काठमाडौँ । राष्ट्रपति रामचन्द्र पौडेलसमक्ष नेपाल सरकारका नवनियुक्त चार मन्त्रीहरूले आज पद तथा गोपनीयताको शपथ ग्रहण गरेका छन्।

राष्ट्रपति कार्यालय शीतल निवासमा आयोजित विशेष समारोहमा राष्ट्रपति पौडेलले अनिलकुमार सिन्हा, महाविर पुन, मदनकुमार परियार र जगदीश खरेललाई शपथ गराए ।

नवनियुक्त मन्त्रीहरूमध्ये अनिलकुमार सिन्हाले उद्योग, वाणिज्य तथा आपूर्ति, कानुन न्याय तथा संसदीय मामिला र भूमिव्यवस्था, सहकारी तथा गरिबी निवारण मन्त्रालय, महाविर पुनले शिक्षा, विज्ञान तथा प्रविधि मन्त्रालय, मदनकुमार परियारले कृषि तथा पशुपन्छी मन्त्रालय र जगदीश खरेलले सञ्चार तथा सूचना प्रविधि मन्त्रालयको जिम्मेवारी सम्हालेका छन्।

शपथ समारोहमा उपराष्ट्रपति रामसहायप्रसाद यादव, प्रधानमन्त्री सुशीला कार्की, प्रधानन्यायाधीश प्रकाशमानसिंह राउत, सभामुख देवराज घिमिरे, राष्ट्रिय सभाका अध्यक्ष नारायणप्रसाद दाहाललगायत संवैधानिक निकायका प्रमुख तथा सुरक्षा निकायका अधिकारीहरूको उपस्थिति थियो।

राष्ट्रपति पौडेलले अन्तरिम सरकारकी प्रधानमन्त्री सुशीला कार्कीको सिफारिसमा आइतबार यी मन्त्रीहरूलाई नियुक्त गरेका हुन्। कानुन व्यवसायी पृष्ठभूमिका मन्त्री सिन्हा सर्वोच्च अदालतका पूर्वन्यायाधीश हुन् भने महाविर पुन राष्ट्रिय आविष्कार केन्द्रका प्रमुख तथा दुर्गम क्षेत्रमा इन्टरनेट सेवा विस्तारका अभियन्ता हुन्। यसैगरी मन्त्री परियार कृषि विज्ञ र मन्त्री खरेल वरिष्ठ पत्रकार हुन्।

यसअघि गत भदौ ३० गते रामेश्वर खनाल, कुलमान घिसिङ र ओमप्रकाश अर्याल मन्त्री बनेका थिए भने बाँकी मन्त्रालयको जिम्मेवारी प्रधानमन्त्री कार्कीले सम्हाल्दै आएकी छन्।

जेन–जी समूहको आन्दोलनपछि उत्पन्न परिस्थितिका बीच राष्ट्रपति पौडेलले भदौ २७ गते पूर्वप्रधानन्यायाधीश सुशीला कार्कीलाई अन्तरिम सरकारको प्रधानमन्त्रीमा नियुक्त गरेका थिए।

दैलेख । अख्तियार दुरुपयोग अनुसन्धान आयोगको कर्णाली प्रदेश कार्यालयले दैलेखको डुङ्गेश्वर गाउँपालिकाका लेखा प्रमुखलाई घुससहित पक्राउ गरेको छ।

गाउँपालिकाका सातौँ तहका वरिष्ठ लेखा अधिकृत टङ्कबहादुर कार्कीलाई सुर्खेतको वीरेन्द्रनगर नगरपालिका–९ मङ्गलगडी चोकबाट आइतबार राति अख्तियारको टोलीले नियन्त्रणमा लिएको हो । उनी सेवाग्राहीसँग रु १ लाख घुस लिएको अवस्थामा पक्राउ परेका हुन् ।

अख्तियारका अनुसार गाउँपालिकाको सडक स्तरोन्नति तथा निर्माण सम्पन्नको अन्तिम भुक्तानी दिने क्रममा सेवाग्राहीसँग घुस लिएको रकमसहित उनलाई पक्राउ गरिएको हो ।

अख्तियारको केन्द्रीय कार्यालयका प्रवक्ता राजेन्द्रकुमार पौडेलका अनुसार पक्राउ परेका कार्कीमाथि आवश्यक अनुसन्धान सुरु गरिएको छ ।