वीरगंज । नेपाल डेनटल एसोसिएसन पर्सा शाखाको आयोजनामा दन्त चिकित्सकहरूका लागि निरन्तर शिक्षा र मौखिक स्वास्थ्यप्रति जागरूकता अभिवृद्धि गर्ने उद्देश्यले ‘कन्टिन्युएस डेनटल एजुकेसन (सीडीई)’ कार्यक्रम सम्पन्न भएकाे छ।
कार्यक्रमका प्रमुख अतिथि नेपाल डेनटल एसोसिएसनका केन्द्रीय अध्यक्ष डा. अजय साहले दन्त चिकित्सा क्षेत्रमा निरन्तर सिकाइ, अनुसन्धान र आधुनिक प्रविधिको प्रयोग अपरिहार्य रहेको उल्लेख गरे । उनले मौखिक स्वास्थ्यलाई राष्ट्रिय स्वास्थ्य नीतिमा प्रभावकारी रूपमा समेटिनुपर्नेमा जोड दिँदै यस्ता कार्यक्रमले ज्ञान आदान–प्रदान र दन्त चिकित्सकबीच व्यावसायिक एकता बलियो बन्ने बताए ।
कार्यक्रममा विशेष अतिथिका रूपमा बङ्गलादेशका प्रख्यात दन्त विशेषज्ञ प्रा. डा. मुस्ताक एच. सत्तार र नेपालका चर्चित मुख तथा दन्त इम्प्लान्ट विशेषज्ञ डा. सीमान्त लामिछानेले मुख्य प्रस्तुति दिएका थिए।
प्रा. डा. सत्तारले आधुनिक डेन्टल इम्प्लान्ट प्रविधि, बोन ग्राफ्टिङ तथा ओरल रिह्याबिलिटेसनका अत्याधुनिक विधिबारे विस्तृत जानकारी गराए।
त्यस्तै डा. लामिछानेले जटिल ओरल सर्जरी, ट्रमा म्यानेजमेन्ट तथा मौखिक क्यान्सरको प्रारम्भिक निदानबारे महत्वपूर्ण ज्ञान साझा गरे। सहभागीहरूको भनाइअनुसार दुवै प्रस्तुति अत्यन्तै उपयोगी र प्रेरणादायी रहे।
नेपाल डेनटल एसोसिएसन पर्साका प्रवक्ता डा. आमिर आलमले कार्यक्रमले दन्त चिकित्सकहरूको सीप अभिवृद्धि र समुदायमा मौखिक स्वास्थ्य जागरूकता विस्तारमा महत्वपूर्ण भूमिका खेल्ने बताए।
कार्यक्रम अध्यक्ष डा. धनञ्जय कुमार मालीका अनुसार वीरगंज, पर्सा, बारा र रौतहटका विभिन्न क्षेत्रबाट एक सयभन्दा बढी दन्त चिकित्सकहरूको उत्साहजनक सहभागिता रहेको थियो।
सहभागी चिकित्सकहरूले यस्ता शैक्षिक सत्रले दैनिक क्लिनिकल अभ्यासमा नवीनतम प्रविधि अपनाउन सहयोग पुग्ने र बिरामीलाई गुणस्तरीय सेवा दिन प्रेरणा मिल्ने प्रतिक्रिया जनाए।
नेपाल डेनटल एसोसिएसन पर्सा शाखाले आगामी दिनमा पनि यस्ता सीडीई कार्यक्रम नियमित रूपमा सञ्चालन गर्ने घोषणा गरेको छ।
