वीरगंज । अत्यधिक गर्मी बढेपछि वीरगंज महानगरपालिकाले महानगर क्षेत्रका सबै सामुदायिक तथा संस्थागत विद्यालयमा दुई दिन अनिवार्य रूपमा बिहानको कक्षा सञ्चालन गर्न निर्देशन दिएको छ ।
महानगरपालिकाले जारी गरेको सूचनाअनुसार विद्यार्थीहरूको स्वास्थ्यलाई मध्यनजर गर्दै यही साउन २८ र २९ गते सबै विद्यालयमा बिहानको सत्र सञ्चालन गर्नुपर्नेछ ।
महानगरले उक्त दुई दिन बिहान ६ बजेदेखि ९ः३० बजेसम्म मात्र कक्षा सञ्चालन गर्न विद्यालयहरूलाई निर्देशन दिएको हो ।
आकस्मिक रूपमा अत्यधिक गर्मी बढेको र त्यसबाट विद्यार्थीको स्वास्थ्यमा पर्न सक्ने असरलाई ध्यानमा राख्दै बिहानको समयमा कक्षा सञ्चालन गर्ने निर्णय गरिएको महानगरपालिकाले जनाएको छ ।
वीरगञ्ज महानगरपालिकाको कार्यालयले महानगर क्षेत्रभित्रका सम्पूर्ण सामुदायिक तथा संस्थागत विद्यालयलाई निर्देशन पालना गर्न आग्रह गरेको छ ।
