वीरगंज । वीरगंजबाट प्रकाशित मध्य नेपाल सन्देश साप्ताहिक पत्रिकाले आफ्नो ११औँ वार्षिकोत्सवका अवसरमा ‘२०८४ को निर्वाचनमा महिला पहिला’ विषयक प्यानल छलफल कार्यक्रम सम्पन्न गरेको छ ।
वीरगंजस्थित क्लासिक ब्याङ्क्वेटमा आयोजित कार्यक्रमको उद्घाटन पर्सा क्षेत्र नं. १ का प्रतिनिधिसभा सदस्य (सांसद) हरि पन्तले गरेका थिए ।
कार्यक्रमलाई सम्बोधन गर्दै प्रमुख अतिथि पन्तले सञ्चारमाध्यम लोकतन्त्रको महत्वपूर्ण आधार भएको बताउँदै नागरिकका समस्या, गुनासा र आवाज सम्बन्धित निकायसम्म पुर्याउन सञ्चार क्षेत्रको भूमिका महत्वपूर्ण रहेको बताए । उनले पत्रकारिताले सत्य, तथ्य र निष्पक्षतालाई केन्द्रमा राखेर अघि बढ्नुपर्नेमा जोड दिए ।
सांसद पन्तले मिडियामाथि अंकुश लगाएर विश्वका कुनै पनि सरकार सफल हुन नसक्ने भन्दै सरकारको प्रेस स्वतन्त्रता नियन्त्रण गर्ने मनसाय नरहेको दाबी गरे । निजी सञ्चारमाध्यमलाई सरकारी विज्ञापन केही समय रोक्नुको उद्देश्य पत्रकारितामा देखिएका विकृति नियन्त्रण गर्नु रहेको उनको भनाइ थियो । प्रेस स्वतन्त्रतामाथि हस्तक्षेप गर्ने सरकारको कुनै नीति नरहेको उनले दाबी गरे ।
मुलुक अहिले संकटको अवस्थामा रहेकाले सबैले आ–आफ्नो ठाउँबाट बाढी प्रभावित नागरिकको उद्धार तथा राहतमा सहयोग गर्न पनि उनले आग्रह गरे ।
नेपाल पत्रकार महासंघका केन्द्रीय लेखा समिति संयोजक केशी लामिछानेले वर्तमान सरकारको मन्त्रिमण्डलमा अधिकांश युवा सहभागी हुनु सकारात्मक भए पनि सरकारको नियत भने ठीक नरहेको आरोप लगाए । बालेन्द्र साह नेतृत्वमा सरकार गठन भएलगत्तै मिडिया तथा प्रेस स्वतन्त्रतामाथि हस्तक्षेप सुरु भएको उनको दाबी थियो ।
लामिछानेले निजी सञ्चारमाध्यमलाई सरकारी विज्ञापन रोक्नेदेखि लामो समयदेखि पत्रपत्रिकाले लोककल्याणकारी विज्ञापन प्रकाशन गरेबापत पाउँदै आएको रकमसमेत घटाएर सरकारले मिडिया तथा प्रेसमाथिको हस्तक्षेपलाई निरन्तरता दिएको आरोप लगाए ।
पत्रिकाकी सम्पादक कविता खड्काले सहजीकरण गरेको ‘८४ मा महिला पहिला’ विषयक प्यानल छलफलमा पटेर्वा सुगौली गाउँपालिकाकी उपाध्यक्ष ममता महतो, जनमत पार्टीकी नेतृ रम्भा मिश्रा, सामाजिक अभियन्ता बबिता जयसवाल र प्राध्यापक उमा मिश्रा सहभागी थिए ।
छलफलमा आगामी निर्वाचनमा महिलाको राजनीतिक सहभागिता, प्रतिनिधित्व र नेतृत्वका विषयमा विचार–विमर्श गरिएको थियो ।
यसै अवसरमा पत्रिकाले हरेक वर्ष प्रदान गर्दै आएको ‘मधेश प्रदेशका उत्कृष्ट महिला पत्रकार सम्मान’ यस वर्ष सर्लाहीकी पत्रकार बन्दना झालाई प्रदान गरेको छ । कार्यक्रमका प्रमुख अतिथि सांसद पन्तले पत्रकार झालाई सम्मानपत्र तथा ११ हजार रुपैयाँ नगदसहित सम्मान गरेका थिए ।
झा मधेश प्रदेश सरकारअन्तर्गतको मिडिया काउन्सिलकी कार्यवाहक अध्यक्ष तथा नेपाल पत्रकार महासंघ सर्लाहीकी उपाध्यक्षसमेत हुन् ।
पत्रिकाकी सम्पादक खड्काको अध्यक्षतामा सम्पन्न कार्यक्रममा नेपाल पत्रकार महासंघका केन्द्रीय सचिव केशी लामिछाने, मधेश प्रदेशका सचिव दीपक गौतम, पर्सा अध्यक्ष ओमप्रकाश खनाल, वीरगंज उद्योग वाणिज्य संघका अध्यक्ष हरि गौतम, संघका पूर्वअध्यक्ष सुबोध गुप्ता, अधिवक्ता कमलमोहन पोखरेललगायतको उपस्थिति थियो ।
कार्यक्रमकाे संचालन संचारकर्मी सुर्यानारायण विकले गरेका थिए भने स्वागत मन्तव्य गिता भण्डारीले राखेकी थिइन ।
