Date
मङ्ल, मंसिर १, २०८३
Tue, November 17, 2026
Home Blog Page 557

सखुवा प्रसाैनीमा जनप्रतिनिधिहरु विच विवाद

0

वीरगंज । पर्साकाे सखुवा प्रसौनी गाउँपालिकाकी उपाध्यक्ष शर्मिला बिष्टले आफ्नाे भागकाे याेजना समेत गाउँपालिका अध्यक्ष यसवन्त यादवले नै संचालन गरिरहेकाे आराेप लगाएकी छन् ।

उपाध्यक्ष बिष्टले बिहिबार पत्रकार सम्मेलन गर्दै गाउँपालिका अध्यक्ष यादवले एकलाैटी रुपमा गाउँपालिका चलाइरहेकाे वताइन । उनले नियम विपरित श्री नेरा मावि महुवनकाे प्रअ सरुवा, अनियमित रुपमा कर्मचारी भर्ना र अनावश्यक रुपमा इन्धन खर्च भएकाे समेत वताइन ।

उनले भनिन् “हामी पालिका अध्यक्ष र प्रमुख प्रशासकीय अधिकृतलाई पटक-पटक बैठक संचालन गर्न अनुरोध गर्दा बैठक संचालन नगरेकोले मिति २०७९। १२। २३ मा मेरै अध्यक्षतामा बैठक बसी सुधारको लागि बहुमत सदस्यले विभिन्न निर्णयहरु गरेकाे जानकारी गराइन । 

गाउँपालिका अध्यक्ष यादवले गाउँ सभाले पारित भएकाे याेजनाहरुकाे नियम अनुसार काम भइरहेकाे दाबी गरे । उनले भने “गाउँपालिकाकाे याेजनाहरु भाग लगाउने कहाँ नियम छ ? प्रशन गर्दै कसरी उपाध्यक्षकाे भागमा याेजनाहरु पर्याे ।”

गाउँपालिकामा निशुल्क रुपमा एम्बुलेन्स संचालन भएका कारण इन्धन खर्च अलि बढेकाे हुन सक्ने वताउँदै उनले कर्मचारी भर्ना नियम सम्बत भएकाे र त्यसकाे लागि कसैले पनि कसैसंग एक रुपयमा पनि नलिएकाे दाबी गरे ।  

जिल्ला समन्वय समितिमा भएकाे पत्रकार सम्मेलनमा वडाध्यक्ष माेजामिल अंसारी, महमद आरिफ अंसारी, असेशर प्रसाद यादव, मुन्ना प्रसाद कमकर, कार्यपालिका सदस्य हसीना खातुन, महादेव साह कालवार लगायतकाे उपस्थिती रहेकाे थियाे । 

वीरगंज महानरको प्रयासमा गुठी संस्थानको ९ विघा १३ कट्ठा जग्गाको सीमांकन छुट्याइयो

0

वीरगंज । वीरगंज आसपासमा अतिक्रमणमा परेको गुठी संस्थानको जग्गा खोज्ने अभियान आज पनि जारी रहेको छ ।
बुधबारदेखि सुरु भएको अभियान बिहीबार दोस्रो दिन पनि जारी रहेको हो । अभियान अन्तर्गत बिहीबार ९ विघा १३ कट्टा अतिक्रमणमा परेको जग्गा नापजाँच गरेर छुट्याइएको छ ।

वीरगंज महानगरपालिकासंगै जोडिएको पर्सागढी नगरपालिका वडा नम्वर ४ भेडाहा टोलमा ९ विघा १३ कट्ठा जग्गा नापजाँच गरेर सीमांकन गरिएको गुठी संस्थान कार्यालय पर्साका प्रमुख चुडामणी घिमिरेले जानकारी दिए । टोलीले बुधबार ११ विघा १३ कट्ठा नापजाँच गरेर सीमांकन गरेको थियो ।

बिहीबार सीमांकन गरिएको जग्गामा एउटा बस्ती नै बसेको छ । यहाँ झण्डै २ सय भन्दा बढी घर टहरा रहेको भेटिएको छ ।
जग्गा छुट्याउन जीपीएस, नक्सा तथा आवश्यक सामग्री सहित टोली फिल्डमा पुगेको थियो । संस्थानले आफ्नो जग्गा नापजाँच गरिदिन आग्रह गरेपछि वीरगञ्ज महानगरपालिकाले प्राविधिक टिम र आवश्यक जनशक्ति खटाएर जग्गा छुट्याउने काम गरेको हो ।

महानगरले अहिले सार्वजनिक तथा ऐलानी जग्गा खोजी अभियान नै चलाएको बेला गुठी संस्थानले पनि आफ्नो जग्गा खोजी गरिदिन आग्रह गरेपछि महानगरले वीरगंज र यस आसपास रहेका गुठीका जग्गा खोजी गरी सीमांकन गर्न सहयोग गरेको हो ।

वीरगंज महानगरपालिकाका प्रमुख राजेशमान सिंहले अहिले महानगरको ३२ वटै वडामा सार्वजनिक तथा ऐलानी जग्गाका साथै गुठीको जग्गा खोजी गर्ने अभियान चलाइएको बताउनुहुँदै कहीँकतै अतिक्रमण भएको सूचना भए आफूलाई जानकारी दिन आग्रह गरे ।

गुठीको जग्गा खोज्न संस्थानको पर्सा प्रमुख चुडामणी घिमिरे आफै फिल्डमा खटिएर नापजाँच गराइरहेका छन् । उनकै नेतृत्वमा गएको टोलीले २ दिनमा २१ विघा ६ कट्ठा जग्गामा सीमांकन सकेको हो । जग्गा खोज्ने अभियान निरन्तर जारी रहने प्रमुख घिमिरेले बताए ।

जग्गा नापजाँच गर्न गुठी संस्थान पर्साका प्रमुख घिमिरेसँग महानगरपालिकाका सचिवालय सल्लाहकार हरि पोखरेल, जनसम्पर्क सल्लाहकार नवराज फुयाँल, नगर प्रहरी प्रमुख हरि भुषाल, अमिन देवलाल प्रसाद, उमेस प्रसाद साह, नथुनी मण्डल, अनिल पंडित र सुरेन्द्र ठाकुरसहितको टोली खटिएको थियो ।

बैंककाे चर्काे व्याजकाे विरुद्धमा वीरगंजमा प्रदर्शन

0

वीरगंज । बैंक लघुवित, सहकारीकाे ज्यादति र चर्काे ब्याजदरविरुद्ध बिहिबार वीरगंजमा प्रदर्शन भएकाे छ । दुर्गा प्रसाईको राष्ट्र, राष्ट्रियता, धर्म संस्कृति र मानव बचाऊ अभियान कार्यक्रम अन्तर्गत ऋणी व्यपारीहरु प्रर्शन गरेका हुन् । 

स्थानीय चार्टर्ड एकाउन्टेन्ट अजय चौरसिया र राप्रपाका नेता नरेश साहको नेतृत्वमा घण्टाघरबाट निकालिएको विरोध ¥याली नगर परिक्रमा गरेकाे थियाे । व्यापारी जाेगाउ देश बचाउ, व्याज तिर्नेहरु सडकमा व्याज लिनेहरु महलमा, जे गर्छु नेपाल मै गर्छु, गरी खान देउ, ये सरकार हाम्राे मत के काे लागि थियाे ?, इज्जत लिने अधिकार बैंकलाई कसले दियाे ? लगायतकाे नारा लेखिएकाे प्याले कार्ड सहित स्थानिय व्यपारीहरु र्‍यालीमा सहभागि भएका थिए । 

बैंकको चर्काे ब्याजको शिकार भएर ९० प्रतिशत व्यापारीहरु लिलामीकाे लाइनमा रहेकाे वताए । उनले ऋण लिंदा ब्याजदर आठ प्रतिशत रहेको तर अहिले सोही ऋणको ब्याजदर बैंकले १६ प्रतिशतसम्म निर्धारण गरेर असुलउपर गरिरहेको कारण व्यापारीहरूलाई ठूलो मर्का परेको बताए ।

उनले व्यापारीहरू ऋणको साँवा–ब्याज तिर्न तयार रहेको तर चर्काे ब्याज मिनाहा हुनुपर्ने माग राखे । हामीले ऋण तिर्दैनौं भनेका छैनौं तर बैंकहरूले ऋण असुलीका नाममा व्यापारीको घरमा गार्डहरू तैनाथ गरेर मानसिक तनाव बढाएको र कतिपय व्यापारीहरूले आत्महत्या गरेको बताए ।

उनले भने “आजकाे स्थितीमा कुनै पनि व्यापार चलेकाे छैन्, व्यापार नचलेका कारण सबै व्यापारीहरु मर्कामा छन् तर बैंककाे व्याज माथि व्याजकाे कारण आत्महत्याकाे अवस्था सृजना भएकाे छ । चौरसियाले बैंकको ब्याजदर एक अङ्क अर्थात नौ प्रतिशतमुनि हुनुपर्ने तर्क गरे ।

राप्रपाका नेता नरेश साहले रु बीस लाखसम्मका ऋणीहरूको ऋण माफी गरिनुपर्ने बताए । उनले बैंकको व्याजदर ५ प्रतिशत कायम हुनु पर्ने वताए । उनले व्याज तिर्न वाकी रहेकाे व्यापारीलाई व्याज तिर्न समय दिनु पर्ने समेत वताए ।

सिर्सिया नदि प्रदूषित बनाउने उद्योगलाई कारवाही गर्न सांसद यादवको माग

0

वीरगंज । सिर्सिया नदिलाई प्रदूषित बनाउने उद्योगहरुलाई कारवाही गर्न सांसद प्रदीप यादवले सरकारलाई ध्यानाकर्षण गराएका छन् । प्रतिनिधि सभाको बिहिवार बसेको बैठकमा सहभागी हुँदै पर्सा क्षेत्र नम्बर १ बाट निर्वाचित प्रतिनिधि सभा सदस्य यादवले दर्जनौ गाउँका लाखौँ जनताको स्वास्थ्यमा खेलवाँड गर्ने उद्योगहरुलाई कारवाही गर्न उद्योग वाणिज्य तथा आपुर्ति मन्त्री रमेश रिजाललाई ध्यानाकर्षण गराएका हुन् ।

नेपाल सरकारका पूर्व वन तथा वातावरण मन्त्रीसमेत रहेका यादवले भने, ‘उद्योग मन्त्री पनि मेरै जिल्लाका हुनुहुन्छ, उहाँ पनि यो समस्याका बारेमा राम्रोसँग अवगत हुनुहुन्छ, त्यसैले उहाँकै कार्यकालमा उद्योगीहरुलाई कारवाही हुन्छ र सिर्सिया नदि प्रदूषण मुक्त हुन्छ भन्नेमा म विश्वस्त छु ।’

उद्योगको लापरवाहीले विषालु बनेको सिर्सिया नदिका कारण आसपासका लाखौँ जनता प्रत्यक्ष रुपमा प्रभावित हुँदा पनि सरकार मूकदर्शक बनेको आरोप लगाए । यादवले भने, ‘नदि छेउछाउको बाटो भएर हिँड्दा पनि नाकमुख थुन्नुपर्ने अवस्था छ, नदिको पानी खाने चौपाय बिरामी पर्नुका साथै मृत्युसमेत हुने गरेका छन् । तर पनि सरकार आँखामा पट्टी बाँधेर बसेको छ ।’

नदिका छेउछाउमा बसोबास गर्ने मानिसहरुमा छाला सम्बन्धी रोगहरु देखिने गरेकोमा उनले चिन्ता व्यक्त गरे । विभिन्न उद्योगहरुले प्रशोधन बिनाको रसायनयुक्त पानी, छाला, रौँ लगायतका प्रदूषित पानी नदिमा मिसाउँदा सिर्सिया नदि विषालु बनेको यादवको भनाई छ ।

त्यही प्रदूषित पानीमा खुट्टा डुबाएर छठ पूजा मनाउनुपर्ने बाध्यता रहेको बताउँदै उनले नदि प्रदूषित बनाउने उद्योगलाई कडाभन्दा कडा कारवाही गर्नुपर्ने माग गरेका छन् ।

मधेशमा सबै भन्दा बढी काम एमाले सरकारमा भएकाे छ : ओली

0

वीरगंज । पूर्व प्रधानमन्त्री एवम् नेकपा एमालेका अध्यक्ष केपी शर्मा ओलीले तराई-मधेशमा विकासको लहर ल्याउनुमा सबैभन्दा ठूलो योगदान एमालेको रहेको बताएका छन् ।

वीरगंजमा बुधबार अखिल नेपाल पिछडावर्ग (ओबीसी) महासंघले आयोजना गरेको प्रथम महाधिवेशनको उदघाटन समारोहमा बोल्दै अध्यक्ष ओलीले तराई-मधेशमा भएका ठूलो विकास निर्माणका काममध्ये अधिकतम एमाले नेतृत्व सरकारको पालामा भएको दावी गरे । 

यसअघि एमाले नेतृत्व सरकारको साढे तिन वर्षको कार्यालयमा तराई-मधेशलाई जोड्ने बहुप्रतिक्षित र राष्ट्रिय गौरबको योजना हुलाकी राजमार्ग निर्माण, मदन भण्डारी लोकमार्ग, प्रत्येक स्थानीय तहमा स्वास्थ्य संस्थाको सथापना जस्ता महत्वपूर्ण काम भएको बताए । 

उनले मधेश प्रदेशमा एमालेलाई निषेधित गर्ने नारा चलिरहँदा आफ्नो नेतृत्वको सरकारले प्रदेशमा १ लाख २२ हजार हेक्टर जग्गा सिंचित गर्ने ‘सुनकोशी–मरिन डाइभर्सन बहुउद्देश्यीय आयोजना’ ल्याएको बताए । एमाले नेतृत्वकै सरकारले ल्याएको ‘जनता आवास’ कार्यक्रमका कारण हजारौं दलित तथा गरिवहरुले आज पक्की घर पाएको उनले जिकिर गरे ।

वीरगञ्ज र जनकपुर जस्ता मधेशका ठूला र महत्वपूर्ण शहरमा ४ र ६ लेनको कालोपत्रे सडक पनि आफू प्रधानमन्त्री रहेको बेलानै निर्माण गरिएको बताए । उनले भने, ‘एमाले नेतृत्वको सरकार हुँदा जनातामा यो देशमा सरकार छ भन्ने अनुभूती थियो, तर अहिले त जनताले सरकार नै नभएको अनुभूती गरिरहेका छन् ।’

कार्यक्रममा एमालेका सचिव रघुवीर महासेठले हामीले सबै जातजातिलाई समेटेर जानुपर्ने बताए । उनले नेकपा एमालेको जनाधार हाम्रो पेशा वर्ग मात्रै होइन, यहाँ बस्ने सबै जातजाति जनाधारभित्र पर्छ, त्यसैले हामीले सबैलाई समेटेर हिँड्नुपर्छ भन्दै नेता महासेठले नयाँ नेतृत्व चयन गर्दा सबै दृष्टिकोणले बुझेर मात्रै नेतृत्व चयन गर्नुपर्ने सुझाव दिए ।

नेपाल पिछडावर्ग (ओ.बि.सि.) महासंघका अध्यक्ष ततेजप्रकाश निषादको सभापतित्वमा भएकाे उद्घाटन समारोहमा पूर्वमन्त्री एवम् एमालेकी नेतृ ज्वाला साह, पार्टीका संगठन विभाग प्रमुख भानुभक्त ढकाल, सचिव रचना खड्का, पार्टीका केन्द्रिय सदस्य एवम् प्रतिनिधि सभा सदस्य राजकुमार गुप्ता, प्रभु हाजरा, केन्द्रिय सदस्य अरविन्द सिंह, नेता जय पक्राश थारु, जालिम मियाँ, एमाले पर्साका संयोजक डा. विश्वम्भर शर्माल लगायतको उपस्थिति रहेको थियो ।

सिर्सिया नदि प्रदुषण गर्ने उद्योगलाई कडा कारवाही गर्ने मेयर सिंहको चेतावनी

0

वीरगंज । पटकपटकको निर्देशनलाई पनि अवज्ञा गर्दै वीरगंजका केही उद्योगहरुले प्रशोधन बिना नै प्रदुषित पानी सिर्सिया नदिमा मिसाइरहेको पाइएको छ । वीरगंज महानगरपालिकाकाे वडा नम्बर २१ परवानीपुरस्थित श्री सिद्धी टेक्सटायल्स प्रा.ली., अर्निका प्रोसेसिङ् उद्योग प्रा.ली., पन्ना पेपर उद्योग प्रा.ली. ग्लोबल लेदर उद्योग प्रालि, मोरियम लेदर उद्योग प्रालि लगायतले प्रशोधन नै नगरी प्रदुषित पानी नदिमा मिसाउने गरेको पाइएको हो ।

वीरगंज महानगरपालिकाका प्रमुख राजेशमान सिंहको नेतृत्वमा बुधवार अनुगमन टोली पुग्दा पनि उद्योगहरुले प्रदुषित पानी प्रशोधन बिना नदिमा मिसाएको पाइएको हो । यसअघि उपप्रमुख इम्तियाज आलमको नेतृत्वमा पटकपटक अनुगमन गर्नुका साथै महानगरले प्रशोधन गरेर मात्रै नदिमा मिसाउन पत्राचार गर्दासमेत उद्योगहरुले बेवास्ता गरेको महानगर प्रमुख सिंहले बताए ।

उनले भने, ‘महानगरले जसरी पनि सिर्सिया नदिलाई प्रदुषण मुक्त बनाएरै छाड्छ, अहिले प्रदुषित गराउने उद्योगहरुलाई कानुनी कारवाहीको दायरामा ल्याउनुका साथै कडा रुपमा उत्रिनेमा हामी पछाडी हट्ने छैनौँ ।’

पटकपटक आग्रह गर्दा पनि अटेर गर्नुका साथै पत्राचारलाई पनि उद्योगहरुले बेवास्ता गरेको महानगर प्रमुख सिंहको भनाई छ ।

उनले भने, ‘उद्योगहरुले पूर्ण रुपमा बदमाशी गरिरहेका छन्, यो कुनै पनि हालतमा सह्य हुँदैन । प्रायः उद्योगले अनुगमन गर्न आउँदा देखाउनका लागि मात्रै प्रशोधन केन्द्र बनाएका छन् । तर प्रशोधन नै नगरी दुषित पानी नदिमा मिसाएर जनताको स्वास्थ्यसँग खेलवाँड गरीरहेका छन् ।’

कुनै पनि उद्योग सञ्चालन गर्दा वातावरण संरक्षणलाई प्राथमिकता दिनुपर्नेमा यस क्षेत्रका अधिकांश उद्योगले बेवास्ता गरेको सहायक प्रमुख जिल्ला अधिकारी भिमकान्त पौडेलको बुझाई छ । पौडेल भन्छन्, ‘उद्योगहरुको लापरवाही स्पष्ट देखिन्छ, व्यवस्थित तरिकाले प्रशोधन गरेर नदिमा सफा पानी फाल्ने वातावरण बनाउनुपर्छ । तर यहाँ ठीक बिपरित देखियो । नामका लागि मात्रै प्रशोधन केन्द्र बनाए पनि प्रदुषित पानी नै नदिमा मिसाउनु सरासर गलत हो ।’

अनुगमनका क्रममा  नदी तटमा रहेका उद्योगहरुले त्यहाँबाट निस्कने फोहोर (रसायनयुक्त फोहोर पानी, छालाको लेदो, कोइलाको छाई लगायतका वस्तु) सिधै नदिमा फाल्दै आएको भेटिएको छ । सिद्धि टेक्सटायल्स उद्योगको प्रदुषित पानी मिसिनुभन्दा माथि सिर्सिया नदिको पानी सफा देख्न सकिन्छ । सिद्धि टेक्सटायल्स उद्योग नै सिर्सिया नदिलाई प्रदुषण बनाउने पहिलो उद्योग हो । त्यसपछि अरु उद्योगको प्रदुषित पानीले नदि प्रदुषण हुँदै आएको छ ।

महानगरका प्रमुख प्रशासकीय अधिकृत लक्ष्मी प्रसाद पौडेल भन्छन्, ‘सिर्सिया नदि वीरगञ्ज शहरकै लाइफलाइन हो, त्यसका कारण यो नदिलाई प्रदुषित बनाउने जोसुकै भए पनि महानगरले कारबाही गर्छ, नदिलाई प्रदुषणमुक्त बनाउने अभियान अब कुनै पनि हालतमा रोकिदैन ।’

अनुगमनलाई निरन्तरता दिनुका साथै नदिलाई प्रदुषित बनाउने अन्य उद्योग र निकायलाई पनि कडा कारबाही गरिने पौडेलको भनाई छ ।

सिर्सिया नदिलाई प्रदुषण मुक्त बनाउने अभियानमा वीरगञ्ज उद्योग वाणिज्य संघले हातेमालो गरीरहेको छ । नदिलाई सफा बनाउने विषयमा संघ पनि गम्भिर रहेको बताउँदै अध्यक्ष अनिल कुमार अग्रवालले यसको दीर्घकालिन समाधानको बाटो खोज्नुपर्ने आवश्यक्ता औँल्याए ।

अग्रवालले भने, ‘नदिलाई सफा बनाउनु हामी सबैको सरोकारको विषय हो, अहिले तत्कालका लागि मात्रै नभएर दीर्घकालिन रुपमै समस्याको समाधानका लागि सबैले हातेमालो गर्न आवश्यक छ ।’

यसअघि महानगरले नदि प्रदुषण गर्ने ५ वटा उद्योगलाई ३ लाख रुपैयाँका दरले जरिवाना पनि गरेको थियो । ग्लोबल लेदर उद्योग प्रालि, अर्निका प्रोसेसिङ उद्योग प्रालि, श्रीसिद्धी टेक्सटायल्स प्रालि, मोरियम लेदर उद्योग प्रालि र वडा नम्बर ३२ मा अवस्थित दुर्गा पुल्प एण्ड पेपर प्रालिलाई ३/३ लाखका दरले जरीवाना गरेको हो ।

करिब तीन दशकदेखि प्रदुषणको चपेटामा परेको वीरगञ्ज शहरको लाइफलाइनकै रुपमा रहेको सिर्सिया नदिलाई प्रदुषणमुक्त बनाउन महानगरपालिकाले दुई महिना यता अभियान नै सञ्चालन गरेको छ ।

प्रमुख सिंहसहित प्रमुख प्रशासकिय अधिकृत लक्ष्मी प्रसाद पौडेल, सहायक प्रमुख जिल्ला अधिकारी भिमकान्त पौडेल, जिल्ला प्रहरी कार्यालय पर्साकी प्रहरी निरीक्षक मनिषा लौडारी लगायतको अनुगमन टोलीले बुधवार परवानीपुरका ५ वटा उद्योगको अनुगमन गरेको हो ।

मठ मन्दिरकाे संरक्षणका लागि महन्तहरु भेटे प्रधानमन्त्री

0

वीरगंज । जनकपुरधामकाे जानकी मन्दिरका महन्तहरुकाे एक टाेलीले प्रधानमन्त्री पुष्पकमल दाहाल (प्रचण्ड) संग भेटघाट गरेका छन् । प्रधानमन्त्री प्रचण्ड कै कार्यकक्ष मै पुगि जानकी मन्दिरका उत्तराधिकारी महन्त रामरोशन दास लगायत विभिन्न मन्दिरका पुजारी सन्तहरु भेटघाट गरेका हुन् ।

मधेश प्रदेशका उद्याेग, पर्यटन तथा वन राज्यमन्त्री रहबर अन्सारीकाे उपस्थितीमा भएकाे भेटघा‍टमा जानकी मन्दिर लगायत देशका विभिन्न स्थानहरुमा रहेका मठ मन्दिरसंग जोडिएका विविध पक्षका र तिनका संरक्षण तथा संबर्धनका विषयमा छलफल भएको हाे ।

छलफलकाे क्रममा संतहरुले उठाउनुभएका विषयहरुप्रति प्रधानमनन्त्री ज्यूले गहिरो चासो लिॅंदै तथ्यपरक र वैज्ञानिक ढंगले हरेक आवश्यक पहलकदमी आफ्नो तर्फबाट हुने आश्वासन दिनुभएकाे राज्यमन्त्री अन्सारीले वताए ।

साथै धर्म संग जोडिएका विषयहरुलाई परम्परागत रूपले मात्र नभई समय सांदर्भिक रही मानवोचित कार्यहरुको सामाजिकीकरण गर्दै अघि बढ्दा समाज र राष्ट्रले अझ मजबूती पाउने कुरा वहाँले हामी समक्ष राख्नूभएकाे मन्त्री अन्सारीले जानकारी गराए ।

भेटघाटकाे क्रममा महन्त तथा सन्तहरुले प्रधानमन्त्री प्रचण्डलाई मायाकाे चिन्हाे रुपमा जानकारी मन्दिरकाे तस्बिर समेत दिएका थिए ।

सिम्रौनगढका तत्कालीन प्रमुख प्रशासकीय अधिकृतसहित ३ जनाविरुद्ध भ्रष्टाचार मुद्दा

0

वीरगंज । बाराकाे सिम्रौनगढ नगरपालिकाका तत्कालीन प्रमुख प्रशासकीय अधिकृत विश्वराज मरासेनी, लेखा अधिकृत सर्मेन्द्र प्रसाद चौधरी र जिन्सी शाखा प्रमुख सुरेश प्रसाद यादव उपर गैरकानूनी लाभ तथा हानी पुर्‍याई भ्रष्टाचार गरेको सम्बन्धी आरोप पत्र दायर भएकाे छ ।

सिम्रौनगढ नगरपालिकाले अनावश्यक रुपमा सफ्टवेयर खरिद गरी भ्रष्टाचार गरेको भन्ने उजुरी निवेदन सम्बन्धमा अनुसन्धान हुँदा सिम्रौनगढ नगरपालिकाको आ.व. २०७६।०७७ मा जिन्सी व्यवस्थापनको केन्द्रीय प्रणालीसमेतको सफ्टवेयर खरिद तथा जडान/विस्तार गर्ने कार्यको लागि सफ्टवेयर खरिद गरी प्रयोग नै नगरी सरकारी सम्पत्ति बदनियत पूर्वक हानिनोक्सानी गरेको एवं गराएको देखिंदा निजहरु उपर आराेप पत्र दायर गरिकाे अख्तियार दुरुपयाेग अनुसन्धान आयाेगले जनाएकाे छ ।

नगरपालिकाका तत्कालीन प्रमुख प्रशासकीय अधिकृत मरासेनी, लेखा अधिकृत चौधरी र जिन्सी शाखा प्रमुख यादवले टिप्पणी पेश तथा सप्टवेयर खरिद कार्यको स्वीकृत गरी रु. एक लाख ९९ हजार ८९७ भुक्तानी गरी सफ्टवेयर खरिद गरेको र सो सफ्टवेयर खरिद गरी प्रयोग नै नगरी सरकारी सम्पत्ति बदनियतपूर्वक हानिनोक्सानी गरेको एवं गराएको देखिंदा तीनै जना विरुद्ध बुधबार आराेप पत्र दायर गरिएकाे आयाेगका प्रवक्ता भाेला दाहालले जानकारी दिए ।

तीनै जनालाई भ्रष्टाचार निवारण ऐन, २०५९ को दफा ८ को उपदफा (३) बमोजिमको कसुरमा बिगो रु एक लाख ९९ हजार ८९७ कायम गरी भ्रष्टाचार निवारण ऐन, २०५९ को दफा ८ को उपदफा (३) बमोजिम सजायको मागदाबी लिई अख्तियार दुरुपयोग अनुसन्धान आयोग ऐन, २०४८ को दफा १८ र दफा ३५ तथा भ्रष्टाचार निवारण ऐन, २०५९ को दफा ३६ बमोजिम विषेश अदालत, काठमाडौंमा आरोपपत्र दायर गरिएको प्रवक्ता दहालद्वारा जारी विज्ञप्तीमा उल्लेख गरिएकाे छ ।

यातायातबाट पक्राउ परेकाहरु विरुद्ध अभद्र व्यवहारको मुद्दा

0

वीरगंज । सेवाग्राहीलाई दुख दिएको आरोपमा नारायणी यातायात व्यावस्था कार्यालय वीरगंजबाट पक्राउ परेका ११ जना विरुद्ध मुद्दा दर्ता भएको छ । नारायणी यातायात कार्यालयमा सेवाग्राहीलाई दुख दिएर हैरानी गर्ने ११ जनालाई जिल्ला प्रहरी कार्यालय पर्साले मंगलबार पक्राउ गरेको थियो ।

पक्राउ पर्नेमा वीरगंज महानगरपालिका रानीघाटका आलोककुमार यादव, किशोर कुमार दयाल, दिपलाल साह, रामबाबु झा, कोरंजित गुप्ता, लालबाबु महतो, राजेश लामा, कालिकामाई गाउँपालिकाका राजेश महतो, बाराको परवानीपुरका दरोगा दास, बाराकै प्रसौनी गाउँपालिकाका मुकेश साह र दिपु महतो तत्मा रहेको जिल्ला प्रहरी कार्यालय पर्साका प्रवक्ता प्रहरी नायव उपरीक्षक निर्मल बुढाथाकीले जानकारी दिए ।

सेवाग्राहीलाई काम छिटो छरितो गरिदिन्छु भनेर बार्गेनिङ गर्ने, कार्यालय परिसरभित्र फाइल लिएर भित्र–बाहिर गर्ने, प्रचलित कानुन विपरीत अत्यधिक सेवा शुल्क लिने तथा सेवाग्राहीलाई अनावश्यक हैरानी दिने गरेको गुनासोका आधारमा अनुगमन गर्दा मंगलबार उनीहरू पक्राउ परेका हुन् ।

पक्राउ परेकाविरुद्ध सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसुरमा जिल्ला प्रशासन कार्यालय पर्साबाट सात दिनको म्याद थप गरी अनुसन्धान भइरहेको प्रहरी नायव उपरीक्षक बुढाथोकीले बताए । 

आचारसंहिता पालना गर्न काउन्सिलको आग्रह

0

जनकपुरधाम । मिडिया काउन्सिल (मधेस प्रदेश) ले बारा निर्वाचन क्षेत्र नं २ मा आगामी वैशाख १० गते हुने प्रतिनिधिसभा सदस्यको उपनिर्वाचनको सन्दर्भमा पत्रकार आचारसंहिताको परिपालना गर्न पत्रकार एवं सञ्चारमाध्यमलाई आग्रह गरेको छ ।

काउन्सिलले आज एक विज्ञप्ति जारी गरी उपनिर्वाचनलाई स्वतन्त्र र निष्पक्ष बनाउन सञ्चारकर्मी एवं सञ्चारमाध्मको महत्त्वपूर्ण भूमिका रहेको भन्दै कुनै पनि दल तथा उम्मेदवारको पक्ष विपक्षमा समाचार प्रकाशन तथा प्रसारण नगर्न आग्रह गरेको हो । त्यसैगरी सामाजिक सञ्जाल प्रयोगकर्तालाई पनि सचेत रहन आग्रह गरेको छ ।

“कुनै पनि दल तथा उम्मेदवारलाई होच्याएर वा गुणगान गाएर पक्ष वा विपक्षमा समाचार प्रकाशन तथा प्रसारण नगर्न काउन्सिल सबैमा आग्रह गर्दछ”, काउन्सिलका निमित्त प्रशासकीय प्रमुख मुनेश्वर यादवद्वारा जारी विज्ञप्तिमा भनिएको छ, “यस्तै सामाजिक सञ्जालमार्फत यो वा त्यो दल वा दलका उम्मेदवारको प्रचारप्रसारलाई अतिरञ्जना नगर्न नगराउन हुन सञ्चारमाध्यम, पत्रकार र सामाजिक सञ्जाल प्रयोगकर्तालाई काउन्सिल अपिल गर्दछ ।”

काउन्सिलले उपनिर्वाचनलाई मध्यनजर गरी पत्रकार आचारसंहिता अनुगमन कार्य सुरु गरेको र कुनै पनि माध्यमबाट पत्रकार आचारसंहिता र निर्वाचन आचारसंहिता उल्लङ्घन गरेको पाइएमा जानकारी गराउन हुनसमेत अनुरोध गरेको छ ।

यसैबीच काउन्सिलका कार्यवाहक अध्यक्ष कैलाश दासले पत्रकार तथा सञ्चारमाध्यम आचारसंहिता मधेस प्रदेश, २०७९ को व्यवस्थालाई पालना गर्न सबैलाई आग्रह गर्नुभएको छ । उहाँले उपनिर्वाचनको अनुगमन कार्य भइरहेकाले स्वच्छ, निष्पक्ष र भयरहित वातावरणमा हुने निर्वाचनलाई प्रभावित गर्ने गरी कुनै क्रियाकलाप गरेको पाइए कानूनअनुसार कारबाही हुनेसमेत बताउनुभयो ।

यसअघि बारा निर्वाचन क्षेत्र नं २ बाट निर्वाचित रामसहायप्रसाद यादव उपराष्ट्रपति निर्वाचित भएपछि सो क्षेत्रमा आगामी वैशाख १० गते उपनिर्वाचन हुँदैछ । रासस