वीरगंज । अन्तर्राष्ट्रिय युवा दिवस–२०२६ को अवसरमा नेपाल युवा उद्यमी मञ्च (एनवाइइएफ) वीरगञ्ज च्याप्टरले युवा नेतृत्व, उद्यमशीलता, सिर्जनशीलता र नवप्रवर्तनलाई केन्द्रमा राख्दै विशेष कार्यक्रम आयोजना गरेको छ।
‘लागुऔषधलाई भनौँ नाइँ, सपनालाई भनौँ हो’ भन्ने सन्देशसहित बुधबार वीरगञ्जमा युवा र्याली निकालिएको हो। र्यालीपछि विभिन्न क्षेत्रका प्रेरणादायी वक्ताहरूको प्रस्तुति, अन्तरक्रियात्मक सत्र तथा सामग्री सिर्जनाकर्ता प्रतियोगितासहितको मुख्य कार्यक्रम सम्पन्न गरिएको थियो।
एनवाइइएफ वीरगञ्ज च्याप्टर र सशस्त्र प्रहरी बल, नेपाल नं. १३ गण हेडक्वार्टर पर्साको संयुक्त आयोजनामा निकालिएको र्याली माइस्थान चोकस्थित गहवा माई मन्दिर अगाडिबाट सुरु भएको थियो। र्याली गीतामन्दिर हुँदै घडिअर्वा पोखरी पुगेपछि मुख्य सडक हुँदै सरोवर पोर्टिको होटलमा पुगेर सम्पन्न भएको थियो।
र्यालीमा सहभागी युवाहरूले लागुऔषधविरुद्ध विभिन्न जनचेतनामूलक प्लेकार्ड बोकेका थिए। युवालाई लागुऔषधको दुव्र्यसनबाट टाढा राख्दै सकारात्मक सोच, शिक्षा, सिर्जनशीलता र भविष्य निर्माणतर्फ अग्रसर गराउने उद्देश्यले र्याली आयोजना गरिएको आयोजकले जनाएको छ।
र्यालीपछि सरोवर पोर्टिको होटलमा एनवाइइएफ वीरगञ्ज च्याप्टरका अध्यक्ष चन्दन सिंहको अध्यक्षतामा मुख्य कार्यक्रम सम्पन्न भएको थियो। कार्यक्रममा रास्वपाका केन्द्रीय सदस्य एवं प्रतिनिधिसभा सदस्य मनिष झा प्रमुख अतिथिका रूपमा सहभागी थिए।
कार्यक्रममा वीरगञ्ज पब्लिक कलेजका डा. बासु कर्ण, डा. अरविन्द श्रेष्ठ, डा. नीरज सिंह, वीरगञ्ज उद्योग वाणिज्य संघका पूर्वअध्यक्ष एवं उद्योगपति गणेश लाठ, डा. सुबोध गुप्ता, युवा नेता सुधीर पटेल, वीरगञ्ज उद्योग वाणिज्य संघका वरिष्ठ उपाध्यक्ष माधवराज पाल, भारतीय दूतावास वीरगञ्जका मनिष सिंह, एनवाइइएफका कार्यकारी सदस्य पवित्रा गौतम, होप गिभर नेपालका संस्थापक रोमन गुरुङ, नेपाल इनोभेटिभ सोसाइटी वीरगञ्जका अध्यक्ष कमल चौगाईंलगायत शिक्षक तथा विद्यार्थीहरूको उपस्थिति थियो।
वीरगञ्ज सनलाइट कलेज, ममता विद्यामन्दिर, वीरगञ्ज पब्लिक कलेज, ब्राइट प्लस टु कलेज, बीपीएस कलेजलगायत विभिन्न शैक्षिक संस्थाका विद्यार्थीहरूले कार्यक्रममा उल्लेखनीय सहभागिता जनाएका थिए।
कार्यक्रममा युवाको नेतृत्व विकास, उद्यमशीलता, सिर्जनशीलता तथा नवप्रवर्तनका विषयमा वक्ताहरूले आफ्ना धारणा राख्दै युवालाई सामाजिक क्षेत्रमा सक्रिय बनाउनुपर्नेमा जोड दिए। युवालाई सकारात्मक परिवर्तनका संवाहकका रूपमा अघि बढाउन शिक्षा, अवसर र उद्यमशीलताको वातावरण निर्माण गर्नुपर्ने वक्ताहरूको भनाइ थियो।
यसै अवसरमा आयोजित सामग्री सिर्जनाकर्ता प्रतियोगिता–२०२६ मा पाँच जना सहभागीमध्ये कन्हैया सराफ विजेता बनेका छन् । विजेता सराफलाई नगद ५ हजार १ सय रुपैयाँ, मायाको चिनो तथा प्रमाणपत्र प्रदान गरी सम्मान गरिएको थियो । कार्यक्रमको सञ्चालन सूर्यनारायण विकले गरेका थिए।
