वीरगञ्ज । ब्रम्हकुमारी राजयोग सेवा केन्द्र वीरगञ्ज क्षेत्रले आफ्नो स्थापना भएको ५० वर्ष पूरा भएको अवसरमा स्वर्ण जयन्ती भव्यताका साथ सम्पन्न गरेको छ। दुई दिने समारोहअन्तर्गत केन्द्रले विभिन्न सांस्कृतिक कार्यक्रमको आयोजना गर्दै, संस्थाका लागि भवन निर्माण तथा जग्गा दान गर्ने दाताहरूलाई विशेष सम्मान प्रदान गरियो।
यससँगै १ सय ८ कुमारीहरूको पूजा, स्नेह–मिलन कार्यक्रम तथा आध्यात्मिक प्रशिक्षण पनि आयोजनामा समावेश थिए।
कार्यक्रमकी प्रमुख अतिथि तथा ब्रम्हकुमारी राजयोग सेवा केन्द्र नेपालकी निर्देशक राजयोगिनी राजदादीले समाजमा फैलँदै गएको विकृति र नकारात्मक प्रवृत्तिलाई निरुत्साहित गर्न ब्रम्हकुमारी संस्थाले आध्यात्मिक ज्ञानमार्फत भाईचारा, सद्भाव र मेलमिलाप प्रवर्द्धन गर्दै आएको बताइन्। उनले व्यक्तिगत चरित्र निर्माण र सामाजिक परिवर्तनका लागि आध्यात्मिक अभ्यास आवश्यक रहेको उल्लेख गरिन्।
कार्यक्रममा सहभागिहरूले समाजमा सकारात्मक परिवर्तन ल्याउन ब्रम्हकुमारी संस्थाको भूमिकालाई महत्वपूर्ण बताउँदै, वर्तमान विषम परिस्थितिमा संस्थाले प्रदान गर्ने मार्गदर्शन अझ आवश्यक भएको धारणा राखे। वक्ताहरूले महिलाले नेतृत्व लिन नसक्ने भनाइलाई विश्वव्यापी रूपमा ब्रम्हकुमारी नेतृत्वले गलत साबित गर्न सफल भएको पनि उल्लेख गरे।
ब्रम्हकुमारी राजयोग सेवा केन्द्र वीरगञ्जकी प्रमुख रवीना श्रेष्ठले सबैको निरन्तर साथ र सहयोगका कारण केन्द्रले पाँच दशक पार गर्न सफल भएको बताउँदै, ब्रम्हकुमारी संस्था केवल आध्यात्मिक केन्द्र होइन, मानव जातिमा फैलिएको असन्तुष्टि, तनाव र अज्ञानता हटाइ चेतना अभिवृद्धि गर्ने एक ईश्वरीय विश्व विद्यालय भएको बताइन्।
स्वर्ण जयन्तीमा नेपालका विभिन्न क्षेत्र तथा भारतको राजस्थानस्थित माउण्ट आबू मुख्यालय र बिहार राज्यबाट सयौँ ब्रम्हकुमारीहरूको सहभागिता रहेको थियो। नेपालभर करिब १ हजार प्रशिक्षण केन्द्रमार्फत संस्था सक्रिय रूपमा सेवा सञ्चालन गरिरहेको छ।
