वीरगंज । पर्साकाे पटेर्वा सुगाैली गाउँपालिकामा शिक्षकहरूको क्षमता अभिवृद्धिका लागि दुईदिने डिजिटल साक्षरता तथा अनलाइन सुरक्षा तालिम सुरु भएको छ ।
युरोपियन युनियनको आर्थिक सहयोग तथा पिपुल इन निड (PIN), Accountability Lab Nepal, National Campaign for Education Nepal (NCE Nepal), नेपाल अपांग महिला संघ र दिव्य विकास स्रोत केन्द्र, पर्साको संयुक्त साझेदारीमा सञ्चालित पहुँच परियोजनाअन्तर्गत तालिम सुरु भएकाे हाे ।
पटेर्वा सुगौली गाउँपालिकाको सभाहलमा सुरु भएको तालिममा पटेर्वा सुगौली र जिराभवानी गाउँपालिकाका ६ वटा विद्यालयका २४ जना शिक्षक–शिक्षिकासहित दुवै पालिकाका शिक्षा शाखा प्रमुख गरी २६ जनाको सहभागिता रहेको छ ।
तालिममा नेपाल राष्ट्रिय माध्यमिक विद्यालय रंगपुर, नेपाल राष्ट्रिय माध्यमिक विद्यालय सुगौली दा.प., नेपाल राष्ट्रिय माध्यमिक विद्यालय निचुटा, नेपाल राष्ट्रिय माध्यमिक विद्यालय कठकुइया–बसन्तपुर, नेपाल राष्ट्रिय माध्यमिक विद्यालय सेढवा र श्री बितो महतो जनता माध्यमिक विद्यालय नौकाटोलाका शिक्षक–शिक्षिकाहरू सहभागी छन् ।
दिव्य विकास स्रोत केन्द्र, पर्साका अध्यक्ष उमेश प्रसाद चौहानकाे अध्यक्षतामा तालिमकाे उद्घाट कार्यक्रम भएकाे थियाे। कार्यक्रममा पहुँच परियोजनाको उद्देश्य तथा तालिमको आवश्यकता र महत्वबारे दिव्य विकास स्रोत केन्द्र, पर्साका कार्यकारी निर्देशक रामाकान्त प्रसाद कुर्मीले प्रकाश पार्नुभएको थियो ।
तालिमको सहजीकरण दिव्य विकास स्रोत केन्द्र, पर्साका गणेश बहादुर ठकुरीले गरिरहनु भएकाे छ । उहाँले डिजिटल युगमा शिक्षण–सिकाइ प्रक्रियामा प्रविधिको प्रयोग बढ्दै गएकाले शिक्षकहरूमा डिजिटल साक्षरता, डिजिटल उपकरणको सुरक्षित तथा प्रभावकारी प्रयोग र अनलाइन सुरक्षासम्बन्धी ज्ञान तथा सीप विकास आवश्यक रहेको बताउनुभयो ।
तालिममा डिजिटल प्रविधिको प्रयोगमार्फत शिक्षण–सिकाइलाई प्रभावकारी, समावेशी र गुणस्तरीय बनाउने उपायका साथै शिक्षक तथा विद्यार्थीलाई अनलाइन जोखिमबाट सुरक्षित राख्ने, व्यक्तिगत तथा शैक्षिक सूचना संरक्षण गर्ने, साइबर जोखिम पहिचान गर्ने, सुरक्षित पासवर्ड तथा गोपनीयता कायम गर्ने र जिम्मेवार डिजिटल व्यवहार अपनाउने विषयमा जानकारी तथा व्यावहारिक ज्ञान प्रदान गरिनेछ ।
सहजीकरणका क्रममा ठकुरीले डिजिटल प्रविधि सूचना प्राप्त गर्ने माध्यम मात्र नभई शिक्षण–सिकाइलाई सहज, पहुँचयोग्य, सहभागितामूलक र प्रभावकारी बनाउने महत्वपूर्ण साधन भएको बताउँदै यसको सुरक्षित र जिम्मेवार प्रयोगमा विशेष ध्यान दिनुपर्नेमा जोड दिनुभयो ।
