काठमाडौं । प्रभु साह नेतृत्वको आम जनता पार्टी (आजपा)ले प्रदेश नेतृत्व हेरफेर गर्दै व्यवस्था परिवर्तनका लागि जनदबाबसहित निर्वाचनमा सहभागी हुने घोषणा गरेको छ।
काठमाडौंको कमलादीस्थित नेपाल प्रज्ञा भवनमा असोज ४ र ५ गते बसेको केन्द्रीय कमिटी र पदाधिकारी बैठकका निर्णय सोमबार सार्वजनिक गर्दै आजपा प्रवक्ता चन्द्रभुषण साहले पार्टी छठपर्वपछि व्यवस्था परिवर्तनका लागि आन्दोलनसहित निर्वाचनमा सहभागी हुने जानकारी दिएका हुन्।
बैठकले प्रदेश इन्चार्ज, सहइन्चार्ज र अध्यक्षहरूमा हेरफेर गर्दै नयाँ जिम्मेवारी तोकेको छ । कोशी प्रदेशमा तिलक थापा मगर (इन्चार्ज), जुरीलाल मोची (सहइन्चार्ज) र खगेन्द्र भण्डारी (अध्यक्ष), मधेस प्रदेशमा त्रिभुवन साह (इन्चार्ज), श्रीचन मुखिया (सहइन्चार्ज), उमेश कुशवाहा (अध्यक्ष), उपत्यका विशेष कमिटीमा चन्द्रभुषण साह (इन्चार्ज) र देवी पण्डित रेग्मी (अध्यक्ष) नियुक्त भएका छन्।
त्यस्तै सुदूरपश्चिममा सुमिना हुसेन (इन्चार्ज) र राम विष्ट (अध्यक्ष), बागमतीमा धनकुमारी मगर (इन्चार्ज), देवी पण्डित रेग्मी (सहइन्चार्ज) र पासाङ तामाङ (अध्यक्ष), गण्डकीमा तिलक थापा मगर (इन्चार्ज) र भोजराज त्रिपाठी (अध्यक्ष), लुम्बिनीमा त्रिभुवन साह (इन्चार्ज) र बिजय यादव (अध्यक्ष) तथा कर्णालीमा समिना हुसेन (इन्चार्ज) र आशा संजेल (अध्यक्ष) रहेका छन्।
आजपाले दशैं, दिपावली र छठ पर्वसम्म शुभकामना आदान–प्रदान, भेला, कमिटी गठन एवं पुनर्गठन गर्ने र छठपर्वपछि आन्दोलन र निर्वाचनमा सक्रिय रूपमा जाने निर्णय गरेको छ। पार्टीको मूल नारासहित अध्यक्ष प्रभु साहले पेश गरेको राजनीतिक प्रतिवेदन बैठकले सर्वसम्मतिले पारित गरेको छ।
बैठकले संविधानमा तत्काल सुधारको माग राख्दै १६ बुँदे प्रस्ताव जनतामाझ लैजाने, प्रत्यक्ष निर्वाचित प्रधानमन्त्री र मुख्यमन्त्रीको व्यवस्था संविधानमा गर्नुपर्ने लगायतका विषयमा जनदबाब सिर्जना गर्ने निर्णय गरेको छ।
त्यस्तै जेन–जी आन्दोलनको क्रममा भएको तोडफोड, आगजनी, ऐतिहासिक धरोहर र सम्पदाको विध्वंस तथा अबोध विद्यार्थीको हत्याप्रति दुःख व्यक्त गर्दै जिम्मेवार निकाय र अपराधीलाई कानुनी कारबाही गर्नुपर्ने माग गरेको छ।
संगठन विस्तार र एकताको अभियानलाई अघि बढाउँदै पार्टीले विचार र सिद्धान्त मिल्ने समूह तथा व्यक्तिसँग सहकार्य गर्न तिलक थापा मगरको नेतृत्वमा वार्ता समिति गठन गरेको छ। समितिमा चन्द्रभुषण साह, सुभाष साह, बिजय यादव र राम विष्ट सदस्य रहेका छन्।
