सेढवा । बडा दशैं प्रारम्भ भइसकेको र तिहार तथा छठ पर्व नजिकिँदै जाँदा पर्साको ग्रामीण भेगमा तास–जुवामा संलग्न हुनेको संख्या उल्लेख्य रूपमा बढेको छ ।
ग्रामिण भेगकाे ठोरी, जिराभवानी, पटेर्वासुगौली, सखुवाप्रसौनी गाउँपालिका र पर्सागढी नगरपालिकाका विभिन्न स्थानमा पछिल्लो समय जुवाको लत तीव्र बनेको स्थानीयहरूले बताएका छन्।
स्थानीयका अनुसार मुख्यतः युवाहरू तास–जुवामा संलग्न भए पनि अन्य उमेर समूहका मानिसहरू पनि उत्तिकै आकर्षित हुने गरेका छन् । जुवाडेहरूले गोप्य तथा सुरक्षित ठाउँमा रातभर खेल सञ्चालन गर्ने, होहल्ला र अपशब्द प्रयोग गर्ने भएकाले वरपरका बासिन्दाले असहज र असुरक्षित महसुस गरिरहेको गुनासो छ।
जुवामा ठूलो रकमको हारजित हुने भएकाले कतिपय परिवारमा कलह बढेको छ भने ऋणको बोझ सहन नसक्दा आत्महत्यासम्म गर्ने घटना सार्वजनिक भएका छन्।
यसैबीच, जुवा सञ्चालन गर्ने गिरोहलाई प्रहरी प्रशासनकै संरक्षण रहेको आरोप स्थानीय बुद्धिजीवीहरूले लगाएका छन्। स्रोतका अनुसार जुवाखेल सम्बन्धी गिरोहले साप्ताहिक रूपमा प्रहरीलाई नजराना बुझाउने गरेका छन्।
