वीरगञ्ज । नेकपा एमाले पर्सा जिल्ला कमिटीले गत भदौ २३ र २४ गते वीरगञ्जमा भएको जेनजी आन्दोलनका क्रममा तोडफोड, लुटपाट र आगजनी घटनामा संलग्न आफ्ना नेता–कार्यकर्तालाई पार्टीबाट निष्कासन गर्ने निर्णय गरेको छ। सोमबार वीरगञ्जमा सम्पन्न एमाले पर्सा जिल्ला कमिटीको पाँचौँ पूर्ण बैठकले उक्त निर्णय गरेको जिल्ला सचिव महेश दासले जानकारी दिए।
जिल्ला अध्यक्ष डा. विश्वम्भर कुमार शर्माको अध्यक्षतामा बसेको बैठकले आन्दोलनपछि विभिन्न माध्यमबाट राजीनामा दिएका तथा तोडफोड–आगजनीमा संलग्न रहेका व्यक्तिहरूको पार्टी सदस्यता खारेज गर्ने निर्णय गरेको छ। बैठकले सुन्दर प्रसाद कुर्मीलाई जिल्ला प्रचार विभाग प्रमुखमा समेत मनोनयन गरेको छ।
यस्तै, मङ्सिर १३ गते महाधिवेशन प्रतिनिधि सर्वसम्मत छनोट गर्ने तथा मङ्सिर २७ गते काठमाडौँमा हुने पार्टी महाधिवेशन उद्घाटन समारोहमा पर्साबाट व्यापक जनसहभागिता गराउने निर्णय पनि बैठकले गरेको छ।
बैठकलाई सम्बोधन गर्दै नेकपा एमालेका केन्द्रीय सचिव तथा पूर्व उपप्रधानमन्त्री रघुवीर महासेठले पार्टीभित्रका आपसी द्वन्द्व हटाएर एकताबद्ध रूपमा संगठन सुदृढ गर्नुपर्ने आवश्यकता औंल्याए। उनले पार्टी अध्यक्ष केपी शर्मा ओलीको नेतृत्वमा जनताको बहुदलीय जनवाद (जबज) सफलतापूर्वक कार्यान्वयन हुँदै आएको भन्दै आगामी निर्वाचनमा पनि एमाले ओलीकै नेतृत्वमा अघि बढ्ने दाबी गरे।
महासेठले भने, “राष्ट्रिय–अन्तर्राष्ट्रिय शक्तिहरू अध्यक्ष ओलीलाई कमजोर बनाउन प्रयासरत छन्, तर आगामी महाधिवेशनपछि पनि पार्टीको नेतृत्व उहाँमै रहनुपर्छ।”
बैठकमामा केन्द्रीय सदस्यद्वय प्रभु हजरा, निर्मला देवकोटा, केन्द्रीय सल्लाहकार जालिम मियाँ, मुन्नी श्रीवास्तव, ठाकुर प्रसाद न्यौपाने, प्रदेश कमिटी सचिवालय सदस्य जयप्रकाश थारु, प्रदेश सभा सदस्य विना शर्मा, पोखरिया नगरपालिकाका मेयर प्रधुम्न चौहान, सखुवा प्रसौनी गाउँपालिका अध्यक्ष यशवन्त यादव, छिपहरमाई गाउँपालिका अध्यक्ष मनोज कुमार गुप्ता लगायतको सहभागिता रहेको थियो।
