वीरगंज । पर्साको धोबिनी गाउँपालिका–४ स्थित लंगडी चौकमा शनिबार रक्तदान कार्यक्रम सम्पन्न भएको छ । मानवीय प्रेम परोपकार कोषको आयोजनामा भएको कार्यक्रममा ३ महिलासहित ८८ जनाले रक्तदान गरेका छन् ।
कार्यक्रममा चित्रञ्जना पटेल, हिना बेगम, रेन्जु पटेल, रामपुर्ती साह कानु, निरज पटेल, लोकनाथ पटेल, रामानन्द ठाकुर, सुलतान मियाँ, रामबाबु पटेल, पशुराम पटेल, राजन गुप्ता, रोशन चौरसिया, उमेश साह कानु, अमन पटेल, प्रशान्त गुप्ता, अलियास मियाँलगायतले रक्तदान गरेका थिए ।
मानवीय प्रेम परोपकार कोषका अध्यक्ष डा. इम्रान अन्सारीको अध्यक्षतामा सम्पन्न कार्यक्रमको उद्घाटन धोबिनी गाउँपालिकाका अध्यक्ष मदनप्रसाद चौहानले गरेका थिए । कार्यक्रममा वडा अध्यक्ष अबास मियाँ, मनाउर अहमद, नेपाल रेडक्रस सोसाइटी पर्साका अध्यक्ष बृजकिशोर पटेल र कार्यपालिका सदस्य दिनेश कलवारको उपस्थिति रहेको थियो ।
कार्यक्रमलाई सम्बोधन गर्दै वक्ताहरूले रक्तदान मानवताको महत्वपूर्ण सेवामध्ये एक भएको बताए । रगतको अभावका कारण कुनै पनि बिरामीले ज्यान गुमाउन नपरोस् भन्ने उद्देश्यले यस्ता अभियानलाई निरन्तरता दिनुपर्नेमा उनीहरूले जोड दिए । साथै, युवाहरूलाई सामाजिक उत्तरदायित्व निर्वाह गर्दै नियमित रक्तदान अभियानमा सहभागी हुन आग्रह गरे ।
रक्तसञ्चार केन्द्र वीरगञ्जका प्रमुख सौरवराज पाण्डेको नेतृत्वमा आएको प्राविधिक टोलीको प्राविधिक सहयोगमा रक्तदान कार्यक्रम सम्पन्न भएको आयोजकले जनाएको छ ।
