Date
सोम, कार्तिक ३०, २०८३
Mon, November 16, 2026
Home Blog Page 545

कानु समाज पर्साको अधिवेशन जेठ १५ गते पोखरियामा हुने

0

वीरगंज । कानु समाज नेपाल पर्साको जिल्ला अधिवेशन आगामी जेठ १५ गते हुने भएको छ । जेठ १५ गते जिल्ला अधिवेशन पोखरीयामा गर्ने निर्णय गरिएको कानु समाज पोखरिया नगर कार्यसमितिका कोषाध्यक्ष शैलेश साह कानुले जानकारी दिए ।

सोमबार पोखरीयामा बसेको कानु समाजको जिल्ला र नगरकार्य समितिको बैठकले जेठ १५ गते पोखरिया ४ मा जिल्ला अधिवेशन गर्ने निर्णय गरेको उनले बताए । कानु समाज पर्साका अध्यक्ष रामबाबु साह कानुको अध्यक्षतामा बसेको बैठकले जिल्ला अधिवेशनका लागि जिल्लाका १४ वटै पालिकाका हरेक वडामा विभिन्न माध्यमबाट जिल्ला अधिवेशनका बारेमा जानकारी गराउन प्रचार प्रसार गर्ने निर्णय पनि गरेको कानुले जानकारी दिए ।

सोमबारको बैठकमा जिल्ला उपाध्यक्ष प्रवेन्द्र साह कानु, सचिव वीरेन्द्र साह कानु, कोषाध्यक्ष शीवनाथ साह कानु, पोखरिया नगर कार्य समितिका अध्यक्ष लक्ष्मण साह कानु, सचिव मुखी साह कानु, कोषाध्यक्ष शैलेश साह कानु लगायतको पनि सहभागीता थियो ।

कानुन र जनप्रशासन सङ्काय पढाउने तयारीमा मधेस विश्वविद्यालय

0

वीरगञ्ज । मधेस विश्वविद्यालयले चालु शैक्षिक सत्रबाट कानुन र समान्य जनप्रशासन सङ्कायको कक्षा सञ्चालन गर्ने तयारी गरेको छ ।

स्थापनाकालदेखि नै भौतिक पूर्वाधार र जनशक्तिको आभाव खेप्दै आएकोे मधेस विश्वविद्यालयले चालु शैक्षिक सत्रदेखि बिएएलएलबी र समान्य जनप्रशासन सङ्कायको कक्षा सञ्चालन गर्ने अन्तिम तयारी जुटेको छ ।

त्यसका लागि प्रारम्भिक कार्य पूरा गरी विश्वविद्यालयद्वारा गठित पाठ्यक्रम विकास समिति र काठमाडौँ विश्वविद्यालयको विज्ञ टोलीले पाठ्यक्रम निर्माण गरिरहेको उपकुलपति दीपक शाक्यले जानकारी दिनुभयो ।

‘‘यही शैक्षिक सत्रबाट कानुन र समान्य जनप्रशासन गरी दुई वटा सङ्कायको कक्षा सञ्चालन गर्ने तयारीमा छौँ”, उपकुलपति शाक्यले भन्नुभयो, “त्यसका लागि हामी पाठ्यक्रम निर्माणदेखि आवश्यक पूर्वाधार निर्माणको कार्यमा जुटेका छौँ ।”

तत्काल संरचना निर्माण भइनसकेकाले काठमाडौँ विश्वविद्यालयको समन्वयमा दुवै सङ्कायको पठनपाठन सुरु गर्ने तयारीमा रहेको उहाँको भनाइ छ ।

गत २०७९ वैशाख १४ गते मधेस प्रदेशसभाद्वारा मधेस विश्वविद्यालय ऐन २०७९ जारी भई २०७९ साल भदौ २२ गते स्थापना भएको सो विश्वविद्यालयले वीरगञ्जस्थित नेशनल ट्रेडिङको भवन भाडामा लिई कार्यालय सञ्चालन गर्दै आएको छ ।

पोलिटेक्निक, आइटि, व्यवस्थापन, पारामेडिकल, कृषि इञ्जिनियरिङ लगायतका प्राविधिक शिक्षाको माध्यमबाट मधेस प्रदेशलाई प्राविधिक शिक्षा हवको रुपमा विकास गर्ने उद्देश्यका साथ अघि बढ्ेको विश्वविद्यालयले जग्गा प्राप्तिसँगै आवश्यक भौतिक संरचनाका लागि डिपीआर तयारीमा जुटेको छ ।

“विश्वविद्यालय सञ्चालन गर्न जग्गा चाहिन्छ, त्यसका लागि लामो समयको प्रयास पश्चात पर्साको केही ठाउँमा जग्गा प्राप्त भएको छ”, उपकुलपति शाक्यले भन्नुभयो, “स्थानीय तहका जनप्रतिनिधि तथा स्थानीयको सहयोगमा प्राप्त भएका ऐलानी र गुठी संस्थानको जग्गाको स्वामित्व विश्वविद्यालयमा ल्याउने प्रक्रियामा लागेका छौंँ ।”

जग्गाको स्वामित्व विश्वविद्यालयमा हस्तान्तरण नहुदाँसम्म डिपीआर बनाउन सकिदैन्, डिपीआर नबनाइ भौतिक संरचना बन्न सक्दैन् त्यसलै जग्गाको स्वामित्व छिट्टो भन्दा छिट्टो हस्तान्तरणको प्रयासमा जुटेको उपकुलपति शाक्यको भनाइ छ ।

मधेस विश्वविद्यालयले पर्साको बहुदरमाई नगरपालिका– २ मा ३५ बिघा र पोखरिया नगरपालिकामा– १६ बिघा ऐलानी जग्गा र पर्साको पकाहाँ मैनपुर गाउँपालिकास्थित सुरजाहा कट्टीमठ्ठ (राधाकृष्ण मन्दिर) को २७ बिघा जग्गा प्राप्त गरेका छन् ।

बहुदरमाई नगरपालिका २ मा प्राप्त भएको जग्गालाई सिमाङ्कन गरी पिलर जडान गरिएको भने पोखरिया नगरपालिकाको १६ बिघा जग्गाको स्वामित्व मधेस विश्वविद्यालयमा हस्तान्तरणका लागि वडा कार्यालयबाट सिफारिस भई अन्य प्रक्रियामा छ । स्वामित्व हस्तान्तरणको क्रममा रहेको बहुदरमाईको जग्गामा आवश्यक भौतिक पूर्वाधार संरचना निर्माण गर्न डिपिआर तयार पार्ने काम सुरु भइसकेको विश्वविद्यालयका रजिष्ट्रार विजयकुमार यादवले जानकारी दिनुभयो ।

त्यहाँ पोलिटेक्निक, आइटी र व्यवस्थापन सङ्कायको कक्षा सञ्चालन गर्ने योजना छ । उहाँका अनुसार विश्वविद्यालयले पोखरिय नगरपालिकामा अहेब, अनमी, स्टाफ नर्सलगायत पारामेडिकल सङ्कायको कक्षा र पकहा मैनपुर गाउँपालिकामा इञ्जिनिरिङ तथा एग्रो म्यानेजमेन्ट सङ्कायको कक्षा सञ्चालन गर्ने योजनामा छ ।

विश्वविद्यालयले वीरगञ्ज महानगरपालिका १७ र १८ मा रहेको १७ बिघा जग्गामा केन्द्रीय कार्यालय बनाउने योजनामा रहेको रजिष्ट्रार यादवले बताउनुभयो । मधेस प्रदेश सरकारको नीति तथा कार्यक्रममा मधेस विश्वविद्यालयका लागि रु १० करोड अनुदान रकम छुट्ट्याएको छ ।

मधेस विश्वविद्यालयले विश्वविद्यालय सङ्गठन, शैक्षिक र प्रशासन नियमावली २०७९, शिक्षा, कर्मचारी सेवा नियमावली २०७९, आर्थिक प्रशासन नियमावली २०७९ बनाइ पारित गरिसकेको छ ।

विश्वविद्यालयले डिपीआर तयार भएपछि भौतिक संरचना निर्माणका लागि विभिन्न दूतावास, राष्ट्रिय योजना आयोग, मन्त्रालय तथा दाताबाट रु दुई सय ५० करोड चन्दा सङ्कलन गरी निर्माण गरिने लक्ष्य लिएको रजिष्ट्रार यादवले बताउनुभयो ।

आवश्यकता र औचित्यका आधारमा आवश्यक जनशक्ति भर्ना गर्न सकिने अधिकार पाएको मधेस विश्वविद्यालयमा हाल उपकुलपति, राजिष्ट्रार बाहेक तीन जना प्रशासनतर्फका र चारजना कार्यालय सहयोगी कार्यरत छन् ।

विश्वविद्यालयको कुलपति मधेश प्रदेशका मुख्यमन्त्री रहने व्यवस्था छ । प्रदेशसभा सदस्य रामआशीष यादवले भन्नुभयो, “जुन उद्देश्यका साथ प्रदेश सरकारले विश्वविद्यालयको स्थापना गरेको छ, त्यहीअनुसार नै विश्वविद्यालयले काम अघि बढाएको पाउँदा खुसी लागेको छ ।” रासस

स्थानीय विवाद समाधान गर्न प्रभावकारी बन्दै न्यायिक समिति

0
वीरगंज महानगरकाे न्यायिक समितिका संयाेजक इम्तियाज आलम । तस्बिर : कालिका टाईम्स

वीरगंज । वीरगञ्ज महानगरपालिकामा गठन भएको न्यायिक समिति प्रभावकारी बन्दै गएको छ । उपप्रमुख वा उपाध्यक्षको संयोजकत्वमा गठित उक्त समितिलाई सम्बन्ध सानातिना विवाद मेलमिलापबाटै समाधान गर्न स्थानीय सरकार सञ्चालन ऐन २०७४ को दफा ४६ मा न्यायिक समितिको व्यवस्था छ ।

महानगरपालिकाका उपप्रमुख इम्तियाज आलमको संयोजकत्वमा गठित समितिले सानातिना विवाद मेलमिलापबाटै समाधान गर्न थालेपछि ससाना मुद्दामा अदालत नै धाउनुपर्ने बाध्यता अन्त्य भएको हो ।

न्यायिक समितिमा धेरैजसो उजुरी जग्गा विवाद, घर निर्माणमा खिचोला, लेनदेन, बालीनाली नोक्सानी आउने गरेका न्यायिक समितिका अधिवक्ता धनबहादुर थापाले जानकारी दिनुभयो ।

समितिमा आउने उजुरीलाई स्थानीय जनप्रतिनिधिकै सक्रियतामा सम्बन्धित पक्षबीच मेलमिलाप गराउने काम भइरहेको उहाँले बताउनुभयो ।

चालू आव २०७९÷८० मा नयाँ र पुरानो गरी २६ वटा मुद्दा फछ्र्योट गरिएको अधिवक्ता थापाको भनाइ थियो ।

समितिमा आव २०७४÷७५ देखि हालसम्म तीन सय २४ उजुरी दर्ता भएकामा दुई सय ४८ उजुरीको छिनोफानो भइसकेको र बाँकी ७६ वटा विवाद छलफलको क्रममा रहेको छ ।

“अहिले हाम्रो न्यायिक समितिमा धेरै प्रकारका उजुरी आउने गरेको छ”, न्यायिक समितिका संयोजक इम्तियाज आलमले भन्नुभयो, “तीमध्ये हामीलाई कानुनले तोकिदिएको सूचीका आधारमा उजुरी लिने गरेका छौँ ।”

ऐनमा उल्लेख भएका यस्ता मुद्दा जनप्रतिनिधिले हेर्दा उचित हुन्छ भनेर पालिकामा न्यायिक समितिको व्यवस्था गरिएको अधिवक्ता प्रमोद चौधरीले बताउनुभयो ।

न्यायिक समितिले इजलाशसँगै मेलमिलाप कक्षसमेत निर्माण गरेको छ । “एकै ठाउँमा बस्ने व्यक्ति व्यक्तिबीच विभिन्न कारणले विवाद उत्पन्न हुन्छ”, न्यायिक समितिका सदस्य वैजुलाल स्वर्णकारले भन्नुभयो, “त्यसलाई हामीले मेलमिलापका माध्यमबाट समाधान गर्दा समाजमा पुनः एकआपसमा मिलेर बस्ने वातावरण निर्माण हुन्छ । त्यही वातावरण बनाउन न्यायिक समितिले आफ्नो भूमिका निर्वाह आएको छ ।”

न्यायिक समितिको प्रभावकारिता बढेसँगै सानो विवादमा पनि अदालत नै जाने प्रवृत्तिमा विस्तारै कमी आउन थालेको वडा नं ६ निवासी बलिराम साहले बताउनुभयो ।

“पहिला सानोतिनो विवाद पनि प्रहरी वा अदालत नै पुग्थ्यो”, उहाँले भन्नुभयो, “तर न्यायिक समिति सक्रिय भएर विवाद समाधान गर्न थालेपछि समान्य विवादमा अदालतसम्म धाउनुपर्ने बाध्यता अन्त्य भएको छ ।” रासस

होल्डीङ सेन्टरको सांसद यादव र मेयर सिंहद्वारा अनुगमन

0

वीरगंज । प्रयोगबिहिन होल्डीङ सेन्टरलाई प्रयोगमा ल्याउनुपर्ने पर्सा क्षेत्र नम्बर १ का प्रतिनिधिसभा सदस्य प्रदीप यादवले बताएका छन् । 

वीरगञ्जको भन्सार क्षेत्रमा निर्मित होल्डीङ सेन्टरको स्थलगत अनुगमनका क्रममा सांसद यादवले करोडौँको लागतमा निर्मित संरचनालाई उपयोगविहिन अवस्थामा राख्न नहुने बताए । 

कोभिड-१९ को महामारीका समयमा भारतबाट वीरगञ्ज हुँदै नेपाल भित्रिने यात्रुहरुलाई चेकजाँच तथा क्वारेन्टिनलगायतका कार्यका लागि निर्माण गरिएका संरचनालाई जनहितका काममा उपयोगमा ल्याउनुपर्ने पूर्व वन तथा वातावरणमन्त्रीसमेत रहेका यादवले बताए । 

उनले भने, ‘राज्यले करोडौँ लगानी गरेको संरचनालाई यत्तिकै थन्किन दिनु हुँदैन, कुनै न कुनै किसिमका जनताको हितमा हुने कामका लागि उपयोग गर्न आवश्यक छ, त्यसका लागि म सम्बन्धीत निकायसँग समन्वय गर्नेछु ।’ 

नेपाली सेनाले निर्माण गरेको होल्डीङ सेन्टरको उपयोगका लागि वीरगञ्ज महानगरपालिकाका प्रमुख राजेशमान सिंहले पनि सकारात्मक प्रतिक्रिया दिएका छन् । अनुगमन टोलीमा सहभागी रहेका प्रमुख सिंहकाअनुसार महानगरबासीको हितका लागि हुने कुनै कामका लागि प्रयोजनमा ल्याउन सकिने बताए ।

श्रमिक दिवसकाे अवसरमा आरोग्यः वृहत निःशुल्क स्वास्थ्य शिविर

0

वीरगंज । अन्तर्राष्ट्रिय श्रमिक दिवसका अवसरमा आयोजित आरोग्यः वृहत निःशुल्क स्वास्थ्य शिविर सम्पन्न भएको छ । सामुदायिक संस्था सानो पाइलाको आयोजना, राउण्ड टेबल नेपालको प्रायोजन र ईम्प्रुभिङ्ग वीरगञ्जसँगको सहकार्यमा वीरगञ्जस्थित माईस्थान पार्कमा आयोजित स्वास्थ्य शिविर सम्पन्न भएको हो । 

शिविरमा पेट तथा लिभर रोग विशेषज्ञ डा. राकेश कुमार झा, स्त्री तथा प्रसुती रोग विशेषज्ञ डा. अस्मिता उपाध्याय द्विवेदी, हाडजोर्नी तथा नशा रोग विशेषज्ञ डा. रन्जन कुमार झा, फिजिसियन डा. सरोज रोशन दास, दन्त रोग विशेषज्ञ डा. राजेश स्वर्णकार र मेडिकल अफिसर डा. भुनेश कुमार बादल लगायतका विशेषज्ञ चिकित्सकहरुको टोलिले उपचार सेवा प्रवाह गरेका थिए ।

शिविरबाट १ सय ८१ जना बिरामीहरुले चिकित्सकीय परार्मश लिएकाे सानाे पाइलाले जनाएकाे छ । सानाे पाइलाका अनुसार शिविरमा नसर्ने रोगका बिरामीहरु सबभन्दा बढी सहभागि भएका थिए । शिविरमा सहभागि सबै बिरामीहरुलाई चिकित्सकीय परामर्शसँगै औषधी समेत व्यवस्थापन गरिएको थियो ।

नेशनल हेल्थकेयरको सहयोगबाट प्राप्त हुन आएको औषधीहरु बिरामीहरुलाई निःशुल्क रुपमा बाँडिएको थियो । शिविरमा नेशनल मेडिकल कलेज तथा शिक्षण अस्पताल, वीरगञ्जका विद्यार्थीहरुको प्राविधीक सहयोग रहेको थियो ।

हाम्रो समुदायको ठूलो हिस्सा अहिले पनि स्वास्थ्य सेवाको पहुँचभन्दा बाहिर छ । सहज सेवा प्रवाह नहुँदा कतिपयले आफ्नो स्वास्थ्यप्रति पर्याप्त चासो दिन सकिरहेका छैनन् । कयौंले आर्थिक अवस्था कमजोर हुँदा आफ्नो स्वास्थ्यको ख्याल राख्न सकेका छैनन्। यो अवस्थाबाट यहाँको समुदाय पनि अछुतो छैन । यसै अवस्थालाई मध्यनजर गर्दै आरोग्यः वृहत स्वास्थ्य शिविर आयोजना गरिएकाे सानाे पाइलाले प्रेस विज्ञप्ती मार्फत जनाएकाे छ । यस कार्यक्रममा संस्करणहरु जिल्लाका ग्रामीण भेगमा पनि सञ्चालन गरिने योजना रहेकाे सानाे पाइलाद्वारा जारि विज्ञप्तीमा उल्लेख छ ।

वीरगंजमा ओलीको पुत्ला दहन

0

वीरगंज । पूर्वराजा ज्ञानेन्द्र शाहविरुद्ध अभिव्यक्ति दिएको भन्दै वीरगंजमा पूर्वप्रधानमन्त्री केपी शर्मा ओलीको पुत्ला दहन गरिएको छ । राजावादी समूह नेपाल राष्ट्रवाद सङ्घले साेमबार दिउसाे वीरगंजकाे घण्टाघरमा उनकाे पुत्ला दहन गरेको हो ।

नेकपा एमालेका अध्यक्षसमेत रहेका ओलीले राजसंस्था र पूर्व राजासहित राजपरिवारसमेत प्रति लक्षित गर्दै अपशब्द प्रयोग गरेर सार्वजनिक अभिव्यक्ति दिँदा राजसंस्थको अपमान र राजपरिवारसंग दुर्व्यवहार भएकोले पुत्ला दहन गरिएको सङ्घका अध्यक्ष जनकलाल साहले बताए ।

पूर्वका जिल्लामा भएको कार्यक्रममा गएका बेला ओलीमाथि आक्रमणको प्रयास भएपछि उनले आइतबार एक सार्वजनिक कार्यक्रममा बोल्दै आक्रमण राजसंस्था र पूर्व राजपरिवारका व्याक्तिहरुको संलग्नता भएको अभिव्यक्ति दिएका थिए ।

त्यहि अभिव्यक्तिप्रति असन्तुष्टी जनाउँदै वीरगंजमा सोमबार ओलीविरुद्ध प्रदर्शन र नाराबाजी गर्दै पुत्ला जलाएर विराेध प्रर्दशन भएकाे हाे । प्रदर्शनमा सङ्घका पृथ्वी झा, शम्भु चौरसिया, उमाशङ्कर प्रसाद, राजेश प्रसाद चौहान, राजेन्द्र पाल, वीरेन्द्र थापालगायतको सहभागीता थियो ।

एक रुपैयाँमा ट्युशन पढाउने कुर्मीको स्वास्थ्य बारे प्रधानमन्त्रीको चासो

0

वीरगंज । एक रुपैयाँ शुल्क लिएर ग्रामिण क्षेत्रका बालबालिकालाई ट्युशन पढाउने पर्साको धोविनी गाउँपालिका निवासी रामअयोध्या राउत कुर्मीको स्वास्थ्य अवस्था बारे प्रधानमन्त्री पुष्पकमल दाहाल (प्रचण्ड) ले चासाे व्यक्त गरेका छन् ।

पाँच दशकदेखि एक रुपैयाँ शुल्क लिएर गाउँको प्राथमिक तहमा पढ्ने बालबालिकालाई ट्युसन पढाउँदै आएका कुर्मी पछिल्लो समय विरामी परेपछि उनको स्वास्थ्य अवस्था बारे प्रधानमन्त्री प्रचण्डले चासाे व्यक्त गरेका हुन् । प्रधानमन्त्री तथा मन्त्रिपरिषद्को कार्यालयले सोमबार एउटा सूचना जारी गर्दै प्रधानमन्त्री प्रचण्डले कुर्मीको स्वास्थ्योपचार बारे चासाे व्यक्त गर्दै उपचार र जीविकोपार्जनका लागि आवश्यक प्रबन्ध मिलाउन प्रमुख जिल्ला अधिकारीलाई निर्देशन दिएको जनाएको छ । 

धोविनी–१ घोडदौल निवासी कुर्मी विगत पाँच दशकदेखि एक रुपैयाँ शुल्क लिएर गाउँका विद्यार्थीलाई दैनिक ३ घण्टा ट्यूशन पढाउँदै आएका छन् । उनले बिहान र साँझ डेढ/डेढ घण्टा गरेर दुई शिफ्टमा ट्युशन पढाउने गर्छन । यद्यपि ७० वर्ष पुगिसकेका कुर्मी श्वासप्रश्वाससम्बन्धी समस्याले पिडित छन् । पछिल्लो समय उनको स्वास्थ्य अवस्था धेरै बिग्रेपछि हाल ट्युशन पढ्दै आएका सयौं विद्यार्थी पढाईबाट वञ्चित छन् ।

स्थानीय सलाउदीन अहमदकाे पहलमा मधेश प्रदेश सरकारका उद्योग, पर्यटन तथा वन राज्यमन्त्री रहबर अन्सारीले गाउँमै पुगेर कुर्मीसँग भेटघाट गरेका थिए । आइतबार भेट गरेपछि मन्त्री अन्सारीले गण्डक अस्पतालमा कुर्मीको उपचारको व्यवस्था मिलाएका छन् । त्यहाँ उनको निःशुल्क उपचार हुने अहमदले बताए । गण्डक अस्पतालका सञ्चालक अन्सारीनै हुन् ।

सरकार पाँच वर्ष चल्छ, यताउता हुन्छ भन्ने भ्रम हो : प्रधानमन्त्री प्रचण्ड

0

चितवन । प्रधानमन्त्री पुष्पकमल दाहाल ‘प्रचण्ड’ले राष्ट्रिय स्वतन्त्र पार्टी (रास्वपा) आफ्नो नेतृत्वको सरकारमा आउने विश्वास व्यक्त गर्नुभएको छ ।

प्रेस सेन्टर नेपाल चितवनले आज यहाँ आयोजना गरेको पत्रकारसँग प्रधानमन्त्री कार्यक्रममा उहाँले रास्वपा सरकारमा सहभागि हुने विषयमा कुराकानी चलिरहेको जानकारी दिनुभयो । प्रधानमन्त्री दाहालले भन्नुभयो, “रास्वपाले वर्तमान सरकारलाई दिएको समर्थन फिर्ता लिँदैन । सो पार्टी पनि सरकारमा आउने कुरा चलिरहेको छ ।” रास्वपाले पहिलाका मन्त्रालय माग्नु अस्वभाविक नभएको जनाउँदै उहाँले यसैमा उहाँ अडिनुहुन्छ भन्ने आफूलाई नलागेको बताउनुभयो ।

सत्तासाझेदार दलका बीचमा सरसल्लाह गरेर सहमतिमा जाने प्रधानमन्त्री दाहालले बताउनुभयो । रास्वपालाई अहिलेनै मन्त्रालय छाड्ने विषयमा आफूहरू नपुगेको उहाँले स्पष्ट पार्नुभयो । प्रधानमन्त्री दाहालले भन्नुभयो, “रास्वपका अध्यक्ष रवि जीले पनि हामीलाई यही नै चाहिन्छ भन्नुभएको छैन । छलफलकै क्रममा भएकाले केही छैन ।”

सञ्चारकर्मीको एक प्रश्नको जवाफमा उहाँले सरकार पाँच वर्ष चल्ने बताउनुभयो । उहाँले भन्नुभयो, “सरकार पाँच वर्ष चल्छ । यताउता हुन्छ की भन्ने भ्रम हो ।” आफ्नो निवास शिवनगरमा आयोजना गरिएको सो कार्यक्रममा प्रधानमन्त्री दाहालले खुलेर पत्रकारसँग कुराकानी गर्नुभएको थियो । सो क्रममा उहाँले महाविर पुन आफूसँग सल्लाहानै गरेर माइतीघरमण्डलामा बसेको बताउनुभयो । बस्नुअघि आफूसँग बालुवाटारमा भेटेको जनाउँदै उहाँले पुनले उठाएका मागप्रति सरकार सकारात्मक रहेको बताउनुभयो ।

प्रधानमन्त्री दाहालले भन्नुभयो, “भेटमा मैले बजेटमा तपाईको माग सम्बोधन गर्न पूरै प्रयास हुन्छ भने हिँड्ने समयमा उहाँले माइतीघरमण्डलामा बस्छु है कस्तो हुँदो रहेछ भन्नुभयो । हाँसीहाँसी ।” बस्नोस् त भन्न मिल्दैन बस्नुभयो भने मलाई बजेट बनाउन सजिलै हुन्छ भनेर आफूले भनेको उहाँले जानकारी दिनुभयो । प्रधानमन्त्री दाहालले थप्नुभयो, “यस कारण सरकारले वास्ता गरेन भन्ने झुटो कुरा हो । मैले बुझ्दा त सल्लाहामा नै उहाँ बसेको भन्ने बुझेको छु ।” पुनले विकास बजेटको एक प्रतिशत बजेट छुट्याउन अनुरोध गरेको पनि उहाँले बताउनुभयो ।

पूर्वलडाकुलाई रकम दिने विषय विसं २०७१ को सरकारले गरेको निर्णय भएको उहाँले बताउनुभयो । तत्कालीन समयमा अर्थमन्त्री विष्णु पौडेल रहेको र कांग्रेस एवं एमाले सरकार रहँदा छलफल भएर टुङ्गिएको विषय भएको प्रधानमन्त्री दाहालले जानकारी दिनुभयो । तत्कालीन समयमा सर्वोच्च अदालतमा मुद्दा परेका कारण रोकिएको र अहिले दिन मिल्ने गरी फैसला भएकाले रकम दिन लागिएको बताउनुभयो ।

आर्थिक समस्याका कारण किस्ताबन्दीमा लडाकुलाई रकम दिने विषयमा छलफल भइरहेको प्रधानमन्त्री दाहालले बताउनुभयो । उहाँले नेकपा (एमाले)का अध्यक्ष केपी शर्मा ओलीको आक्रमणमा सत्तारुढ दल लागेको भन्ने कुरा असत्य भएको बताउनुभयो । उहाँले भन्नुभयो, “तत्कालीन राजा र तीनका समर्थक भन्ने छ त्यो गम्भीर विषय हो ।” अर्को एक प्रश्नमा खेलकुद क्षेत्रको बिकासमा सरकारले प्राथमिकता दिएको उहाँको भनाइ थियो । सरकारले कृषि उत्पादन, रोजगारी र युवा लक्षित कार्यक्रमलाई बजेटमा जोड दिने पनि बताउनुभयो । सो अवसरमा दाहालले प्रेस सेन्टर चितवनले प्रकाशन गरेको क्यालेन्डरको लोकार्पण गर्नुभएको थियो । रासस

ओमचाओ विरू फिडमा लडेर घाइते मजदुरकाे उपचारमा लापरवाही

0
ओमचाओ विरू फिड उद्योगमा घाइते मजदुर ज्ञानेन्द्र सहनी नेशन मेडिकल कलेज तथा शिक्षण अस्पतालकाे बेडमा । तस्बिर : कालिका टाईम्स

वीरगंज । रुङ्गटा वेलफेयर सोसाइटी नामक संस्था मार्फत वर्षेनी लाखौँ खर्च गर्ने रुङ्गटा समूहले आफ्नै श्रमिकलाई अस्पतालको शय्यामा अपत्र छाडेको छ । 

लगभग एक महिना अगाडि चैते छठको पूर्वसन्ध्यामा रुङ्गटा ग्रुपद्वारा सञ्चालित परवानीपुर -४ स्थित ओमचाओ विरू फिड उद्योग प्रा.लि. मा कार्यरत पर्सागढी –७ फूलवारी टोल निवासी ज्ञानेन्द्र सहनी उद्योगको छतबाट लडेर दुर्घटनामा परे । भारी सामान बोकेर भर्‍याङ चढीरहँदा ७ तल्ला जतिको उँचाईबाट लडेर घाइते भएका उनको हाल वीरगंजस्थित नेशनल मेडिकल कलेजमा उपचार चलिरहेको छ ।

सामाजिक कार्य मार्फत राष्ट्रको गौरव एवम् जनताको हितमा पुर्‍याएको योगदानका लागि नेपाली नयाँ वर्षका दिन सुप्रबल जनसेवाश्री तृतिय श्रेणीबाट मुरलीधर रुङ्गटा विभूषित भइरहँदा उनले स्थापना गरेको रुङ्गटा ग्रुपद्वारा सञ्चालित एक उद्योगमा काम गर्दागर्दै घाइते मजदूर अस्पतालको शय्यामा जीवन मृत्युसँग लडिरहेका थिए । 

बाहिर समाज हितको लागि काम गर्दै राष्ट्रपतिबाट विभूषित भएका उनले सञ्चालन गरेको उद्योगमा काम गर्दागर्दै घाइते भएका मजदूर पैसाको अभावमा उपचारका लागि छट्पटाउनु गम्भीर विषय हो । रुङ्गटा समूहले देखाउने र गर्ने काममाथि पनि यसले एउटा ठूलो प्रश्न चिन्ह खडा भएको छ ।  

रिडको हड्डी, घाँटी पछाडि पट्टिको भाग, टाउको र खुट्टामा गम्भीर चोट लागेर सवा महिनादेखि अस्पतालको शय्यामा रहेका श्रमिकलाई अझै कति दिनसम्म अस्पतालमा बस्नुपर्ने भन्ने निश्चय छैन । सामान्य हिँडडुल गर्न पनि नसक्ने भएका उनको दुई वर्षीय छोरी छिन् भने पत्नी हिरामति देवी ७ महिने गर्भवती छिन् । सम्पतिको नाममा परिवारसँग रहेको पाँच कट्ठा खेत साहुकोमा राखेर छोराको उपचारका लागि उनका बुवा अमरदेव सहनीले थोरै ऋण उठाएका छन् ।

नेशनल मेडिकल कलेजका ब्रेन एण्ड स्पाइन सर्जन डा. मोहम्मद सफरोज अन्सारीका अनुसार हालसम्म ज्ञानेन्द्रको घाँटी र खुट्टाको गरेर दुई वटा शल्यक्रिया भएको छ । जसमा साढे ३ लाख जती खर्च भएको अमरदेवले बताए । औषधी लगायतमा थप २ लाख रुपैयाँ लागिसकेको उनि बताउँछन् । पैसा अभावका कारण आइतबार हुनुपर्ने खुट्टाको अर्को शल्यक्रिया सारिएको छ ।

समयमा शल्यक्रिया नहुँदा पतीलाई केहि हुने हो की हिरामतीलाई डर छ । छोरी र आउने सन्तानको भविष्यको चिन्ताले उनलाई पिरोली रहेको छ । 

काम गर्दागर्दै दुर्घटना भएको कारण ज्ञानेन्द्रको सम्पूर्ण उपचार खर्च उद्योगले व्यहोर्नु पर्ने समाजसेवी चन्दन मिश्र बताउँछन् । ‘उद्योगमा काम गर्ने क्रममा कुनै किसिमको दुर्घटना हुँदा त्यसको जिम्मा उद्योगले लिनुपर्छ,’ मिश्रले भने, ‘तर यहाँ उद्योग पन्छीएको देखियो । परिवारलाई थोरै रकम दिएर आफ्नो जिम्मेवारीबाट भाग्न खोज्दै छ । उपचार चलेसम्मको सबै खर्च उद्योगले नै व्यहोर्ने हो ।’

ज्ञानेन्द्रका बुवा अमरेदेवले पनि उद्योगले छोराको उपचारमा लाग्ने खर्च मात्र दिए पुग्ने बताए । ‘मेरो हातमा ल्याएर पैसा दिनुपरेन । उद्योगले आफै अस्पतालमा आएर लाग्ने रकम तिरिदिए हुन्छ । मेरो छोरा सकुशल होस् भन्ने मात्र मेरो चाहना हो,’ उनले भने

मिश्रकाअनुसार उद्योगले मजदूरहरुको विमा पनि गराएको छैन । उनले थपे, ‘श्रम ऐनबमोजिम उद्योगका मजदूर र श्रमिकको स्वास्थ्य र दुर्घटना विमा गराउनु पर्छ । यहाँ उद्योगले त्यस्तो गराएको देखिँदैन । त्यसमाथि उद्योग मजदूरको सुरक्षाको दृष्टिकोणले पनि मापदण्डअनुसार नभएको हामीलाई गुनासो आएको छ ।’

नेशनल मेडिकल कलेजका सञ्चालक बसरुदीन अनुसारसँग पैसाको कारण ज्ञानेन्द्रको उपचार नरोक्न आफूले पहल पनि गरेको मिश्रले जानकारी दिए । उनले चन्दा उठाएर भएपनि ज्ञानेन्द्रको उपचार गराउने बताए ।

आज अन्तराष्ट्रिय श्रमिक दिवसका दिन देशका राष्ट्रपतिदेखि प्रधानमन्त्रीसम्मले श्रमिकको अधिकार, सुरक्षा र भविष्यको बारेमा बोलिरहँदा एकजना गरिव परिवारका श्रमिक जीवनमृत्युको लडाई लडिरहेका छन् । उनको आवाज सुनुदिने, हकअधिकार र सुरक्षाको लागि बोलिदिने आज कोहीपनि छैन ।

वीरगंजमा हरेक महिनाको अन्तिम शुक्रबार र शनिबार रात्रि बजार

0

वीरगंज । वीरगंजकाे अर्थतन्त्र चलायमान बनाउन नयाँ वर्षदेखि सुरु गरिएको रात्रि बजारले निरन्तरता पाउने भएको छ । हरेक महिनाको अन्तिम शुक्रबार र शनिबार रात्रि बजार लगाउने गरि सबै तयारी गरिएको हो ।

नयाँ वर्षको अवसरमा गएको चैत ३० र बैशाख १, २ गते लगाइएको रात्रि बजार अबदेखि भने हरेक महिनाको अन्तिम शुक्रबार र शनिबार लगाइने भएको हो । जस अनुरुप बैशाखको २९ र ३० गते रात्रि बजार लागाइने तयारी गरिएको छ ।

वीरगंज महानगरपालिकाका प्रमुख राजेशमान सिंहको उपस्थितिमा आइतबार सांझ बसेको रात्रि बजार ब्यवस्थापन समितिको बैठकले रात्रि बजारलाई अझै विस्तार गर्दै लैजाने निर्णय गरेको हो ।

यस पटक रात्रि बजार माइस्थान चोकदेखि आदर्शनगर चोक हुँदै पशुपति घोष चोकसम्म बिस्तार गरेर लगाउने निर्णय बैठकले गरेको छ ।

बैठकमा नगर प्रमुख राजेशमान सिंहले वीरगंजकाे व्यापार ब्यवसाय अबेरसम्म संचालन गर्ने वातावरण बनाउन रात्रि बजारलाई निरन्तर रुपमा अघि बढाउने प्रयास गरिएको बताए । महानगरले यहाँको बजार चलायमान बनाउन पहल गरिदिएको भन्दै महानगरप्रमुख सिंहले रात्रि बजारलाई निरन्तरता दिन अब उद्योगी व्यवसायी नै अग्रसर भएर आउनु पर्नेमा जोड दिए ।

वीरगंज उद्योग वाणिज्य संघले बजारको नेतृत्व लिएर अघि आउन आग्रह गर्दै उनले सुरक्षा तथा अन्य व्यवस्थापनको जिम्मा महानगरले लिने पनि बताए । उनले रात्रि बजार लाग्ने समयमा नेपाल भारत मुख्य सीमा चौबिसै घण्टा खुल्ने व्यवस्था मिलाइएकोले सीमापारका पर्यटकको आगमन बढ्ने र बजार चलायमान हुने विश्वास पनि व्यक्त गरे ।

बैठकमा वीरगंज उद्योग वाणिज्य संघका अध्यक्ष अनिल पटवारीले रात्रि बजार संचालनका लागि आवश्यक सहयोग गर्न उद्योग वाणिज्य संघ तयार रहेको बताए ।

बैठकले अहिले सटरमा संचालन गरिरहेको व्यवसायलाई अबेर रातिसम्म संचालन गराउन आग्रह गर्ने निर्णय गर्नुका साथै रात्रि बजारका दिन आवश्यक स्टलहरुको व्यवस्था गर्ने निर्णय पनि गरेको छ ।

बैठकमा एन.वाई.इ.एफका आंशु कुमार सर्राफले रात्रि बजार संचालनको बारेमा कार्यपत्र प्रस्तुत गर्दै उद्यमका नयाँ नयाँ आयाम पस्केर फरकपन दिँदा बजारले रौनक पाउने बताए ।

बैठकले रात्रि बजार व्यवस्थापन समितिमा उद्योग वाणिज्य संघलाई पनि समेटेको छ । नयाँ वर्षमा पुरानो बसपार्कमा राखिएका स्टल अबदेखि भने सडक पेटीमै स्टल राखेर बजार संचालन गराइने बैठकले निर्णय पनि गरेको छ ।

माइस्थान चोकदेखि आदर्शनगर चोक हुँदै पशुपति घोष चोकसम्म लाग्ने रात्रीबजारमा थरिथरिका स्टलहरु राखिने छ । विशेष गरेर विभिन्न खानाका परिकार, लत्ताकपडा, जुत्ताचप्पल तथा अन्य विविध किसिमका स्टलहरु राखिने रात्रि बजार व्यवस्थापन समितिका सदस्य समेत रहेका ग्रिनसिटी सामुदायिकका अध्यक्ष जयप्रकाश खेतानले जानकारी दिए ।

बैठकमा ग्रिनसिटी सामुदायिकका सञ्जय अग्रवाल, एन.वाई.ई.एफका विकाश ठाकुर, अनुप अग्रवाल, सुरेश कुमार रुंगटा, छवि सर्राफ, अफसाना खान, सपना अग्रवाल, सुनिल कुमार कादमियाँ लगायतको सहभागिता रहेको थियो ।