काठमाडौं । नवनियुक्त ऊर्जा, जलस्रोत तथा सिँचाई मन्त्री कुलमान घिसिङले सोमबार पदभार ग्रहण गर्दै नेपाल विद्युत प्राधिकरणको डेडिकेटेड लाइनको बक्यौता रकम असुल्ने निर्णय गरेका छन् ।
घिसिङले विद्युत् प्राधिकरणको कार्यकारी निर्देशक हुँदा पनि बक्यौता रकम उठाउने प्रयास गरेका थिए, तर तत्कालीन सरकारले यसमा रोक लगाएको थियो । उनले आफ्नो पहिलो निर्णयमा खादा–माला तथा अबिर नलिने घोषणा पनि गरेका छन् ।
पूर्वप्रधानमन्त्री केपी शर्मा ओली नेतृत्वको सरकारले गत चैत्रमा उनलाई प्राधिकरणको कार्यकारी निर्देशकबाट हटाएको थियो । अहिले प्राधिकरणको कार्यकारी निर्देशकको जिम्मेवारी हितेन्द्रदेव शाक्यले सम्हालिरहेका छन् ।
नवनियुक्त मन्त्री घिसिङको निर्णयलाई प्राधिकरणमा बक्यौता रकम उठाउने पहललाई पुनः गति दिने सकारात्मक कदमका रूपमा हेरिएको छ ।
