काठमाडौं । जनमत पार्टीको नियमित केन्द्रीय सचिवालय बैठक आइतबार पार्टी कार्यालयमा सम्पन्न भएको छ। बैठकले जेन–जी आन्दोलनमा शहादत प्राप्त भएकाप्रति श्रद्धाञ्जली र मृतक परिवारप्रति हार्दिक समवेदना व्यक्त गरेको छ।
बैठकमा जेन–जी आन्दोलनको मागलाई ‘नौलो गणतन्त्र’को अवधारणाको रूपमा पहिलादेखि उठाइए पनि राज्यले सुनुवाइ नगरेको कारण अन्ततः आन्दोलन विस्फोट भएको निष्कर्ष निकालिएको छ।
बैठकले आन्दोलनमा घाइते भएकाहरूको उपचार खर्च सरकार स्वयंले व्यहोर्नुपर्नेमा जोड दिँदै आन्दोलनलाई दीर्घकालीन रूपमा सफल बनाउनुपर्ने प्रस्ताव समेत पारित गरेको छ।
त्यसैगरी, बैठकले जेन–जी युवाहरूको मागअनुसार पार्टीभित्र आन्तरिक सुधार गर्दै युवालाई प्राथमिकता दिने प्रतिबद्धता जाहेर गरेको छ। जनमत पार्टीका अध्यक्ष डा. सिके राउतकाे अध्यक्षतामा बसेकाे बैठकमा पार्टीका सचिवालय सदस्यहरुकाे उपस्थिती रहेकाे थियाे ।
