वीरगंज । पर्साको सखुवा प्रसौनी गाउँपालिका–२ श्रीपुर पञ्चगावामा आयोजित एकदिने निःशुल्क स्वास्थ्य शिविरबाट ४८२ जना बिरामी लाभान्वित भएका छन् ।

सखुवा प्रसौनी गाउँपालिकाको समन्वय, पर्सा ख्रिष्टियन समाज वीरगंजको आयोजन तथा नेशनल मेडिकल कलेज शिक्षण अस्पताल वीरगंजकाे प्राविधिक सहयोगमा श्री दीप नारायण आदर्श नमुना माध्यमिक विद्यालयमा शिविर सञ्चालन गरिएको हो ।

पर्सा ख्रिष्टियन समाजका कोषाध्यक्ष रामप्रसाद घिमिरेका अनुसार शिविरमा मुटुरोग, स्त्री तथा प्रसूति रोग तथा जनरल मेडिसिनसम्बन्धी विशेषज्ञ स्वास्थ्य सेवाहरू प्रदान गरिएको थियो । बिरामीहरूलाई निःशुल्क स्वास्थ्य परीक्षण, चिकित्सकीय परामर्श तथा आवश्यक औषधि वितरण गरिएको थियो ।

नेशनल मेडिकल कलेजका मार्केटिङ म्यानेजर जितेश चन्द्र दासले शिविरमा रक्तचाप, मधुमेह, नाडी परीक्षण, तौल मापन, इसिजी र ईको लगायतका आधुनिक स्वास्थ्य परीक्षण सेवासमेत उपलब्ध गराइएको जानकारी दिए ।

कार्यक्रमलाई सम्बोधन गर्दै गाउँपालिका अध्यक्ष जसवन्त यादवले ग्रामीण क्षेत्रका नागरिकलाई घरदैलोमै विशेषज्ञ स्वास्थ्य सेवा उपलब्ध गराउने उद्देश्यले यस्ता कार्यक्रम सञ्चालन गरिएको बताए । उनले आर्थिक रूपमा विपन्न तथा अस्पतालसम्म पुग्न नसक्ने नागरिकका लागि यस्ता शिविर प्रभावकारी भएको उल्लेख गर्दै आगामी दिनमा पनि स्वास्थ्य क्षेत्रमा सहकार्यलाई निरन्तरता दिने प्रतिबद्धता व्यक्त गरे ।

नेशनल मेडिकल कलेजका मुटुरोग विशेषज्ञ डा. अशरफ हुसेनले ग्रामीण क्षेत्रमा मुटुरोग तथा अन्य जटिल स्वास्थ्य समस्याबारे चेतनाको कमी रहेको उल्लेख गर्दै शिविरमार्फत धेरै बिरामीमा समयमै रोग पहिचान गर्न सहज भएको बताए ।

शिविरकै अवसरमा नेशनल मेडिकल कलेज शिक्षण अस्पताल र सखुवा प्रसौनी गाउँपालिकाबीच स्वास्थ्य सेवा सहकार्यसम्बन्धी समझदारीपत्र (एमओयू) मा हस्ताक्षर भएको छ । साथै नेशनल मेडिकल कलेज र पर्सा ख्रिष्टियन समाजबीच पनि स्वास्थ्य सहकार्यसम्बन्धी छुट्टै सम्झौता गरिएको छ ।

सम्झौताअनुसार शिविरमा सहभागी बिरामीहरूले नेशनल मेडिकल कलेजमा थप उपचार गराउँदा २० प्रतिशतसम्म विशेष छुट पाउने व्यवस्था गरिएको छ ।

पर्सा ख्रिष्टियन समाजका अध्यक्ष सिमोन राईको अध्यक्षतामा सम्पन्न कार्यक्रममा गाउँपालिका उपाध्यक्ष शर्मिला बिष्ट, स्वास्थ्य शाखा प्रमुख राजेश प्रसाद रौनियार, विद्यालयका प्रधानाध्यापक शिवनाथ प्रसाद चौधरी लगायतको उपस्थिति रहेको थियो । कार्यक्रमको सञ्चालन कोषाध्यक्ष रामप्रसाद घिमिरेले गरेका थिए ।

शिविरमा नेशनल मेडिकल कलेज शिक्षण अस्पतालका प्रमुख सूचना अधिकृत इ. प्रदीप कुमार चौधरी, क्वालिटी तथा अपरेशन म्यानेजर ब्रजकिशोर चौधरी, मार्केटिङ म्यानेजर जितेश चन्द्र दाससहित मुटुरोग विशेषज्ञ डा. अशरफ हुसेन, स्त्री तथा प्रसूति रोग विशेषज्ञ डा. रवि कुमार साह तथा जनरल फिजिसियन डा. प्रवेज आलम अन्सारीलगायतको टोलीले स्वास्थ्य सेवा प्रदान गरेको थियो ।

वीरगंज । नेपाल नेत्रज्योति संघ पर्साको आयोजनामा पर्साको कालिकामाई गाउँपालिका–४ स्थित श्री नेपाल राष्ट्रिय माध्यमिक विद्यालय कट्टीबलुवामा निःशुल्क आँखा परीक्षण शिविर सम्पन्न भएको छ ।

ग्रामीण क्षेत्रका बासिन्दा तथा विद्यालयका विद्यार्थीलाई लक्षित गरी आयोजित शिविरको उद्घाटन नेपाल नेत्रज्योति संघ पर्साका सभापति भगवती चौधरीको अध्यक्षतामा सम्पन्न भएको थियो । कार्यक्रममा विद्यालयका प्रधानाध्यापक इन्द्रदेव प्रसाद कुर्मी प्रमुख अतिथि तथा वडा नम्बर ४ का वडा अध्यक्ष संजय कुमार साह विशिष्ट अतिथिका रूपमा सहभागी थिए ।

शिविरमार्फत स्थानीय बासिन्दा र विद्यार्थीहरूको आँखा परीक्षण गरिएको आयोजक संस्थाका कार्यसमिति सदस्य राजन श्रीवास्तवले जानकारी दिए ।

कार्यक्रममा बोल्दै सभापति चौधरीले मानव शरीरका विभिन्न अंगमध्ये आँखा सबैभन्दा महत्वपूर्ण अंग भएको उल्लेख गर्दै आँखाको माध्यमबाट नै संसार देख्न सकिने भएकाले यसको संरक्षण र नियमित परीक्षण आवश्यक रहेको बताए । उनले नेपाल नेत्रज्योति संघले आँखा स्वास्थ्यलाई प्राथमिकतामा राखेर विभिन्न जनचेतनामूलक तथा स्वास्थ्य सेवा कार्यक्रम सञ्चालन गर्दै आएको जानकारी दिए ।

कार्यक्रमको समापनमा विद्यालयका प्रधानाध्यापक इन्द्रदेव प्रसाद कुर्मीले आयोजक संस्था, प्राविधिक टोली तथा उपस्थित सम्पूर्ण सहभागीप्रति धन्यवाद ज्ञापन गर्दै यस्ता कार्यक्रमले ग्रामीण क्षेत्रका नागरिकलाई प्रत्यक्ष लाभ पुग्ने बताए ।

शिविरमा नेपाल नेत्रज्योति संघ पर्साका उपसभापति मदन प्रसाद गुप्ता, सचिव सिताराम उपाध्याय, फुलमहम्मद मियाँ, मधुसूदन उपाध्याय, उमेश गुप्ता, गणेश प्रसाद साहलगायतको उपस्थिति रहेको थियो ।

शिविरको प्राविधिक सहयोग शिवशंकर प्रसाद, मुकुन्द खत्री र अञ्जली चौधरीले गरेका थिए । कार्यक्रमबारे जानकारी कार्यसमिति सदस्य राजन श्रीवास्तवले दिएका हुन्