ऊर्जामन्त्री घिसिङको पहिलो निर्णय : विद्युतकाे डेडिकेटेड लाइनको बक्यौता रकम असुल्ने
काठमाडौं । नवनियुक्त ऊर्जा, जलस्रोत तथा सिँचाई मन्त्री कुलमान घिसिङले सोमबार पदभार ग्रहण गर्दै नेपाल विद्युत प्राधिकरणको डेडिकेटेड लाइनको बक्यौता रकम असुल्ने निर्णय गरेका छन् ।
घिसिङले विद्युत् प्राधिकरणको कार्यकारी निर्देशक हुँदा पनि बक्यौता रकम उठाउने प्रयास गरेका थिए, तर तत्कालीन सरकारले यसमा रोक लगाएको थियो । उनले आफ्नो पहिलो निर्णयमा खादा–माला तथा अबिर नलिने घोषणा पनि गरेका छन् ।
पूर्वप्रधानमन्त्री केपी शर्मा ओली नेतृत्वको सरकारले गत चैत्रमा उनलाई प्राधिकरणको कार्यकारी निर्देशकबाट हटाएको थियो । अहिले प्राधिकरणको कार्यकारी निर्देशकको जिम्मेवारी हितेन्द्रदेव शाक्यले सम्हालिरहेका छन् ।
नवनियुक्त मन्त्री घिसिङको निर्णयलाई प्राधिकरणमा बक्यौता रकम उठाउने पहललाई पुनः गति दिने सकारात्मक कदमका रूपमा हेरिएको छ ।
बैंकिङ प्रणाली ठिक छ, आक्रमणबाट नआत्तिन गभर्नर पौडेलको आग्रह
काठमाडौं । नेपाल राष्ट्र बैंकका गभर्नर प्रा. डा. विश्व पौडेलले जेन–जी आन्दोलनका क्रममा बैंकका शाखा र एटिएममा आक्रमण भए पनि देशको बैंकिङ प्रणाली ठिकठाक रहेको बताएका छन् । सोमबार नवनियुक्त अर्थमन्त्री रामेश्वर खनालको पदभार ग्रहण कार्यक्रममा सहभागी भएपछि बोल्दै गभर्नर पौडेलले यस्तो जानकारी दिएका हुन् ।
उनका अनुसार ६८ वटा बैंक शाखामा आक्रमण र ६९ वटा एटिएममा केही असर पुगेको भए पनि बैंकिङ प्रणालीका प्रणालीगत कामकाजमा अवरोध नआएको छ । “आन्दोलनकारीहरूले बैंकहरू नै टार्गेट गरेको जस्तो देखिँदैन,” पौडेलले भने ।
गभर्नर पौडेलले अहिलेको परिस्थितिमा सबैको मनोबल घटेको भए पनि पुनः मनोबल बढाउनु पर्ने आवश्यकता रहेको बताए । “यो घटनाअघि पनि चुनौतीहरू थिए, अहिले समस्या थपिएको छ । तर समाधानका लागि तयारी गर्नुपर्छ,” उनले भने ।
अनुभवी अर्थमन्त्री रामेश्वर खनाल आएकाले बैंकिङ क्षेत्रमा काम गर्न सजिलो हुने उनको अपेक्षा छ । उनले ‘जे भएको छ त्यसबाट धेरै नआत्ती काम गर्न’ आग्रह पनि गरे ।
वीरगंजमा निषेधाज्ञा हट्यो, रात्रीकालीन कर्फ्यू कायम
वीरगंज । जिल्ला प्रशासन कार्यालय पर्साले जारी गरेको सूचनाअनुसार वीरगंज महानगरपालिकाका केही क्षेत्रमा लागू गरिएको निषेधाज्ञा साेमबारदेखि हटाइएको छ । शान्ति सुरक्षा सुदृढ हुँदै गएको र नागरिकको स्वतन्त्र आवागमन, व्यापार व्यवसाय र चाडपर्व मनाउन सहज वातावरण बनाउने उद्देश्यले यो निर्णय गरिएको हो ।
प्रमुख जिल्ला अधिकारी तोया नारायण सुवेदीद्वारा जारी सूचनामा बिहान ५:०० बजेदेखि साँझ ९:०० बजेसम्म लागू भएको निषेधाज्ञा आजदेखि हटाइएको उल्लेख छ । तर, यसअघि तोकिएका क्षेत्रमा लागू गरिएको दङ्गाग्रस्त क्षेत्रको आदेश र रात्रीकालीन कर्फ्यू भने अर्को आदेश नभएसम्म निरन्तर रहने जनाइएको छ ।
सूचनामा भनिएको छ, “शान्ति सुरक्षाको अवस्था थप सुदृढ हुनासाथ आदेशलाई पुनर्विचार गरिनेछ ।” जिल्ला सुरक्षा समितिको मिति २०८२।०५।२९ गतेको निर्णयानुसार वीरगंजकाे घण्टाघर चौकदेखि गण्डक चौकसम्मको राजमार्ग क्षेत्र र कारागार कार्यालय, पर्सा र सोको कम्पाउण्ड क्षेत्र भित्र दङ्गाग्रस्त क्षेत्र घोषणा गरिएको छ।
जिल्लास्थित सबै कार्यालयले आइतबारदेखि नै सेवा निरन्तर रूपमा उपलब्ध गराइरहेको र राष्ट्रिय परिचयपत्रका लागि २०८२ साल भाद्र २४ गते टोकन लिएका सेवाग्राहीहरूलाई पहिलो प्राथमिकतामा सेवा दिने प्रशासनले जनाएको छ ।
जिल्ला प्रशासनले जनताको जीउधन र सार्वजनिक सम्पत्ति संरक्षणका लागि जारी गरिएका आदेशको प्रभावकारी कार्यान्वयनमा सहयोग गर्न सबैलाई हार्दिक अनुरोध गरेको छ ।
जेन–जी आन्दोलनका शहीदहरूको सम्मानमा राष्ट्रिय शोक मनाइने
काठमाडौं । जेन–जी आन्दोलनमा शहीद भएकाहरूको सम्मानमा सरकारले राष्ट्रिय शोक मनाउने निर्णय गरेको छ । गृहमन्त्री ओमप्रकाश अर्यालले पदबहालीलगत्तै सोमबार यसबारे घोषणा गरेका हुन् ।
उनका अनुसार शहीदहरूको सम्मानमा सरकारी कार्यालयहरूमा राष्ट्रिय झण्डा आधा झुकाइनेछ । शोक दिवस कुन दिन मनाउने भन्ने विषय मन्त्रीपरिषद्ले छिनोफानो गर्नेछ ।
यसैगरी, आन्दोलनमा मृतकका परिवारलाई एक लाख–एक लाख रुपैयाँका दरले किरिया खर्च दिने निर्णय पनि गृहमन्त्रीको छ । शव व्यवस्थापनका लागि सरकारले नि:शुल्क सवारीसाधन उपलब्ध गराउने र विकट ठाउँमा हेलिकप्टरमार्फत शव पुर्याउने निर्णय गरिएको छ ।
गृहमन्त्री अर्यालको यो निर्णयलाई जेन–जी आन्दोलनको मागअनुरूप सरकारको पहिलो सकारात्मक कदमका रूपमा हेरिएको छ ।
टुक्रे आयोजना रोक्ने अर्थमन्त्री खनालको पहिलो निर्णय
काठमाडौं । नवनियुक्त अर्थमन्त्री रामेश्वर खनालले सोमबार पदभार ग्रहण गरेका छन् । पदभार ग्रहणअघि अर्थ मन्त्रालयमा कर्मचारीहरूले उनलाई स्वागत गरेका थिए ।
पदभार ग्रहण गर्दै मन्त्री खनालले आफूलाई “माननीय” भनेर सम्बोधन नगर्न आग्रह गरे । उनले भने, “अबको प्राथमिकता युवाका माग पूरा गर्नु र निर्वाचन सम्पन्न गर्नु हो । त्यसैले अनावश्यक खर्च कटौती गर्न निर्णय गरिएको हो ।”
मन्त्री खनालले आफ्नो पहिलो निर्णयका रूपमा पूर्व तयारी नभएका र टुक्रे आयोजनाहरू कार्यान्वयन नगर्ने घोषणा गरेका छन् । उनले खर्चमा मितव्ययिता र नतिजामुखी नीति अपनाउने संकेत दिएका छन् ।
खनाल, घिसिङ र अर्यालले मन्त्रीको शपथ लिए, कसलाई कुन मन्त्रालयको जिम्मेवारी ?
काठमाडौं । अन्तरिम प्रधानमन्त्री सुशीला कार्कीको सिफारिसमा राष्ट्रपति रामचन्द्र पौडेलले सोमबार तीन जना मन्त्री नियुक्त गरेका छन् । सोमबार शीतल निवासमा आयोजित विशेष समारोहमा अर्थमन्त्री रामेश्वर खनाल, ऊर्जा, जलस्रोत तथा सिँचाइ र भौतिक पूर्वाधार तथा सहरी विकास मन्त्री कुलमान घिसिङ, गृह र कानुन, न्याय तथा संसदीय मामिला मन्त्री ओमप्रकाश अर्यालले पद तथा गोपनीयताको शपथ ग्रहण गरे ।
शपथग्रहण समारोहमा उपराष्ट्रपति रामसहाय प्रसाद यादव, प्रधानमन्त्री सुशीला कार्की, प्रधानन्यायाधीश प्रकाशमान सिंह राउत, राष्ट्रियसभा अध्यक्ष नारायणप्रसाद दाहाल, पूर्वप्रधानमन्त्री डा. बाबुराम भट्टराईलगायत उच्च पदस्थ अधिकारीहरूको उपस्थिती थियो ।
पूर्वअर्थ सचिव खनालले अर्थ मन्त्रालयको जिम्मेवारी सम्हालेका छन् भने नेपाल विद्युत प्राधिकरणका पूर्वकार्यकारी निर्देशक घिसिङलाई ऊर्जा, जलस्रोत, भौतिक पूर्वाधार र सहरी विकास मन्त्रालयको जिम्मेवारी दिइएको छ । अधिवक्ता ओमप्रकाश अर्याललाई गृह तथा कानुन, न्याय र संसदीय मामिला मन्त्रालयको जिम्मेवारी दिइएको हो ।
शीतल निवासको खण्डहरअगाडि पाल टाँगेर शपथग्रहण कार्यक्रम गरिएको थियो । नयाँ मन्त्रीहरूमध्ये खनाल र घिसिङ विगतमा सुशासन र कार्यक्षमताका कारण चर्चित छन् भने अधिवक्ता अर्याल जेन–जी आन्दोलनका मागलाई कानुनी र राजनीतिक निष्कर्षमा पुर्याउने अभियन्ता हुन् ।
प्रधानमन्त्री कार्कीले आन्दोलनकारी जेन–जी युवासँग निरन्तर परामर्श गर्दै अन्य मन्त्रीहरूको छनोट प्रक्रिया अगाडि बढाइरहेकी छिन् । जेन–जी आन्दोलनको मागअनुसार पूर्वप्रधानन्यायाधीश कार्की अन्तरिम प्रधानमन्त्री नियुक्त भएकी थिइन् र प्रधानमन्त्री बनेको तेस्रो दिनमै उनले नयाँ मन्त्रीहरू छानेकी हुन् ।
जगरनाथपुर ढाँटमा अवैध असुली अझै रोकिएन, विरोध गर्ने वृद्धमाथि कुटपिट
वीरगंज । जेन–जी आन्दोलनपछि पनि वीरगंज महानगरपालिका–२२ जगरनाथपुर चोकस्थित ढाँटकाे अवैध असुली रोकिने संकेत देखिएको छैन। अमित ठेक्का पट्टाका कर्मचारीद्वारा कर असुलीका नाममा हुँदै आएको अवैध असुलीकाे विरोध गर्ने क्रममा ढाँटका कर्मचारीले एक जेष्ठ नागरिकमाथि कुटपिट समेत गरेका छन्।
स्थानिय प्रत्यक्षदर्शीका अनुसार शनिबार साँझ ढाँटका कर्मचारीहरूले एक भारतीय मालवाहक गाडी रोकेर पैसा माग्दा सवारी चालकले नदिएपछि हातपात भएको थियो । सो घटनामा बीचबचाउ गर्न पुगेका ६० वर्षीय भागरथ प्रसाद यादवसमेत कुटपिटमा परी घाइते भएका छन् । यादवको वीरगंजस्थित नारायणी अस्पतालमा उपचारपछि घर फर्कीएका छन् ।
महानगरपालिकाले “जडिबुटी, कबाडी तथा जीवजन्तु कर” उठाउने जिम्मा अमित ठेक्का पट्टालाई दिए पनि सम्झौताअनुसार उत्पादन संकलन तथा व्यवसायिक कारोबारमा मात्र कर लिन पाउने व्यवस्था छ । तर ठेकदार कम्पनीले नियम विपरीत भारतीय मालवाहक तथा नेपाली सवारीसाधन दुवैबाट प्रतिगाडी ४ सयदेखि ७ सय रुपैयाँसम्म असुली गर्दै आएको स्थानीयले बताएका छन्।
यसअघि पनि वीरगंजबाट नयाँ जस्ता खरिद गरी जगरनाथपुर अटोमार्फत लैजाने क्रममा ढाँटका कर्मचारीले नियम विपरीत ७६५ रुपैयाँ कर असुली गरी विवाद भएको थियो । यस्ता विवादहरु बारम्बार भइरहँदा पनि सम्बन्धित निकायकाे ध्यान पुग्न सकेकाे छैन् । अहिले विषम प्रस्थिति भन्दा पहिला पनि विभिन्न संचारमाध्यममा समाचार बारम्बार प्रकाशन हुँदा समेत सराेकारवालाकाे ध्यान पुग्न सकेकाे थिएन ।
स्थानीय अमरप्रसाद यादवले अवैध असुली रोक्न वीरगंज महानगरपालिकामा लिखित निवेदन दर्ता पनि गएका छन् भने जिल्ला प्रशासन कार्यालय र जिल्ला प्रहरी कार्यालय पर्सालाई माैखिक जानकारी समेत गराएका छन् । शनिबारकाे घटनापछि उनले आइतबार दाेषी उपर कारवाहीकाे माग गर्दै आइतबार जिल्ला प्रहरी कार्यालयमा लिखित निवेदन समेत दर्ता गराएका छन् ।
जेन–जीको मागअनुसार जनमत पार्टी सुधार गर्दै अगाडी बढने
काठमाडौं । जनमत पार्टीको नियमित केन्द्रीय सचिवालय बैठक आइतबार पार्टी कार्यालयमा सम्पन्न भएको छ। बैठकले जेन–जी आन्दोलनमा शहादत प्राप्त भएकाप्रति श्रद्धाञ्जली र मृतक परिवारप्रति हार्दिक समवेदना व्यक्त गरेको छ।
बैठकमा जेन–जी आन्दोलनको मागलाई ‘नौलो गणतन्त्र’को अवधारणाको रूपमा पहिलादेखि उठाइए पनि राज्यले सुनुवाइ नगरेको कारण अन्ततः आन्दोलन विस्फोट भएको निष्कर्ष निकालिएको छ।
बैठकले आन्दोलनमा घाइते भएकाहरूको उपचार खर्च सरकार स्वयंले व्यहोर्नुपर्नेमा जोड दिँदै आन्दोलनलाई दीर्घकालीन रूपमा सफल बनाउनुपर्ने प्रस्ताव समेत पारित गरेको छ।
त्यसैगरी, बैठकले जेन–जी युवाहरूको मागअनुसार पार्टीभित्र आन्तरिक सुधार गर्दै युवालाई प्राथमिकता दिने प्रतिबद्धता जाहेर गरेको छ। जनमत पार्टीका अध्यक्ष डा. सिके राउतकाे अध्यक्षतामा बसेकाे बैठकमा पार्टीका सचिवालय सदस्यहरुकाे उपस्थिती रहेकाे थियाे ।
भरतपुर महानगरमा दुई अर्बभन्दा बढीको क्षति
चितवन । जेनजी प्रदर्शनका क्रममा भरतपुर महानगरपालिकामा रु दुई अर्बभन्दा बढीको क्षति भएको आकलन गरिएको छ । यही भदौ २४ गते महानगर कार्यालय र वडा कार्यालयमा आक्रमण गरिएको थियो ।
महानगरपालिकाका प्रमुख प्रशासकीय अधिकृत लक्ष्मीप्रसाद पौडेलका अनुसार क्षतिको विवरण सङ्कलन भइरहेको जानकारी दिँदै प्रारम्भिक रुपमा रु दुई अर्बभन्दा बढीको क्षति आकलन गरिएको छ । प्रदर्शनका क्रममा भरतपुर महानगरपालिकाको कार्यालय आगलागीबाट पूर्णरुपमा क्षतिग्रस्त भएको छ । महानगरको स्वास्थ्य र कृषि कार्यालयमा सामान्य क्षति पुगेको छ ।
महानगरपालिकाका २९ मध्ये २० वटा वडामा क्षति पुगेको छ । वडा नं २, ९, ११, १२, २०, २५, २७, २८ र २९ बाहेकका कतिपय वडामा पूर्ण रुपमा क्षति पुगेको छ भने कतिपयमा आंशिक क्षति भएको छ ।
पौडेलका अनुसार २६ वटा गाडी, पाँच वटा मोटरसाइकल र एउटा स्कुटर जलेर नष्ट भएका छन् । जलेका गाडीमध्ये दुई वटा दमकल, एउटा ग्रेडर, दुई वटा कम्प्याक्टर, एउटा ब्रुमर, पानी बोक्ने गाडी एक र सेफ्टी ट्यांकी सफाई गाडी एउटा रहेका छन् ।
महानगरपालिकाका गाडीमध्ये प्रमुख, उपप्रमुख र प्रमुख प्रशासकीय अधिकृत चढ्ने गाडी बाहिर राखिएकाले सुरक्षित रहेका छन् । त्यस्तै दुईवटा जेसिबी, एउटा कम्प्याक्टर, एउटा दमकल र एउटा ट्याक्टर सुरक्षित रहेको उहाँले जानकारी दिनुभयो ।
महानगरपालिकाका बरिष्ठ शाखा अधिकृत झलककुमार श्रेष्ठका अनुसार स्टोरमा रहेका के कति सामान जलेका छन् भन्ने बारेमा तथ्याङ्क लिने काम भइरहेको छ । कार्यालयमा प्रयोग हुने फर्निचर, कम्युटर, टेलिभिजन, इन्भर्टर, ब्याट्री, कागजपत्रलगायतका सामग्री जलेर नष्ट भएका छन् । उहाँका अनुसार महानगरवासीलाई वितरणका लागि ल्याइएको दुई हजार थान विद्युतीय चुल्हो जलेर र चोरी भएका छन् ।
यसका अतिरिक्त अन्य सामग्रीहरु समेत चोरी भएका छन् । महानगरपालिका जलाउने र तोडफोड गर्ने समूहले महानगर प्रमुख रेनु दाहाल र उपप्रमुख चित्रसेन अधिकारीको घर समेत जलाएर पूर्णरुपमा क्षति पु¥याएका छन् । यस्तै महानगरपालिकाका विज्ञ सल्लाहकार सुरेशचन्द्र अधिकारीको घर जलाउने र लुटपाट भएको छ ।
प्रमुख प्रशासकीय अधिकृत पौडेलले सेवाग्राहीहरुका सिफारिस र अत्यावश्यक काम आजैबाट गर्न लागिएको बताउनुभयो । जे सकिन्छ ती सेवाहरु दिन थालेको उहाँले बताउनुभयो । क्षतिको मूल्याङ्कन गरेर मर्मत थालिने उहाँले बताउनुभयो ।