सेढवा । पर्साको जगरनाथपुर गाँउपालिका–१ बिसुनपुर्वा नजिकबाट सशस्त्र प्रहरीले आइतबार बिहान १० किलो अवैध लागूऔषध गाँजा बरामद गरेको छ।
सशस्त्र प्रहरी बोर्डर आउट पोस्ट (BOP) पिडारिगुठीबाट नायब निरीक्षक दिलबहादुर गुरुङको नेतृत्वमा खटिएको गस्ती टोलीले सीमास्थित बगर क्षेत्रमा शंकास्पद गतिविधि देखेपछि चेकजाँच गर्ने क्रममा तस्करहरूले फालेर भागेको गाँजा फेला पारेको हो।
गस्ती टोलीलाई देखेपछि तस्करहरू भारतीयतर्फ फरार भएकाले कसैलाई पक्राउ गर्न नसकिएको सशस्त्र प्रहरीले जनाएको छ।
बरामद गरिएको १० किलो गाँजा आवश्यक कानुनी प्रक्रिया तथा अनुसन्धानका लागि इलाका प्रहरी कार्यालय पटेर्वा सुगौलीलाई बुझाइएको सशस्त्र प्रहरी बल नेपाल नं. १३ गण पर्साका सूचना अधिकारी प्रहरी नायब उपरिक्षक विश्वराज योन्जनले जानकारी दिए ।
