सर्लाही । कृषि ट्रान्सफर्मरभित्र जडान गरिने तामाका तार चोरी गर्दै आएका एक संगठित गिरोहलाई जिल्ला प्रहरी कार्यालय सर्लाहीले पक्राउ गरेको छ। मिति २०८२।०७।२८ र २९ गते विभिन्न प्राविधिक बिधि तथा सूचनाको प्रयोग गर्दै खटिएको प्रहरी टोलीले चोरीमा संलग्न नौ जनालाई नियन्त्रणमा लिएको हो।
प्रहरीले इलाम माईजोगामाई–४ का दुर्गा अधिकारी, सिन्धुपाल्चोक पाखर–१ का सोनम लामा, महोत्तरी बर्दिवास–३ का बुधे माझी, भारत बिहार चिरैया–६ का सुखाडी सहनी र उनका छोरा सरोज कुमार सहनी, भारत बिहार मोतिहारी हरदियाका मो. रयाजुल, वीरगंज महानगर–१६ का दिलिप कुमार ओझा, भारत बिहार समस्तीपुर मोहरी टोलका संजित पदार्थ, तथा जितपुर–सिमरा उ.म.न.पा.–६ स्थित गढीमाई मेटल प्रा.लि.का संचालक कृष्ण श्रीवास्तवलाई पक्राउ गरेको हो।
उनीहरूको साथबाट चोरीमा प्रयोग गरिएका दुई थान ई–रिक्सा, ५१ थान विभिन्न औजार, ११ थान मोबाइल फोन तथा १०३.८ केजी तामाका तार बरामद गरिएको प्रहरीले जनाएको छ।
पक्राउ परेकाहरूमाथि चोरीसम्बन्धी कसुरमा सर्लाही जिल्ला अदालतबाट ७ दिनको म्याद थप गरेर थप अनुसन्धान भइरहेको जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईले जानकारी दिएका छन्।
