बारा । बाराको पचरौता नगरपालिका–७ स्थित बेनौली चोक नजिकैबाट प्रहरीले १५१ किलो गाँजा बरामद गरेको छ। शनिबार राति बेनौली चोकबाट करिब ३०० मिटर पूर्वतर्फ रहेको धानखेतबाट प्रहरीले उक्त परिमाणको गाँजा बरामद गरेको हो।
जिल्ला प्रहरी कार्यालय बाराका अनुसार लागुऔषध ओसारपसार भइरहेको सूचनाका आधारमा प्रहरी र सशस्त्र प्रहरीको संयुक्त टोलीले उक्त क्षेत्रमा निगरानी बढाएको थियो। प्रहरी चौकी श्रीनगर बैरियाबाट असई राजेश सिंह तथा सशस्त्र प्रहरी बल, नेपाल बीओपी बेनौलीबाट सई श्यामबहादुर खत्रीको नेतृत्वमा संयुक्त टोली धानखेत क्षेत्रमा एम्बुस थापेर निगरानीमा खटिएको थियो।
रातिको समयमा धानखेतको आली हुँदै केही व्यक्तिहरू शंकास्पद अवस्थामा आइरहेको देखिएपछि प्रहरीले उनीहरूमाथि निगरानी बढाएको थियो। प्रहरीका अनुसार करिब ८ देखि ९ जना अपरिचित व्यक्ति पिठ्युँमा झोलाजस्तो बनाएर सामान बोकी आउँदै गरेको अवस्थामा देखिएका थिए।
प्रहरी टोलीले उनीहरूलाई रोक्न तथा नियन्त्रणमा लिन खोज्दा ती व्यक्तिहरूले बोकेर ल्याएको सामान धानखेतमै फालेर अँध्यारोको फाइदा उठाउँदै फरार भएका थिए।
त्यसपछि प्रहरीले घटनास्थलमा खोजतलास गर्दा ९ वटा पोकामा राखिएको कुल १५१ किलो गाँजा फेला पारेको जिल्ला प्रहरी कार्यालय बाराले जनाएको छ।
बरामद गाँजा आवश्यक अनुसन्धान तथा कानुनी कारबाहीका लागि इलाका प्रहरी कार्यालय सिम्रौनगढ, बारामा ल्याइएको प्रहरीले जनाएको छ।
ठूलो परिमाणमा गाँजा बरामद भए पनि ओसारपसारमा संलग्न व्यक्तिहरू भने तत्काल पक्राउ पर्न सकेका छैनन्। प्रहरीले फरार व्यक्तिहरूको पहिचान तथा खोजी कार्य तीव्र बनाएको जनाएको छ।
सीमा क्षेत्र नजिकका ग्रामीण तथा खेतबारीका बाटो प्रयोग गरी लागुऔषध ओसारपसार हुनसक्ने सम्भावनालाई ध्यानमा राख्दै प्रहरीले निगरानी तथा गस्ती बढाएको छ। बरामद भएको गाँजाको स्रोत, गन्तव्य तथा घटनामा संलग्न अन्य व्यक्तिहरूबारे समेत अनुसन्धान भइरहेको प्रहरीले जनाएको छ।
प्रहरीका अनुसार फरार व्यक्तिहरू पक्राउ परेपछि गाँजा कहाँबाट ल्याइएको थियो, कहाँ लैजाने तयारी थियो र यसको कारोबारमा संगठित समूहको संलग्नता थियो वा थिएन भन्ने विषय खुल्ने अपेक्षा गरिएको छ।
