वीरगंज । जिल्ला प्रहरी कार्यालय पर्साले श्रोत नखुलेको १५ लाख रुपैयाँ बराबरको हुण्डी रकमसहित एक जनालाई पक्राउ गरेको छ। विशेष सूचनाका आधारमा खटिएको प्रहरी चौकी धोरे र सशस्त्र प्रहरी बल नेपालको संयुक्त टोलीले पकाहाँ मैनपुर गाउँपालिका–१ धोरे चेकपोस्ट नजिकबाट उक्त रकम बरामद गरिएको जनाएको छ।
आइतबार दिउँसो करिब २:३० बजे चेकजाँचका क्रममा बिआर२२एएफ४१२६ नम्बरको मोटरसाइकलमा सवार पकाहाँ मैनपुर–१ का ३४ वर्षीय अवधेश पटेललाई रोकेर चेक गर्दा मोटरसाइकलको लेगगार्डमा राखिएको ‘पंकज मसाला’ लेखिएको झोलाभित्र कालो प्लास्टिकमा बेरिएको अवस्थामा नगद फेला परेको प्रहरीले जनाएको छ।
बरामद भएको नगदमा १ हजार दरका ७९० थान, ५०० दरका १,३२१ थान, १०० दरका ५६९ थान, ५० दरका ५० थान र २० दरका ५ थान गरी जम्मा १५ लाख रुपैयाँ रहेको छ। साथै प्रयोग भएको मोटरसाइकल समेत बरामद गरिएको प्रहरीको भनाइ छ।
मुलुकी अपराध संहिता, २०७४ को दफा १२५(क) बमोजिम हुण्डी कारोबारसम्बन्धी कसूरमा अवधेश पटेललाई नियन्त्रणमा लिएर थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
