाडौंमा पत्रकार सम्मेलन एवं अन्तरक्रिया कार्यक्रम गर्दैछ ।

कमन जेनजी नेपालका अध्यक्ष विकेश साहले वर्तमान सरकारले जेनजीको माग सम्बोधन नगरेकाले आन्दोलनको विकल्प नभएको बताए । कमन जेनजी नेपालले आउँदो २३ भदौमा काठमाडौं सहित देशैभरी सरकार विरुद्ध प्रदर्शन गर्ने घोषणा यसअघि नै गरिसकेको छ ।

‘देशको वर्तमान अवस्था र जेनजी आन्दोलनको समीक्षा गर्दै वर्तमान सरकारका सन्दर्भमा विभिन्न जेनजी संगठन र अभियन्ताहरूको विशेष पत्रकार सम्मेलन सहित विशेष अन्तक्रिया कार्यक्रम काठमाडौंको संवाद डबलीमा शनिबार गर्दैछौं,’ अध्यक्ष साहले भने ।

पत्रकार सम्मेलन एवं अन्तरक्रिया कार्यक्रममा कमन जेनजी नेपालका अध्यक्ष विकेश साह सहित गरिखान देउका डा.जगत विक, जेनजी अभियन्ताहरु रविकिरण हमाल, कृष्णमोहन सहनी, सौरव भण्डारी, विरचन विके, सुनिल सिंह, सरिस्मा थापा, अभिनव वाग्ले सहभागि हुदैछन् ।

यसैगरी वैदिक सनातन युवा मोर्चाका राष्ट्रिय अध्यक्ष सुशील बराल, जेनजी मोमेन्ट एलाइन्सका अमित खनाल, मिथिला जेनजी एलाइन्सका शशीकुमार यादव, कर्णाली जेजनी संयोजक दिपेन्द्र विके, जेनजी अभियन्ता अमृतकुमार बोहरा, कमन जेनजी नेपालका उज्जवल शर्मा, रोनिश साह लगायतका जेनजी अभियन्ताहरु समेत अन्तरक्रिया कार्यक्रममा सहभागि हुने बताइन्छ ।

जेनजी आन्दोलन सुरु भएको झण्डै एक वर्ष पुग्नै लाग्दा अवस्था जहाँको त्यही छ । वालने शाह नेतृत्वको सरकारले देशलाई निकास विहीन बनाएको भन्दै ‘कमन जेनजी नेपाल’ले सरकारलाई खब्बरदारी गर्न आन्दोलनको घोषणा गरेको हो । वालेन सरकारलाई ‘फेक’ भन्दै कमन जेनजीले आउँदो भदौ २३ गते ‘फेक शासन विरुद्ध असल शासन’ नारासहित देशव्यापी प्रदर्शन गर्ने जनाइएको छ ।

जेनजीले आन्दोलनको उद्देश्य ‘सरकार फेर्ने’ मात्र नभई ‘समग्र सिस्टममा आमूल परिवर्तन’ ल्याउनु थियो । तर केही ‘छद्मभेषी र स्वार्थी समूह’ले आन्दोलनलाई हाइज्याक गरेर ‘सरकार फेर्ने खेल’ मा मात्र सीमित पारेको गम्भिर आरोप अध्यक्ष साहले लगाएका छन् ।

आन्दोलनमा रगत बगाउने सहिद र घाइतेहरू सहाराविहीन बनेको र बदलाव चाहने नेपाली जनता निराश भएको बताउदै उनले यथासिघ्र जेनजी आन्दोलनको माग सम्बोधन गर्नुपर्ने माग समेत गरेका छन् ।

कमन जेनजीले आफूहरुको आन्दोलन ‘रहर नभई बाध्यता’ भएको भन्दै सम्पूर्ण बदलाव चाहने युवा, राजनीतिक दल, नागरिक समाज र राष्ट्रवादी शक्तिलाई एकजुट हुन आह्वान समेत गरेको छ ।