वीरगंज । वीरगन्ज महानगरपालिका–२० अपौनीमा सार्वजनिक जग्गा अतिक्रमण गरी निर्माण गरिएका घर तथा टहरा हटाइएको छ।
वीरगन्ज महानगरपालिकाका मेयर राजेशमान सिंहको निर्देशनमा मंगलबार भौतिक अतिक्रमण नियन्त्रण समितिका संयोजक एवं वडा नं। ५ का अध्यक्ष प्रदीपकुमार चौरसियाको नेतृत्वमा नेपाल प्रहरी र नगर प्रहरीको संयुक्त टोलीले अतिक्रमण हटाएको हो।
महानगरपालिकाका अनुसार स्थानीय हृदयनारायण सिंह, लक्ष्मण पण्डित, रमेश सिंह, कृपानारायण सिंह, नन्दकिशोर पुरीलगायत दर्जनौँ व्यक्तिले सार्वजनिक जग्गा अतिक्रमण गरी बनाएका संरचना हटाइएको हो। टोलीले अतिक्रमित क्षेत्र खाली गराई सार्वजनिक जग्गा संरक्षणका लागि पहल गरेको जनाएको छ।
अतिक्रमणका कारण विगत करिब ६ वर्षदेखि रोकिएको झण्डै ८४ करोड रुपैयाँ लागतको विकास योजना अब अघि बढ्ने भएको महानगरपालिकाले जनाएको छ। उक्त योजनाको ठेक्का ‘स्वच्छन्द निर्माण सेवा’ले पाएको भए पनि निर्माणस्थलमा सार्वजनिक जग्गा अतिक्रमण भएका कारण काम सुरु हुन सकेको थिएन।
अतिक्रमित संरचना हटाइएपछि निर्माणका लागि आवश्यक जग्गा खाली भएको र अब रोकिएको विकास योजना कार्यान्वयनको बाटो खुलेको महानगरपालिकाको भनाइ छ।
लामो समयदेखि रोकिएको विकास योजना अघि बढ्ने भएपछि स्थानीयवासीले सार्वजनिक जग्गा अतिक्रमण हटाउने महानगरपालिकाको कदमको स्वागत गरेका छन्। उनीहरूले विकास निर्माणका कामलाई तीव्रता दिन र सार्वजनिक सम्पत्तिको संरक्षणलाई निरन्तरता दिन महानगरपालिकासँग आग्रह गरेका छन्।
