वीरगंज । पर्सा प्रहरीले १०० ग्राम ब्राउन सुगर जस्तो देखिने लागूऔषधसहित तीन जना भारतीय नागरिकलाई पक्राउ गरेको छ ।
विशेष सूचनाका आधारमा जिल्ला प्रहरी कार्यालय पर्साबाट खटिएको प्रहरी विशेष टोलीले आइतबार दिउँसो करिब १२ः१० बजे वीरगंज महानगरपालिका–१६, माईधिया पोखरी अगाडिको सडकखण्डबाट शंकास्पद रूपमा पैदल हिँडिरहेका तीन जनालाई रोकी चेकजाँच गरेको थियो ।
चेकजाँचका क्रममा उनीहरूको साथबाट ब्राउन सुगर जस्तो देखिने १०० ग्राम पदार्थ बरामद भएको प्रहरीले जनाएको छ । बरामद लागूऔषधसहित भारत बिहार राज्य, पूर्णिया जिल्ला सदर थाना अन्तर्गतका १९ वर्षीय कृष्णा कुजुर, १९ वर्षीय आदित्य राज तिगा र १८ वर्षीय आशिष कुँजुरलाई नियन्त्रणमा लिइएको हो ।
पक्राउ परेकाहरूमाथि लागूऔषध खरिद–बिक्री तथा ओसारपसार सम्बन्धमा थप अनुसन्धान भइरहेको जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक चक्रबहादुर मल्लले जानकारी दिए ।
