सेढवा । जोखिममा परेका बालबालिकाको सिकाइ सहज बनाउन दीप नेपालले ठोरी गाउँपालिका–४ स्थित नेपाल राष्ट्रिय आधारभूत विद्यालय, निर्मलबस्तीमा न्यानो पोसाक वितरण कार्यक्रम सम्पन्न गरेको छ। कार्यक्रममा ३२ जना विद्यार्थीलाई न्यानो पोसाक प्रदान गरिएको विद्यालयका प्रधानाध्यापक गोपीलाल श्रेष्ठले जानकारी दिएका छन्।
त्यस्तै, संस्थाले बिहीबार ठोरी गाउँपालिका–३ मा अवस्थित नेपाल राष्ट्रिय विद्यालयमा १० जना अति विपन्न विद्यार्थीलाई विद्यालय पोसाक वितरण गरेको छ। विद्यालयका अनुसार पोसाक प्राप्त गरेपछि विद्यार्थीको नियमित कक्षामा उपस्थितिमा सकारात्मक प्रभाव पर्ने अपेक्षा गरिएको छ।
विगत चार वर्षदेखि दीप नेपालले बेचबिखनमा पर्न सक्ने तथा विभिन्न जोखिममा रहेका बालबालिकालाई लक्षित गर्दै निरन्तर सिकाइ–सहजीकरण कार्यक्रम सञ्चालन गर्दै आएको छ। सोही क्रममा बालबालिकालाई विद्यालय जाने प्रेरणा बढाउन तथा उनीहरूको आवश्यकतालाई मध्यनजर गर्दै पोसाक वितरण गरिएको संस्थाले जनाएको छ।
यससँगै, दीप नेपालले ठोरी गाउँपालिकाभित्रका सबै विद्यालयका शिक्षकहरूलाई लक्षित गरी एकदिने अभिमुखीकरण कार्यक्रम पनि सञ्चालन गरेको छ। उक्त कार्यक्रममा जोखिम न्यूनिकरण, सिकाइ पद्धति सुधार तथा बालमैत्री शिक्षा वातावरण निर्माणबारे विशेष प्रशिक्षण प्रदान गरिएको थियो।
दीप नेपालका अध्यक्ष विष्णु सापकोटाका अनुसार संस्था आगामी दिनमा पनि समुदायमा प्रभाव पार्ने क्षेत्रमा निरन्तर काम गर्दै जाने प्रतिबद्धता व्यक्त गरेको छ।
