वीरगंज । रसुवा र नुवाकोटमा आएको भीषण बाढीबाट प्रभावित नागरिकको राहत, उद्धार, व्यवस्थापन तथा पुनर्निर्माणका लागि पर्साको जगरनाथपुर गाउँपालिकाले १५ लाख रुपैयाँ आर्थिक सहयोग गर्ने निर्णय गरेको छ ।
गाउँ कार्यपालिकाको आइतबार बसेको बैठकले गाउँपालिकाको विपद् व्यवस्थापन कोषबाट ५ लाख ५१ हजार रुपैयाँ सहयोग गर्ने सर्वसम्मत निर्णय गरेको गाउँपालिका अध्यक्ष श्रीकान्त प्रसाद यादवले जानकारी दिए ।
अध्यक्ष यादवका अनुसार विपद् व्यवस्थापन कोषको रकमसँगै गाउँपालिकाका निर्वाचित जनप्रतिनिधिहरूको एक महिनाको तलबभत्ता तथा सुविधा बराबरको रकम र कर्मचारीबाट नेपाल सरकारले तोकेबमोजिमको रकम संकलन गरी कुल १५ लाख रुपैयाँ सहयोग गरिनेछ ।
विपद्का बेला प्रभावित नागरिकलाई राहत तथा पुनःस्थापनामा सहयोग पुर्याउने उद्देश्यले गाउँपालिकाले आर्थिक सहयोग गर्ने निर्णय गरेको अध्यक्ष यादवले बताए ।
गाउँपालिकाका प्रमुख प्रशासकीय अधिकृत सन्देश कुमार यादवका अनुसार बोर्ड बैठकबाट निर्णय भएको रकम संकलन गरी दुई–तीन दिनभित्र प्रधानमन्त्री दैवी प्रकोप उद्धार कोषमा जम्मा गरिनेछ ।
गाउँपालिकाले जारी गरेको प्रेस विज्ञप्तिमार्फत बाढीका कारण भएको मानवीय तथा भौतिक क्षतिप्रति गहिरो दुःख व्यक्त गर्दै विपद्मा परी ज्यान गुमाउने नेपाली तथा विदेशी नागरिकप्रति श्रद्धाञ्जली अर्पण गरेको छ । साथै शोकसन्तप्त परिवारप्रति समवेदना व्यक्त गर्दै प्रभावित नागरिकको शीघ्र उद्धार तथा स्वास्थ्यलाभको कामना गरिएको छ ।
त्यस्तै, गाउँपालिकाले जनप्रतिनिधि तथा कर्मचारीबाट समेत थप आर्थिक सहयोग गर्ने निर्णय गरेको छ । निर्वाचित जनप्रतिनिधिले एक महिनाको सुविधाबराबरको रकम सहयोग गर्नेछन् ।
स्थायी कर्मचारीको हकमा नेपाल सरकारको निर्णयबमोजिम सहयोग गरिने तथा करार कर्मचारीमध्ये अधिकृतस्तरका कर्मचारीबाट सुरुआती तलब स्केलबराबर पाँच दिन र सहायक तथा श्रेणीविहीन कर्मचारीबाट तीन दिनबराबरको रकम कट्टा गरी सहयोग गरिने प्रमुख प्रशासकीय अधिकृत यादवले बताए ।
