वीरगंज । जनमत पार्टी पर्साका जिल्ला अध्यक्ष एवं केन्द्रीय सदस्य ओमप्रकाश सरार्फले युवालाई राष्ट्र निर्माणको वर्तमान शक्ति र परिवर्तनका प्रमुख संवाहकका रूपमा स्थापित गर्नुपर्ने बताएका छन् ।
अन्तर्राष्ट्रिय युवा दिवसको अवसरमा शुभकामना सन्देश जारी गर्दै सरार्फले युवाको ऊर्जा, सिर्जनशीलता, क्षमता र नेतृत्वलाई सही दिशामा परिचालन गर्न सके समृद्ध, समावेशी र आत्मनिर्भर समाज निर्माण गर्न सकिने बताएका हुन् ।
उनले युवाका लागि अवसर, रोजगारी, उद्यमशीलता, शिक्षा, प्रविधि तथा नेतृत्वमा समान पहुँच सुनिश्चित गर्नुपर्नेमा जोड दिएका छन् । युवाको सोच, जोश र क्षमतालाई राष्ट्र निर्माणसँग जोड्नु आजको आवश्यकता रहेको उनको भनाइ छ ।
देश तथा विदेशमा रहेका सम्पूर्ण नेपाली युवालाई अन्तर्राष्ट्रिय युवा दिवसको शुभकामना व्यक्त गर्दै सरार्फले ‘युवा शक्ति, समृद्ध भविष्य; सशक्त युवा, समृद्ध समाज, समृद्ध राष्ट्र’ भन्ने अवधारणालाई व्यवहारमा उतार्नुपर्ने बताएका छन् ।
उनले युवालाई अवसर र जिम्मेवारी प्रदान गर्दै उनीहरूको क्षमता उपयोग गर्न सके मुलुकको सामाजिक तथा आर्थिक रूपान्तरणमा महत्वपूर्ण योगदान पुग्ने विश्वास व्यक्त गरेका छन् ।
