सेढवा । जिराभवानी गाउँपालिकामा आयोजित गाउँपालिका स्तरीय नकआउट फुटबल प्रतियोगिताको उपाधि एभरेष्ट क्लब परसवाले जितेको छ।
सेढवाको खेलमैदानमा भएको फाइनल खेलमा एभरेष्ट क्लब परसवाले ब्रह्मबाबा युवा स्पोर्ट्स सहजानपुरलाई रोमाञ्चक टाई ब्रेकरमा पराजित गरेको हो।
बिजेता बनेको एभरेष्ट क्लब परसवालाई आयोजक प्रगतिशील युवा समाज सेढवाले नगद १० हजार रुपैयाँसहित ट्रफी प्रदान गरियो भने उपविजेता सहजानपुरलाई नगद ५ हजार रुपैयाँ र ट्रफी प्रदान गरिएको थियो।
निर्धारित समयमा दुबै टिमले गोल गर्न नसकेपछि खेल टाई ब्रेकरमा पुगेको थियो। सो खेलमा परसवाको जर्सी नं १७ का आदित्य चौधरी म्यान अफ द म्याच घोषित भए भने सहजानपुरका जर्सी नं ७ का राजेश माझी म्यान अफ द सिरिज बने।
गाउँपालिकाभित्रका १० वटा टिम सहभागी रहेका सो प्रतियोगितामा पालिकाभित्रका खेलाडी मात्र सहभागी हुने मापदण्ड तय गरिएको आयोजकले जनाएको छ।
