वीरगंज । प्याब्सन वीरगंजकाे आयोजनामा सञ्चालन भइरहेको अन्तरविद्यालय हाजिरीजवाफ प्रतियोगिता ‘प्याब्सन स्मार्ट माइन्ड्स २०८३’ अन्तर्गत सिनियरतर्फको फाइनलमा पाँच विद्यालय प्रवेश गरेका छन् ।
क्वालिफिकेशन राउन्डबाट ग्रुप ‘ए’ बाट गोल्डेन फ्युचर सेकेन्डरी स्कुल, ग्रुप ‘बी’ बाट मास्कट एकेडेमी, ग्रुप ‘सी’ बाट साउथ जोन सेकेन्डरी स्कुल, ग्रुप ‘डी’ बाट रोयल एकेडेमी र ग्रुप ‘ई’ बाट ज्ञानज्योति माध्यमिक विद्यालय फाइनलमा छनोट भएका हुन् ।
क्वालिफिकेशन राउन्डमा पाँच समूहबाट कुल ३१ वटा विद्यालयको सहभागिता रहेको थियो । ग्रुप ‘बी’ मा सात विद्यालय तथा अन्य चार समूहमा छ–छ विद्यालय सहभागी थिए । प्रतिस्पर्धामा आफ्ना समूहका अन्य विद्यालयलाई पछि पार्दै पाँच विद्यालयले फाइनलको यात्रा तय गरेका हुन् ।
प्रतियोगिताको सिनियरतर्फको फाइनल भिडन्त भदौ २३ गते बिहान १० बजेदेखि वीरगंजस्थित डिएभी स्कुलमा हुने भएको छ । उपाधिका लागि फाइनलमा छनोट भएका पाँच विद्यालयबीच प्रतिस्पर्धा हुने प्रतियोगिताका संयोजक तथा प्याब्सन वीरगंजका सचिव अमित आलोकले जानकारी दिए ।
यसअघि वीरगंजको ज्योतिनगरस्थित लिटल एन्जल्स स्कुलमा आयोजित क्वालिफिकेशन राउन्डको सुरुवातअघि औपचारिक उद्घाटन कार्यक्रम सम्पन्न भएको थियो । कार्यक्रममा प्याब्सन पर्साका अध्यक्ष सरोज प्रसाद चौधरी तथा प्याब्सन वीरगंजका अध्यक्ष राहुल श्रीवास्तवले संयुक्त रूपमा गमलामा पानी हालेर प्रतियोगिताको औपचारिक उद्घाटन गरेका थिए ।
उद्घाटन कार्यक्रमको सहजीकरण प्याब्सन पर्साका सचिव अशोक सङ्ग्रौलाले गरेका थिए । कार्यक्रममा प्याब्सन वीरगंजका नगर सदस्य विजय बल र सुमित कलवार, प्रेस कोर्डिनेटर दीपु बर्णवाल, लिटल एन्जल्स स्कुलका प्रधानाध्यापक सन्नी पाख्रिन तथा विद्या सदन माध्यमिक विद्यालयका प्रधानाध्यापक लालबहादुर गुरुङलगायतको उपस्थिति रहेको थियो ।
