Date
मङ्ल, मंसिर १, २०८३
Tue, November 17, 2026
Home Blog Page 556

जिल्ला न्यायाधीशसहितको टोलीद्वारा बिन्दबासिनी गाउँपालिकाकाे अनुगमन

0

वीरगंज । पर्सा जिल्ला अदालतको न्यायाधीशसहितको एक टोलीले बिन्दबासिनी गाउँपालिकाको न्यायिक समितिले गरेका काम कारबाहीको अनुगमन गरेको छ । जिल्ला न्यायाधीश कृष्णा प्रसाद पौडेल, रजिष्टार अरुण कुमार कोइराला, शाखा अधिकृत जमुना धितालसहितको टोलीले शनिबार गाउँपालिकामा पुगेर न्यायिक समितिको काम कारबाहीको अनुगमन गरेको हो ।

टाेलीले गाउँपालिका उपाध्यक्ष ज्योती चौरसियाको संयोजकत्वमा रहेको न्यायिक समितिले गरेका प्रक्रियागत कुराको अनुगमन गरेकाे जनाइएकाे छ । न्यायिक समितिले सम्पादन गर्ने मुद्दाहरु शुरुदेखि फैसलासम्मका प्रक्रिया मिले नमिलेकोबारे आर्थिक वर्षको अन्त्यमा अनुगमन गर्ने गरिएको बिन्दबासिनी गाउँपालिका अध्यक्ष प्रमोद तिवारीले जानकारी दिए ।

अनुगमन कै क्रममा गाउँपालिका अध्यक्ष तिवारीले न्यायाधीशसहितको टोलीलाई गाउँपालिका अन्तर्गत पर्ने ढंगहि नदीको भु- माफियाले कब्जा गरी बल नदीको मुहान परिवर्तन गरेको दृश्य परिवर्तन गरेको स्थल मै लगी अनुगमन गराएका थिए । अनुगमनपछि टोलीले बिन्दबासिनी गाउँपालिकाका न्याय सम्पादन प्रक्रिया सन्तोषजनक रहेको प्रतिक्रिया दिएको थियो ।

बिन्दबासिनी गाउँपालिकाको वडा वडामा रहेको मेलमिलाप केन्द्र र पालिकामा रहेको न्यायिक समितिले आफ्नो कार्यसम्पादन गर्दै आएको छ ।

बिन्दबासिनीमा चालू आर्थिक वर्षमा न्यायिक समिति र मेलमिलाप केन्द्रमा आएका मुद्दाको ८० प्रतिशत बढी फैसला भइसकेको गाउँपालिका जनाएको छ । साथै पालिकाले पनि आफ्नो सम्पूर्ण कामकाज समय समयमा गर्दै आएको हुनाले पालिकाका प्रमुख प्रशासकिय अधिकृत राजु साहलाई धन्यवाद समेत दिएको गाउँपालिकाका प्रेस सल्लाहकार संजिव मिश्रले जानकारी दिए ।

हरवाचरवाको अधिकार यात्रा सुरु

0

वीरगंज । मधेस प्रदेशका मुक्त हरवाचरवाले न्यायिक पुनःस्थापनाको माग गर्दै शनिबारदेखि चार दिने अधिकार यात्रा सुरु गरेका छन् । वीरगंजबाट सुरु भएकाे यात्राकाे वीरगंज महानगरपालिकाका मेयर राजेशमान सिंहले उद्घाटन गरेका थिए ।

अधिकार यात्राकाे उदघाटन गर्दै मेयर सिंहले अधिकारकाे लडाईमा आफुसहित वीरगंज महानगरपालिका साथमा रहेकाे वताए । उनले भने “अधिकार प्राप्तीकाे लागि मैले के गर्नु पर्छ ? त्यसकाे याेजना बनाएर दिनुस्, म गर्न तयार छु । महानगर तयार छ ।”

नेकपा (एकीकृत समाजवादी) पर्साका अध्यक्ष बालगाेपाल थापाले अधिकारकाे लडाईमा आफ्नाे पार्टीकाे समर्थन रहेकाे वताए । उनले भने “दलित समुदायकाे विकास र उत्थानकाे लागि हाम्राे पार्टी पहिलादेखि नै लागि परेकाे छ, अहिलेकाे अधिकार यात्रामा पनि समर्थन रहेकाे छ ।”

सरकारले मुक्तिको घोषणा गरेको नौ महिना भइसक्दा पनि पुनःस्थापनाका कार्यक्रम सुरु नगरेको भन्दै सरकार र सरोकारवालाको ध्यानाकर्षणका लागि यात्रा  सुरु गरेका हुन् ।

प्रदेशका आठ जिल्लामध्ये सप्तरी, सिरहा, सर्लाही, धनुषा क्षेत्रलाई समेटेर सप्तरीको राजविराज र बारा, पर्सा, रौतहट तथा महोत्तरी क्षेत्रलाई समेटेर वीरगंजबाट दुई समूहमा यात्रा सुरु भई जनकपुरधाम पुग्ने कार्यक्रम रहेको राष्ट्रिय हरवाचरवा अधिकार मंचका उपाध्यक्ष श्रीप्रसाद सदाले वताए ।

उनले भने “सरकारले यही वर्ष साउन २ गते मुक्तिको घोषणा ग¥यो, हामीले पनि सहमति जनायाैं तर नौ महिनासम्म पुनःस्थापनाका कुनै कार्यक्रम ल्याइएन र ल्याउने छाटकाट पनि छैन”,  केन्द्र सरकारले मुक्तिको घोषणा ग¥यो तर स्थानीय तह र अन्य निकायले बसिरहेको खोला, सडक, जङ्गल छेउ र ऐलानी जग्गाबाट उठिबास लगाउन थाल्यो । अब न्याय कसलाई माग्ने ? आफ्नो मागको सुनुवाइ होस् भनेर अधिकार यात्रा गर्दैछौँ ।”

यात्रामा सहभागिहरुले सरकारले प्रतिबद्धता जाहेर गरेअनुरुप तत्काल हरवाचरवाको लगत सङ्कलन गरी न्यायिक पुनःस्थापनाको प्याकेज ल्याउन माग गरेका छन् । उनीहरुले वर्षौदेखि काम गर्दा सामाजिक प्रतिष्ठा गुमाउनुका साथै श्रमको मूल्य नपाउँदा गरिबीको चपेटामा पर्नुपरेको र मुक्तिको घोषणापछि समस्या थप बल्झिन थालेको बताएका हुन् ।

“यो समुदाय पहिलो चरणमा अधिकार यात्रा र त्यसपछि आन्दोलनमा जाने मनस्थितिमा छ । उहाँहरुका मुद्दा सम्बोधन गर्न सरकारले ठोस् कदम चाल्न जरुरी छ”, विश्वकर्माले भने । अधिकार यात्राका क्रममा करिव १० हजार बढी हरवाचरवा र शुभचिन्तकमा पुगेर सङ्कलन गरिएको माग र उनीहरुको बाहुल्य रहेका पालिकामा गई सम्बन्धित पालिकाका प्रमुखबाट लिइएको प्रतिबद्धतासहित मुख्यमन्त्रीलाई ज्ञापनपत्र हस्तान्तरण गर्ने कार्यक्रम रहेको राष्ट्रिय दलित नेटवर्क (आरडिएन)का मिडिया फाेकल पर्सन बृजलाल पासवानले वताए ।

मञ्चले हरवाचरवाको जीविकोपार्जनका लागि कम्तीमा १० कट्ठा जमिन प्रदान गर्नुपर्ने माग गरिरहेको छ । मञ्चले मन्त्रिपरिषद्बाट विस्तृत कार्ययोजना र कार्यविधि पारित गरी हरवाचरवाको जीविकोपार्जनका लागि आवश्यक सीपको तालिम, रु एक लाखको बीउपूँजी र आवश्यक औजार प्रदान गर्नुपर्नेमा जोड दिएको छ ।

त्यसैगरी उनीहरुको लगत सङ्कलन, सत्यापन, परिचयपत्र वितरण, पुनःस्थापना, सामाजिक विभेदको अन्त्य, मर्यादित जीवन, सामाजिक सशक्तिकरण, समावेशीकरण, शिक्षा, स्वास्थ्य, रोजगारी तथा सामाजिक सुरक्षाका मुद्दा सम्बोधन गर्न केन्द्र, प्रदेश र स्थानीय तहलाई समन्वयात्मक ढङ्गले समस्याको हल गर्ने गरी आगामी नीति तथा कार्यक्रम तर्जुमा गरी बजेट विनियोजन गर्न, विकासको बहानामा विस्थापित गर्ने क्रम सुरु भएकाले यसलाई तत्काल रोकी वैकल्पिक व्यवस्था गर्न मञ्चले माग गरेको छ ।

पर्सामा पुन: प्रहरीले दियाे तस्करीकाे लाइन, कहाँ कुन तस्करले पाए लाइन ?

0

वीरगंज । पर्सामा केही समय बन्द रहेकाे तस्करीकाे लाइन पुन: प्रहरीले दिएकाे छ । नेपाल प्रहरी एवं सशस्त्र प्रहरीका अधिकारीहरुले तस्करहरुलाई मोटो रकम महिनावारी लिने शर्तमा लाइन दिएपछि अहिले पर्साको ग्रामीण ईलाकामा रहेको भिस्वा नाकाबाट निर्वाध रुपमा तस्करी भइरहेको छ ।

सीमा सुरक्षा बल सशस्त्र प्रहरी तथा नेपाल प्रहरीका जिल्लास्थित प्रहरी प्रमुखहरु तथा प्रदेश प्रमुखहरु समेतले तस्करीहरुसँग मोटो रकम असुल गरिरहेको स्रोतको दाबी छ । तस्करहरुको संरक्षण प्रहरीले नै गर्न थालेपछि के दिन के रात २४ घण्टा सीमा नाकाबाट अवैध माल ओसारपोसार भइरहेको छ ।

पर्साको भिस्वा नाका अहिले सबैभन्दा बढी चर्चामा रहेको छ । भिस्वा नाकाबाट पर्साका नामुद तस्कर किशोर जैसवाल, उनको छोरा मुना जयसवाल र उनको भतिज रामु जैसवालको लाइन चलिरहेको छ ।

यस्तै किशोर, मुना र रामुको माल भिस्वा गोदामबाट बोर्डर कटाउने र भारतको सिक्टामा रहेको गोदाम सम्म माल सुरक्षित पुर्याउने ठेक्का भिस्वाको लडु र सिक्टाका पप्पुले लिएका छन । लडु र पप्पुले भरिया लगाएर टाउको मा राखी सिमानाका कटाएर सिक्टाको गोदाम सम्म पुर्याउन २ सय जना भरिया केलियरिङ गर्ने मान्छे काम्दार राखेका छन ।

अञ्जीर नामक फल, चाईनिज स्याउ, छोकडा, सुपारी, मरिच, खुखरी चुरोट, चाईनिज १० फिटे ईन्चीटेप, कुखुराको दाना, चाईनिज रहेको तर युनीलीवर कम्पनीको लेखिएका सबै समान जस्तो कि फेयरलबली, फेयरलबली पाउच, क्लजप पेस्ट लगायतका समान तस्करी गर्न छुट पाएका छन् ।

कबाडीकाे तस्करी पनि सुरु 

भारतीय सीमावर्ती सहर रक्सौलबाट सर्वसाधारणले सानो तिनो घरायसी सामान ल्याएपछि सशस्त्र प्रहरीले इमान्दारिताको खोल ओढी नौटंकी गर्दै रोकटोक गर्ने र रातिको समयमा सेटिङ्गमा ठेलाका ठेला कबाडीका सामानहरु भारततर्फ तस्करी भइरहेको छ भने कपडा तस्करहरु महँगा महँगा कपडा नेपाल भित्र्याई रहेका छन् ।

वीरगंज भन्सार स्थित बोर्डर आउट पोष्टमा सशस्त्र प्रहरी नायब उपरीक्षक आएको केही समय बित्न नपाउँदै इनर्वा गाउँ एवं वीरगंज भन्सार पछाडी रहेको बाँसघारी क्षेत्रबाट सशस्त्र प्रहरीको सेटिङ्गमा दैनिक करोडौं मूल्य बराबरको कबाडीको सामान भारततर्फ तस्करी हुने गरेको छ भने तस्करीको कपडा भित्र्याउन तस्करहरुले लाइन पाएका छन् ।

कबाडीको नाममा जनावरहरुको छाला, हड्डी लगायत बहुमूल्य धातुहरु भारततर्फ तस्करी गर्ने गरिएको छ । कबाडी तस्करीको लाइन पाएका इमरान खान लगायत ८ जना व्यक्तिहरुले दैनिक २ सय देखि ३ सय ठेला कबाडीको नाममा बहुमूल्य सामानहरु भारततर्फ तस्करी गर्ने गरेका छन् । बजारको बहुमूल्य सामानहरु ठेलामा लोड गरि कबाडीको नाममा तस्करी गर्ने गरेका छन् र सो कार्यमा सशस्त्र प्रहरी एवं नेपाल प्रहरीका सुरक्षाकर्मीहरु सहयोगी बन्दै आएका छन् ।

बहुमूल्य सामानधनीले केयरिङ्ग गर्ने तस्करहरुलाई प्रति केजी रु १३ तथा ठेलावालाहरुलाई प्रति केजी रु ३ को दरले पैसा दिने गरेका छन् । एउटा ठेलावालाहरुले ८ सय केजी भन्दा बढि सामान बोकेर भारततर्फ पु¥याउने गरेका छन् ।

चार महिनादेखि बन्द रहेको तस्करीको लागि यही आइतबारदेखि सुचारु भएको छ । रातिको १२ बजे पश्चात इनर्वा गाउँको चोर बाटो हुँदै दैनिक २ देखि अढाई सय ठेला कबाडीको सामान तस्करी हुने गरेको छ । जब रातिको १२ बज्छ, त्यस क्षेत्रमा रहेको बिजुलीको लाइन काटिन्छ र ठेलाका ठेला तस्करीको सामान सिमा कटाएपछि पुनः लाइन जोडिन्छ । 

नेपाल भारत दुबै देशको उद्योग वाणिज्य तथा आपूर्ति मन्त्रालयबाट आफ्नो देशको कबाडी आफ्नो देशमा स्क्रयाप गर्ने सम्झौता पनि भएको छ । तर सम्झौता विपरित तस्करहरुले करोडौं अर्बौको सामान कबाडीको नाममा भारत तस्करी गर्ने गरेका छन् । तस्करहरुले कबाडीको सामान वीरगंजदेखि रक्सौलको रामेश्वर फलमण्डीसम्म पु¥याउने जिम्मा पाएका हुन्छन् ।

कपडा तस्करीकाे पनि लाइन 

अर्कोतर्फ कपडा तस्करहरुले पनि तस्करीको लाइन पाएका छन् । कपडा तस्करीका लागि शत्रुधन यादव, जयलाल, शेखावत, मुन्ना शेख, अम्बेया, मीरा लगायतका व्यक्तिले तस्करीको लाइन पाएको बताइएको छ । उनीहरुले करोडौंको कपडा राजस्व छलि गरि इनर्वा गाउँको चोर बाटो हुँदै नेपाल भित्र्याउने गरेका छन् । इनर्वा गाउँ र बाँसघारीबाट दैनिक करोडौं मूल्य बराबरको शुटिङ, सर्टिङ, महंगा साडी गायतका कपडाहरु नेपाल भित्र्याउने गरिएको छ । कपडा तस्करको नामुद तस्कर मदन रुन्चे लगायतले पनि तस्करीको लाइन पाएको बताइएको छ ।

महानगर प्रमुख सिंहले हटाए रामजानकी मन्दिरको अतिक्रमण

0

वीरगंज । वीरगंज महानगरपालिकाको वडा नं.१० स्थित घडिअर्वा पोखरीको मूलद्वार सामुन्ने रहेको रामजानकी मन्दिरमा भएको अतिक्रमण हटाइएको छ ।

आफू मन्दिरको पुजारी हुँ भन्दै शम्भुनाथ तिवारीले महानगर विरुद्ध मन्दिर अतिक्रमण तथा तोडफोड गर्न नदिन माग गर्दै उच्च अदालत वीरगंजमा दिएको रिट अस्वीकार भएसँगै महानगरले कथित पुजारीले मन्दिर नै बन्धक बनाउने गरि निर्माण गरेको संरचना डोजर लगाएर हटाएको हो ।

गएको फागुन ४ गते पुजारीकै पक्षमा जारी भएको अन्तरिम आदेश खारेजीको माग गर्दै महानगरले अदालतमा निवेदन दिए पछि शुक्रबार न्यायाधीशद्वय शारङ्गा सुवेदी र शान्ता सेढाई सापकोटाको संयुक्त इजलासले महानगरकै पक्षमा आदेश दिएसँगै शनिबार अतिक्रमण हटाइएको हो ।

गएको तीन दसक भन्दा बढी समयदेखि मन्दिर प्रवेशमा रोक लगाएर अतिक्रमण गरि निर्माण गरिएको पक्कि संरचनामा कथित पुजारीले भाडा असुलि गर्दै आएका थिए ।

महानरपालिकाका प्रमुख राजेशमान सिंहले मठमन्दिर तथा सार्वजनिक, ऐलानी जग्गा खोजी अभियान नै चलाएर अहिले अतिक्रमण हटाउँदै आएका छन् ।मन्दिरकाे अतिक्रमण हटाउन महानगर प्रमुख सिंह आफैं डोजरसहित पगेका थिए ।

वि.सं.१९८२ देखि रामजानकी मन्दिरकै नाममा रहेको यो जग्गामा कथित पुजारी तिवारीले गएको तीन दसक भन्दा बढी समयदेखि मन्दिर नै बन्धक हुने गरी अतिक्रमण गरेर तीनै तर्फ पक्की संरचना बनाएर भाडा लगाएका थिए ।

अदालतले महानगरकै पक्षमा आदेश दिएसंगै अब सबै अतिक्रमित संरचना हटाएर मन्दिरलाई पुरानै संरचनामा फर्काएर दैनिक पुजापाठ हुने गरि संचालनमा ल्याउने महानगर प्रमुख सिंहले बताए ।

मन्दिरकाे अतिक्रमण हटे पछि स्थानीय खुशी, बाँडे लडु

वर्षौंदेखिको अतिक्रमण हटेसँगै स्थानीय खुशी भएर महानगर प्रमुख सिंहलाई धन्यवाद दिँदै लड्डु बाँडेका थिए । मन्दिरकाे अतिक्रमण हटाउन चलेपछि समाजिक संजालमा समेत धेरैले मेयर सिंहकाे कामकाे प्रशंसा गर्दै धन्यावाद  दिएका छन् ।

अतिक्रमण हटाउन महानगरका प्रमुख प्रशासकीय अधिकृत लक्ष्मीप्रसाद पौडेल, वडा न १० का वडाध्यक्ष सुशील कुमार कानु, नगर प्रमुखका प्रेस सल्लाहकार महेश दास, स्वकीय सचिव सत्यराज घिमिरे, जनसम्पर्क सल्लाहकार नवराज फुयाँल, प्रशासन प्रमुख राज ताम्राकार, सरसफाइ प्रमुख सर्फुदिन मियाँ समेतको टिम अतिक्रमित स्थान पुगेका थिए ।

उद्योग मन्त्री रिजालको स्वकीय सचिवमा श्रेष्ठ र यादव नियुक्त

0

वीरगंज । संघीय सरकारका उद्योग वाणिज्य तथा आपूर्तिमन्त्री रमेश रिजालको स्वकिय सचिवमा नेपाली कांग्रेसका नेता बृहस्पती कृष्ण श्रेष्ठ र युवा नेता राकेश यादव नियुक्त भएका छन् ।

पर्साकाे ठाेरी नगरपालिका निवासी श्रेष्ठ र बहुदरमाई नगरपालिकाका निवासी यादवलाई मन्त्री रिजालले स्वकीय सचिवमा नियुक्त गरेका हुन् । नेपाली कांग्रेस मधेश प्रदेशका महामन्त्री समेत श्रेष्ठ मन्त्री रिजालकाे प्रथम स्वकिय सचिवमा र नेवि संघका पूर्व जिल्ला सभापति समेत रहेका यादव स्वकिय सचिवमा नियुक्त भएका हुन् ।

श्रेष्ठ गत स्थानीय तहको निर्वाचनमा कांग्रेसका तर्फबाट गाँउपालिका अध्यक्षको प्रत्याशी थिए भने यादव ठाकुर राम बहुमुखी क्याम्पसका पूर्व स्ववियू सचिव हुन् । 

बारा २ मा आम जनता पार्टी जित्छ : अध्यक्ष साह

0

वीरगंज । आम आदमी पार्टीका केन्द्रिय अध्यक्ष प्रभु साहले भ्रष्ट अर्थ नीतिले मुलुक अफ्ठेरोमा पर्दै गएको बताएका छन ।

आम आदमी पार्टीद्वारा शुक्रबार जनकपुरमा आयोजित जिल्ला भेलालाई सम्बोधन गर्दै पूर्वमन्त्रीसमेत रहेका साहले लाचार र शोषित जनतालाई शासित होइन शासक बनाउनका लागि आम आदमी पार्टी गठन गरिएको बताए । 

वैशाख १० गते हुनलागेको उपनिर्वाचनमा बारा-२ मा आफ्नो पार्टीको उम्मेदवार विजयी हुने उनले दावी पनि गरे । उनले भने, “बारा जिल्ला एउटा ऐतिहासिक जिल्ला हो । यहाँका जनताले आम नागरिक, कृषक, मजदुर र गरिबको आवाज उठाउने आम जनता पार्टीका उम्मेदवारलाई जिताउँछन् ।”

कार्यक्रमलाई आम आदमी पार्टीका उपाध्यक्ष एवम् पूर्वमन्त्री बद्रि न्यौपाने,  उपमहासचिव एवम् पूर्व प्रदेश सभा सदस्य कुन्दन कुशवाह लगायतले सम्बोधन गरेका थिए । भेला पछि पार्टीले जनकपुरमा ७५ सदस्यीय कमिटी पनि गठन गरेको छ ।

वीरगंज झिलीमिली उज्यालो सहर बन्दै

0

वीरगंज । वीरगंज महानगरपालिकाका सडक झिलीमिली र उज्यालो देखिन थालेका छन् । महानगरपालिकाले उज्यालो वीरगंज बनाउने योजनाका साथ मुख्य सडक र गल्लीका पोल–पोलमा हाइमास तथा सेन्सर लाइट बत्ती जडान गरेपछि झिलीमिली उज्यालो बनेको हो ।

“केही महिनाअघिसम्म साँझ पर्नेबित्तिकै सडक अँध्यारो हुने र हिँड्डुल गर्नै नसक्ने स्थिति थियो”, वीरगञ्ज महानगरपालिका–६ मीनाबजारका विजय साहले भन्नुभयो, “तर अहिले रातिको समय जतिबेला पनि नगर क्षेत्रका सडक उज्यालो हुन्छ, यसका कारण हामी सुरक्षित महसुस गरिरहेका छौँ ।” महानगरपालिकाले पोल–पोलमा जडान गरेको बत्तीले आफूहरूको बस्ती नै उज्यालो बनेको उहाँको भनाइ थियो ।

‘‘पहिला–पहिला सडक छेउका अधिकांश पोलमा बत्ती थिएनन्”, वीरगञ्ज महानगरपालिका–११ का सन्तोष साहले भन्नुभयो, “जडान भएका बत्ती पनि कतिपय बल्ने स्थितिमा थिएन, जसले गर्दा यस क्षेत्रका सडकमा साँझ हिँडडुल गर्न समस्या भइरहेको थियो ।” अहिले निर्धक्क भएर २४सैँ घण्टा हिँड्दा पनि कुनै समस्या छैन, उहाँको कथन थियो ।

“विगतका वर्षहरूमा साँझ र रातिको समयमा सडक अँध्यारो हँुदा चोरी, लुटपाटजस्ता आपराधिक घटना हुने गरेको थियो”, साहले अगाडि थप्दै भन्नुभयो, “अहिले नगर क्षेत्रमा त्यस्ता आपराधिक घटनामा समेत ह्वात्तै कमी आएको छ, जसले गर्दा हामी सुरक्षित महसुस गरिरहेका छौँ ।” यसबाहेक पोल–पोलको बत्तीले नगर क्षेत्र नै झिलीमिली बनेको उहाँको भनाइ थियो ।

महानगरपालिकाले एकपछि अर्काे लोकप्रिय योजना ल्याएर कार्यान्वयन गर्ने गरेकाले छोटो समयमै वीरगञ्ज महानगरपालिकाले मुहार फेर्न लागेको स्थानीयहरू बताउँछन् । महानगरपालिकाले गत आर्थिक वर्ष २०७९÷८० देखि उज्यालो वीरगञ्ज अभियानअन्तर्गत सडक तथा गल्लीका पोल–पोलमा बत्ती जडानलाई तीव्रता दिएको वीरगञ्ज महानगरपालिकाका विद्युत् शाखाका प्रमुख इञ्जीनियर राजीवकुमार उपाध्यायले जानकारी दिनुभयो ।

त्यही योजनाअनुसार महानगरपालिकाको वडा नं १ देखि ३२ वटै वडाका सडक र गल्लीमा १३ हजार तीन सय २२ स्ट्रिटलाइट जडान गरिसकेको र बाँकीमा जडानकार्य भइरहेको इञ्जीनियर उपाध्यायले बताउनुभयो ।

“महानगर क्षेत्रमा उज्यालो वीरगञ्ज अभियान सुरु गरेका छौँ”, उहाँले भन्नुभयो, “त्यसै अभियानअन्तर्गत हामीले अहिलेसम्म मुख्य सडक तथा गल्लीमा ठूला–ठूला स्ट्रिटलाइट जडान गरेका छौँ, बाँकी सडकमा पनि बत्ती जडानको काम जारी छ, छिट्टै जडान सकिनेछ”, उहाँको भनाइ थियो ।

यसका साथै महानगरका मुख्य सडक तथा गल्लीमा सोलार बत्तीसमेत जडान गरिएको छ । विभिन्न निकाय तथा सङ्घसंस्थाको सहयोगमा महानगर क्षेत्रभित्र करिब सात सय सोलार बत्ती जडा नगरिएको महानगरपालिकाको विद्युत् शाखाका इञ्जीनियर अवधेशकुमार यादवले जानकारी दिनुभयो ।

विगतमा फोहर र कुरुप सहरको पहिचान बनाएको वीरगञ्ज महानगर क्षेत्रमा पछिल्लो समय भएको लोभलाग्दो विकासले यहाँका जनप्रतिनिधि मात्र होइन, स्थानीयसमेत उत्साहित बनेका छन् । जनप्रतिनिधि र कर्मचारीबीचको तालमेलका कारण छोटो समयमै नगर क्षेत्रमा थुप्रै परिवर्तन ल्याउन सफल भएको वीरगञ्ज महानगरपालिकाका प्रमुख राजेशमान सिंहले बताउनुभयो ।

“आफू निर्वाचित भएदेखि महानगरपालिकालाई सफा, सन्दर र हरियाली नमूना महानगर बनाउने लक्ष्यका साथ अघि बढाएको छु”, नगरप्रमुख सिंहले भन्नुभयो, “सडकका फोहर व्यवस्थापन, ट्राफिक व्यवस्थापन, मन्दिरको सौन्दर्यीकरण, अतिक्रमित जग्गा फिर्ता, फराकिलो बाटो निर्माणको कामलाई तीव्रता दिएका छौँ ।”

आर्थिक राजधानीकै रूपमा परिचिति वीरगञ्ज महानगरलाई पर्यटकीय नगरीका रूपमा समेत विकास गर्न यहाँका धार्मिक पर्यटकीय क्षेत्रहरूको जीर्णेद्धार तथा रङरोगनका कार्यलाई समेत प्राथमिकता दिएको महानगर प्रमुख सिंहको कथन छ । केही वर्षअघिसम्म अतिक्रमित र जीर्ण रहेको महानगरपालिका क्षेत्रको अधिकांश सडक यतिबेला कालोपत्र भएका छन् । रासस

वीरगंजबाट शुभारम्भ हुने हरवाचरवा अधिकार यात्राकाे तयारी पुरा

0

वीरगंज । मुक्त हरवाचरवाको न्यायिक पुनर्स्थापना हाम्रो सरोकार, भूमि, शिक्षा, स्वास्थ्य, रोजगारी र सामाजिक सुरक्षा हाम्रो अधिकार” भन्ने नाराकासाथ हुन लागेकाे विरगंजबाट जनकपुरसम्मको हरवाचरवा अधिकार यात्राकाे सम्पूर्ण तयारी पुरा भएकाे छ ।

आयाेजक संस्था राष्ट्रिय हरवाचरवा अधिकार मंचले शुक्रबार वीरगंजमा पत्रकार सम्मेलन गर्दै शनिबारदेखि सुरु हुने हरवाचरवा अधिकार यात्राकाे सम्पूर्ण तयारी पुरा भएकाे जानकारी गराएकाे हाे । 

नेपाली समाजमा विद्यमान दासप्रथाको एक मात्र अवशेषका रुपमा रहेको हरवाचरवा प्रथा मुक्ति घोषणा भएको ९ महिना वितिसक्दा समेत पुनर्स्थापना गर्न कुनै काम नभएको र स्वयं मुक्त हरवाचरवालाई मुक्तिको सन्देश मार्फत पुनःस्थापनाको लागि सम्बन्धित सरोकार वालाहरुको ध्यानाकर्षणका लागि यात्राकाे आयाेजना गरिएकाे राष्ट्रिय हरवाचरवा अधिकार मंचका उपाध्यक्ष श्रीप्रसाद सादाले वताए ।

वीरगंजस्थित जिल्ला प्रहरी कार्यालय अगाडी रहेकाे राताेबंगलाबाट शनिबार विहान ९ बजे निस्कने अधिकार यात्राकाे उद्घाट वीरगंज महानगरपालिकाका मेयर राजेशमान सिंहले गर्ने कार्यक्रम रहेकाे आरडिएनका मिडिया फाेकल पर्सन बृजलाल पासवाले वताए ।

शनिबार विहान वीरगंजबाट निस्कने यात्रा शनिबार विहान नै बहुदरमाई नगरपालिकामा १०:३० बजे पुगि काेण सभामा परिणत हुने छ । त्यस पछि अधिकार यात्रा शनिबार दिउसाे १ बजे बाराकाे जितपुरमा पुगि काेणा सभा गर्ने र त्यँही खाना खाएर कलैयामा पुगी शनिबार राति बास बस्ने छ ।

त्यसपछि आइतबार विहान पुन: कलैयाबाट निस्कने यात्रा बारा कै करैयामाई, काेल्भी हुँदै बलचनपुर पुग्ने छ । त्यहाँबाट निस्कने यात्रा गरुडा, गाैर, मलंगवा, ब्रहमपुरी, जलेश्वर हुँदै चैत २८ गते दिउसाे २ बजे जनकपुरमा पुगि सम्पन्न हुने छ ।

वीरगंजस्थित राणिसती धर्मशालामा भएकाे पत्रकार सम्मेलनमा राष्ट्रिय दलित नेटवर्कका काेषाध्यक्ष जंगबहादुर सुनार, कार्यकारी निर्देशक हुकुम सारकी, जनवकालत अधिकृत रुपनारायण पासवान, नेपाल पत्रकार महासंघ पर्साका उपाध्यक्ष युवराज खड्का लगायतकाे उपस्थिती रहेकाे थियाे ।

यसैगरी राजविराजबाट पनि शनिबार नै अधिकार यात्रा निस्कने छ । जुन यात्रा पनि चैत २८ नै जनकपुरमा पुगेर सम्पन्न हुनै छ । वीरगंज र राजविराजबाट एक साथ निस्कने यात्रामा १० हजार दलित समुदायका व्यक्तिहरु सहभागि हुने आयाेजकले जनाएकाे छ ।

प्रिस्कुलमा निःशुल्क दन्त शिविर सम्पन्न

0

वीरगंज । वीरगंजकाे पानीटंकीस्थित रहेकाे लिटल बड्डी इन्टरनेशनल प्रिस्कुलमा शुक्रबार निःशुल्क दन्त शिविर सम्पन्न भएको छ ।विद्यार्थीहरुको स्वास्थ्यलाई मध्यनजर गर्दै निःशुल्क स्वास्थ्य शिविर सम्पन्न भएको हो ।

शिविरमा ६० जनाको निःशुल्क दन्त परिक्षण गरिएको प्रिस्कुलका प्रमुख बिजय कुमार बलले बताए । स्माइल डेण्टल केअर एण्ड पॉलिक्लिनिकको सहकार्यमा लिटल बड्डी इन्टरनेशनल प्रिस्कुलद्वारा आयोजित शिविरमा विद्यार्थीहरुको दाँत जेकजाँच गरिएको उनले जानकारी दिए ।

शिविरमा डा. आमिर आलम, डा. किरण यादवले विद्यार्थीहरुको दाँत परीक्षण गरेका थिए । शिविरमा कमल चौलागाई, राहुल श्रीवास्तव, एंजिला क्षेत्री, प्रकाश कर्ण लगायतकाे उपस्थिति रहेको थियो ।

परवानीपुरमा वाईसिलएलको कमिटी गठन

0

परवानीपुर । बाराको परवानीपुर गाउँपालिका वडा नं ५ बहुअरी टोलमा बिहीबार वाईसिलएल नेपालको वडा कमिटी गठन भएको छ । सन्दिप पटेलको संयोजकत्वमा ११ सदस्यीय वडा कमिटी गठन भएको हो ।

जसको सह संयोजकमा सरवण कुमार सोनार, सचिवमा अजय कुमार पटेल, सह सचिवमा रवि कुमार पासवान, कोषाध्यक्षमा विजय कुमार कानु, सदस्यहरुमा प्रकाश पासवान, मुकेश पटेल, सलेन्द्र पटेल, सत्यप्रकाश पासवान, अवधेश पटेल, विशाल राम लगायतका चयन भएका छन् ।

नव गठित कमिटीलाई नेकपा माओवादी केन्द्रका नेता लालबहादुर पटेलले शुभकामना दिँदै कमिटीले नयाँ जोस र जाँगरको साथ काम गर्ने विश्वास व्यक्त गरे । उनले आउने दिनमा यस कमिटीले अझै युवाहरुलाई समेट्दै अगाडि बढ्नेमा आफूहरु विश्वस्त रहेको बताए ।

कार्यक्रममा वडा नं ५ का निर्वाचित वडा सदस्य दारा सिंह पटेलले शुभकामना दिँदै आफू यो कमिटीको हरेक कार्यक्रममा सहभागिता जनाउने र सक्दो सहयोग गर्ने प्रतिबद्धता जनाए ।

यसैगरी वाईसिलएल नेपालका बारा जिल्ला संयोजक शुभनारायण पटेलले शुभकामना दिँदै यो कमिटीको विकाशको लागि आफहरुको साथ र सहयोग निरन्तर रुममा रहने प्रतिबद्धता जनाए । उनले यो कमिटी कागजमा मात्र सीमित न राखेर यो वडामा नयाँ किसिमको कार्यक्रमहरु संचालन गर्न अनुरोध समेत गरे ।

कार्यक्रममा माओवादी केन्द्रका नेता अजय पटेल,रामेश्वर पटेल, सुनिल पटेल लागयतले शुभकामना मन्तव्य राखेका थिए ।