वीरगंज । पर्साको पटेर्वासुगौली गाउँपालिका–२ मा सञ्चालित शिवम् लेयर्स फार्मबाट निस्कने जैविक फोहोर तथा फोहोर पानीका कारण गादी खोला प्रदूषित बनेको स्थानीयले गुनासो गरेका छन्।
स्थानीयवासीका अनुसार फार्ममा जम्मा हुने मरेका कुखुरा, बिग्रिएका अण्डा, कुखुराको सुली तथा अन्य जैविक फोहोरबाट निस्कने पानी खेत हुँदै गादी खोलामा पुग्ने गरेको छ। उक्त समस्याको असर रंगपुर, मकवानी टोल, बेलवा, कौवावन कटैया र देउरवानासम्म परेको उनीहरूको दाबी छ।
गादी खोलाको पानी स्थानीयले कृषि सिँचाइमा प्रयोग गर्दै आएका छन्। खोलामा फोहोर पानी मिसिँदा धानबालीमा समेत असर परेको स्थानीयको भनाइ छ। पानी दुर्गन्धित भएपछि पशुचौपायालाई समेत समस्या भएको र प्रदूषित पानीकै कारण एउटा बाख्रा मरेको स्थानीयले दाबी गरेका छन्। यद्यपि, बाख्राको मृत्यु प्रदूषित पानीका कारण नै भएको आधिकारिक पुष्टि भने भएको छैन।
स्थानीयका अनुसार फार्मबाट आउने दुर्गन्ध विशेषगरी साँझपख आसपासका बस्तीमा फैलिने गरेको छ। फार्म नजिकै गादी स्वास्थ्य चौकीसमेत रहेकाले वातावरणीय प्रदूषणले मानव स्वास्थ्यमा असर पार्न सक्ने भन्दै स्थानीयले चिन्ता व्यक्त गरेका छन्।
स्थानीय समाजसेवी दीपक रसाइलीले फार्मबाट निस्कने फोहोर र फोहोर पानीको उचित व्यवस्थापनका लागि पटकपटक आवाज उठाउँदै आए पनि समस्या समाधान हुन नसकेको बताए। उनले फार्मको फोहोर व्यवस्थापन प्रणाली तथा गादी खोलाको अवस्थाबारे सम्बन्धित निकायले स्थलगत अनुगमन गर्नुपर्ने माग गरे।
रसाइलीले खोलाको पानीको नमूना संकलन गरी प्रयोगशालामा परीक्षण गर्नुपर्ने र परीक्षणको नतिजाका आधारमा आवश्यक कदम चालिनुपर्ने बताए।
स्थानीयको आरोपबारे शिवम् लेयर्स फार्मका म्यानेजर राजकिशोर चौधरीले भने फार्मबाट निस्किएको पानीका कारण गादी खोलामा समस्या भएको विषयमा आफूलाई जानकारी नभएको प्रतिक्रिया दिए।
यता, पर्साका प्रमुख जिल्ला अधिकारी भोला दाहालले घटनाबारे बुझ्ने बताएका छन्।
स्थानीयले फार्मबाट उत्पादन हुने जैविक फोहोर तथा फोहोर पानीको व्यवस्थापन प्रचलित वातावरणीय मापदण्डअनुसार भए–नभएको अनुगमन गर्न र गादी खोलाको पानी परीक्षण गरी वास्तविक अवस्था सार्वजनिक गर्न सम्बन्धित निकायसँग माग गरेका छन्।
