सेढवा । पर्सा जिल्लाको ठोरी गाउँपालिकामा स्वर्गीय समाजसेवी रामबहादुर श्रेष्ठको स्मृतिमा आयोजना हुने चौथो “ठोरी गोल्ड कप” फुटबल प्रतियोगिता यस वर्ष निर्धारित समयमै असोज १३ गते फुलपातीको दिनदेखि सुरु हुने भएको छ।
प्रतियोगितामा उद्घाटन खेलमा कलकत्ता र झापाको टोली आमनेसामने हुने हुँदा पहिलो दिनको खेल विशेष रोचक हुने अपेक्षा गरिएको आयोजक प्रतिभा यूवा क्लब बिजयबस्तीका अध्यक्ष गोपी श्रेष्ठले बताए । प्रतियोगितालाई व्यवस्थित गर्न करिब दुई महिनादेखि तयारी भइरहेको छ ।
मैदानको एक भागमा करिब ४०० दर्शक बस्ने प्याराफिट निर्माण गरिएको छ, जसको टिकट लिएर खेल हेर्न सकिनेछ भने बाँकी भागबाट निःशुल्क अवलोकन गर्न सकिनेछ । प्रतियोगिताको प्रथम पुरस्कार ३ लाख ५० हजार रुपैयाँ र द्वितीय पुरस्कार १ लाख ७५ हजार रुपैयाँ तोकिएको छ ।
चितवन, हेटौंडा, लालबन्दी, वीरगञ्ज, बारा, झापा र भारतको कलकता लगायतका राष्ट्रिय तथा अन्तर्राष्ट्रिय टोलीहरूको सहभागिताले प्रतियोगिता थप प्रतिस्पर्धात्मक र आकर्षक हुने आयोजक समितिले जानकारी दिएको छ। फाइनल खेल कार्तिक ४ गते आयोजना गरिनेछ।
