वीरगञ्ज । पर्साको ठोरी गाउँपालिकामा गृहमन्त्री सुधन गुरुङ को उपस्थितिमा दुई होटलमा छापा मारिएको घटनाले राजनीतिक तथा सुरक्षा वृत्तमा चर्चा र विवाद दुवै सिर्जना गरेको छ । छापामार कारबाहीमा सात युवती र दुई होटल सञ्चालकसहित नौ जनालाई नियन्त्रणमा लिइएको भए पनि पक्राउको कानुनी आधारबारे प्रश्न उठ्न थालेको छ ।
स्रोतका अनुसार, मिटरब्याज पीडितसँग बाराको सिमरामा लगातार छलफल गरेपछि चितवनतर्फ जाने क्रममा गृहमन्त्री गुरुङ पर्साको ठोरी बजार पुगेका थिए । स्थानीयबाट ठोरी बजारका केही होटलमा अनैतिक गतिविधि हुने गरेको सूचना पाएपछि उनले सुरक्षाकर्मीसहित ठोरी गाउँपालिका–२ स्थित ‘ठोरी दोहोरी साँझ’ र ‘रिसोर्ट ठोरी क्याम्प फायर होटल’ मा शुक्रबार साँझ छापा मार्न निर्देशन दिएका थिए ।
छापाका क्रममा होटल सञ्चालक, कर्मचारी र पाहुनासहित नौ जनालाई नियन्त्रणमा लिएर इलाका प्रहरी कार्यालय ठोरी लगिएको बताइएको छ । पक्राउ परेकामध्ये सात जना युवती रहेका छन् ।
उक्त कारबाहीमा सशस्त्र प्रहरी बल नं. १३ गण, बोर्डर आउट पोस्ट (बीओपी) ठोरी तथा नेपाल प्रहरीको टोली सहभागी रहेको जनाइएको छ । उच्च स्रोतले गृहमन्त्रीकै उपस्थितिमा छापा मारिएको पुष्टि गरेको छ ।
सामाजिक सञ्जालमा सार्वजनिक भएको एक भिडियोमा स्थानीय महिलाले ती होटलमा अनैतिक गतिविधि हुने गरेको गुनासो गरेपछि गृहमन्त्रीले तत्कालै कारबाही अघि बढाएको देखिन्छ ।
तर, छापा मार्ने क्रममा जिल्ला प्रहरी प्रमुख (एसपी) सुदिप राज पाठक र प्रमुख जिल्ला अधिकारी (सीडीओ) भाेला दाहाललाई पूर्वजानकारी नदिइएको र छापा सम्पन्न भएपछि मात्रै घटनास्थलमा बोलाइएको स्रोतको दाबी छ ।
यस घटनापछि गृहमन्त्रीको कार्यशैलीमाथि सुरक्षा मामिलाका जानकारहरूले प्रश्न उठाएका छन् । नेपाल प्रहरीका पूर्वडीआईजी हेमन्त मल्लले विभागीय मन्त्री आफैं फिल्डमा गएर छापा मार्नु उपयुक्त नभएको टिप्पणी गरेका छन् । उनका अनुसार प्रहरी परिचालन र अपरेशन सञ्चालन गर्ने जिम्मेवारी प्रहरी संगठनकै हो, मन्त्रीको होइन ।
सुरक्षा क्षेत्रका अन्य पूर्वअधिकारीहरूले पनि मन्त्रीले नीतिगत तथा प्रशासनिक नेतृत्वमा केन्द्रित हुनुपर्नेमा प्रत्यक्ष प्रहरी अपरेशनमा संलग्न हुँदा सुरक्षा निकायको मनोबलमा असर पर्न सक्ने बताएका छन् ।
यस्तै, पक्राउ परेका व्यक्तिहरूलाई कुनै आपराधिक वा अनैतिक गतिविधिमा रंगेहात पक्राउ नगरिएको दाबी गर्दै उनीहरूमाथिको नियन्त्रणको कानुनी आधारबारे समेत प्रश्न उठाइएको छ ।
दुई होटलमा छापा मारिसकेपछि गृहमन्त्री गुरुङ राति चितवनतर्फ प्रस्थान गरेका थिए । त्यसक्रममा उनले सीमावर्ती क्षेत्रमा लागुऔषध ओसारपसार र तस्करी नियन्त्रणका लागि सीमा क्षेत्रको अनुगमन गर्दै सीसीटीभी जडानको योजना रहेको जानकारी सामाजिक सञ्जालमार्फत पनि दिएका छन् ।
