वीरगंज । खानेपानी तथा सरसफाई डिभिजन कार्यालय, डिभिजन नं. ४ कलैया, बारामा बोलपत्रको सूचना सार्वजनिक नगरी मिलेमतोमा ठेक्का लगाएको गम्भीर अनियमितता पुष्टि भएपछि अख्तियार दुरुपयोग अनुसन्धान आयोगले चारजनाविरुद्ध विशेष अदालत काठमाडौंमा आरोपपत्र दायर गरेको छ।
उजुरीका आधारमा गरिएको अनुसन्धानपछि आ.व. २०७९/८० मा निर्माणका २३ वटा बोलपत्रहरूको सूचना राष्ट्रिय दैनिकमा अनिवार्य रूपमा प्रकाशन गर्नुपर्ने भए पनि डिभिजन कार्यालयका तत्कालीन निमित्त डिभिजन प्रमुख किशोरी प्रसाद यादव, लेखापाल प्रदिप दास, सान्दर्भिक मिडिया नेटवर्क प्रा.लि.का प्रबन्धक निसान्त सिग्देल र प्रभाव दैनिकका बजार प्रबन्धक सन्तोषराज खरेलले आपसी मिलोमतोमा सूचना लुकाएर ठेक्का प्रक्रिया अघि बढाएको अख्तियारले जनाएको छ।
अख्तियारका अनुसार प्रभाव दैनिकको केवल एक प्रति मात्रै बनाइ कार्यालयमा पेस गरी बोलपत्र प्रकाशित भएको झुट्टा प्रमाण पेश गरिएको तथा त्यसकै आधारमा सान्दर्भिक मिडिया नेटवर्कलाई ३ लाख १६ हजार ५७० भुक्तानी गरिएको पाइएको छ । सो कम्पनीको खाताबाट ५० हजार प्रभाव दैनिकका बजार प्रबन्धकले लिएको प्रमाण पनि अनुसन्धानमा देखिएको छ।
प्रेस काउन्सिल नेपाल तथा प्रभाव पब्लिकेशन प्रा.लि.का पत्रहरूबाट सो मिति २०७९ फागुन २१ को कुनै पनि पृष्ठमा बोलपत्र सूचना प्रकाशित नभएको पुष्टि भएपछि अख्तियारले उक्त कार्यलाई भ्रष्टाचार निवारण ऐन, २०५९ को दफा ८(१)(ङ) बमोजिमको कसूर ठहर गर्दै बिगो असूलसहित कैद र जरिवानाको मागदाबी गर्दै आरोपपत्र दायर गरेको हो।
अख्तियारले मुख्य आरोपित यादव र दास, सहमतियारका रूपमा निसान्त सिग्देल तथा सन्तोषराज खरेलमाथि दफा २२ बमोजिम मुख्य कसूरदार सरह सजाय हुनुपर्ने मागसहित बिगो असूलको दाबी राखेको विज्ञप्तिमा उल्लेख छ।
अख्तियारका प्रवक्ता राजेन्द्र कुमार पौडेलले आइतबार विशेष अदालतमा आरोपपत्र दायर गरिएको जानकारी दिए ।
