वीरगंज । वीरगंज लायन्स क्लब बिरगंज परिवार, लायन्स क्लब बिरगंज सेन्ट्रल सिटी, लायन्स क्लब बिरगंज मेट्रो सिटी, लायन्स क्लब बिरगंज फ्रेन्डजोन, लायन्स क्लब बिरगंज कुटुम्ब तथा लायन्स क्लब बिरगंज एक्सिलेन्सको संयुक्त आयोजनामा इन्टर–कलेज वाद–विवाद प्रतियोगिता सुरु भएको छ। बिरगंजका १० वटा कलेजको सहभागितामा आयोजना गरिएको प्रतियोगितामा प्रत्येक कलेजबाट एक–एक जना उत्कृष्ट वक्तालाई फाइनल राउन्डका लागि छनोट गरिने आयोजकले जनाएको छ।
प्रतियोगिताको पहिलो छनोट चरण अन्तर्गत आज ग्लोबल बिजनेस कलेजमा “सामाजिक सञ्जाल – उपयुक्त कि जञ्जाल?” विषयमा वाद–विवाद प्रतियोगिता सम्पन्न भयो। महिला तथा पुरुष गरी ८ जना विद्यार्थीबीच प्रतिस्पर्धा हुँदा महिला समूहबाट अनुस्का बस्नेत र पुरुष समूहबाट बिनिता कुमारी विजेता बने। उनीहरू दुबैजना फाइनल राउन्डका लागि छनोट भएका छन्।
कार्यक्रमको अध्यक्षता लायन्स क्लब बिरगंज सेन्ट्रल सिटीकी अध्यक्ष लायन सुशिला साहले गर्नुभयो। कार्यक्रममा प्रमुख अतिथि डिस्ट्रिक्ट एक्जिक्युटिभ चिफ लायन वासु तिमल्सिना, विशिष्ट अतिथि डिस्ट्रिक्ट एक्जिक्युटिभ–को–चिफ लायन अशोक कुमार बेरिवाल, विशिष्ट अतिथि लायन सन्दीप गुप्ता कानु, लायन्स परिवारका अध्यक्ष लायन नरोत्तम पाण्डे, मेट्रो सिटीका अध्यक्ष लायन उमेश गुप्ता, कुटुम्बकी अध्यक्ष लायन रचना प्याकुरेल, फ्रेन्डजोनका अध्यक्ष लायन सर्वन साह, एक्सिलेन्सका जोन चेयरपर्सन लायन मनोज उपाध्याय, मेट्रो सिटीका कोषाध्यक्ष लायन अंकित चौरसिया, कलेज निर्देशक अशोक सर्राफ, हेड अफ नेपाली शिक्षक सन्दीप राज साहलगायतको उपस्थिति थियो। विद्यार्थीहरूको उत्साहजनक सहभागितासहित कार्यक्रम भव्य रूपमा सम्पन्न भएको आयोजकले जनाएको छ।
आगामी दिनमा प्रतियोगिताका अन्य चरणहरू क्रमशः विभिन्न कलेजमा सञ्चालन गर्दै अन्तिम फाइनल राउन्डमा १० कलेजका उत्कृष्ट वक्ताबीच प्रतिस्पर्धा गराइने आयोजकले जानकारी दिएको छ।
