वीरगंज । समावेशी शिक्षाको महत्व र आवश्यकताबारे विद्यार्थी तथा समुदायमा जनचेतना अभिवृद्धि गर्ने उद्देश्यले पर्साको निचुटामा वक्तृत्वकला प्रतियोगिता सम्पन्न भएको छ।
श्री नेपाल राष्ट्रिय माध्यमिक विद्यालय, निचुटा र वडा नं. ५ को दलित समुदायको सहभागितामा ‘समावेशी शिक्षाको महत्व तथा आवश्यकता’ विषयमा वक्तृत्वकला प्रतियोगिता आयोजना गरिएको हो।
युरोपियन युनियनको आर्थिक सहयोग तथा पिपुल इन निड, अकाउन्टेबिलिटी ल्याब नेपाल, नेशनल क्याम्पेन फर एजुकेसन नेपाल (एनसीई नेपाल) र नेपाल अपाङ्ग महिला संघको सहकार्य तथा दिव्य विकास स्रोत केन्द्र, पर्साको साझेदारीमा सञ्चालित पहुँच परियोजना (ACCESS Project) अन्तर्गत ‘फ्युचर स्कुल एन्ड कम्युनिटी इन्गेजमेन्ट’ अभियानमार्फत कार्यक्रम गरिएको थियो।
दिव्य विकास स्रोत केन्द्र, पर्साका कार्यकारी निर्देशक रामाकान्त प्रसाद कुर्मीको अध्यक्षतामा भएको कार्यक्रममा श्री नेपाल राष्ट्रिय माध्यमिक विद्यालय, निचुटाका व्यवस्थापन समिति अध्यक्ष शुभ प्रसाद यादव प्रमुख अतिथि रहनुभएको थियो। कार्यक्रममा विद्यालयका प्रधानाध्यापक मधुकान्त प्रसाद चौधरी, वडा नं। ५ का समाजसेवी भुलाई प्रसाद साह तथा अकाउन्टेबिलिटी ल्याब नेपालका प्रतिनिधि अकलेश साहको उपस्थिति थियो।
कक्षा ९ का ७ जना विद्यार्थी सहभागी वक्तृत्वकला प्रतियोगितामा मम्मद जिकरु लाह प्रथम, अमर फारुक द्वितीय र फिज नेसा तृतीय भएका थिए। विजयी विद्यार्थीलाई पुरस्कार तथा सम्मान प्रदान गरिएको थियो।
कार्यक्रममा जात, लिंग, अपाङ्गता, आर्थिक अवस्था वा अन्य कुनै आधारमा विभेद नगरी सबै बालबालिकालाई समान रूपमा शिक्षाको अवसर उपलब्ध गराउनुपर्नेमा जोड दिइएको थियो। वक्ताहरूले समावेशी शिक्षाको प्रभावकारी कार्यान्वयनका लागि विद्यालय, परिवार, समुदाय तथा सम्बन्धित सरोकारवालाबीच सहकार्य आवश्यक रहेको बताए।
कार्यक्रमले विद्यालय तथा समुदायमा समावेशी शिक्षाको महत्व र आवश्यकताबारे सकारात्मक सन्देश प्रवाह गर्दै विद्यार्थी तथा अभिभावकमा चेतना अभिवृद्धि गर्न सहयोग पुगेको आयोजकले जनाएको छ।
कार्यक्रममा समुदायबाट १३० जना र विद्यालयबाट ११५ जना गरी कुल २४५ जनाको सहभागिता रहेको थियो। कार्यक्रमको सहजीकरण दिव्य विकास स्रोत केन्द्रका सामाजिक परिचालक विश्वनाथ हजराले गर्नुभएको थियो भने व्यवस्थापन पहुँच परियोजनाका जिम्मेवार व्यक्ति अमित कुमार राउतले गर्नुभएको थियो।
