वीरगंज । भोटेकोसी बाढीबाट प्रभावित नागरिकहरूको राहत तथा पुनर्स्थापनाका लागि वीरगंज महानगरपालिकाले १ करोड ११ लाख रुपैयाँ आर्थिक सहयोग गर्ने भएको छ ।
कार्यवाहक नगर प्रमुख इम्तियाज आलमको अध्यक्षतामा बसेको आकस्मिक कार्यपालिका बैठकले बाढीपीडितका लागि उक्त रकम सहयोग गर्ने निर्णय गरेको हो । बैठकले सहयोग रकम महानगरपालिकाका विभिन्न आन्तरिक स्रोतबाट जुटाउने निर्णय गरेको छ ।
निर्णयअनुसार महानगरपालिकाअन्तर्गतका प्रत्येक वडा कार्यालयबाट १ लाख २५ हजार रुपैयाँका दरले रकम उपलब्ध गराइनेछ । त्यस्तै, महानगरपालिकाका सम्पूर्ण जनप्रतिनिधिले एक महिनाको तलब तथा सेवा–सुविधाबापतको रकम सहयोग गर्ने भएका छन् ।
महानगरपालिकामा कार्यरत कर्मचारीहरूको तलबबाट पनि मुख्यसचिवस्तरीय निर्णयअनुसार तोकिएको रकम कट्टा गरी सहयोगमा उपलब्ध गराइने जनाइएको छ ।
भोटेकोसी बाढीका कारण ठूलो जनधनको क्षति व्यहोरेका नागरिकलाई विपद्को कठिन अवस्थामा राहत तथा पुनर्स्थापनामा सहयोग पुगोस् भन्ने उद्देश्यले आकस्मिक बैठक बोलाएर सहयोग गर्ने निर्णय गरिएको कार्यवाहक नगर प्रमुख आलमले जानकारी दिए ।
महानगरपालिकाले विपद्मा परेका नागरिकप्रति ऐक्यबद्धता जनाउँदै राहत तथा पुनरुत्थानका लागि आर्थिक सहयोग उपलब्ध गराउने निर्णय गरेको हो ।
