वीरगंज । प्रस्तावित वीरगन्ज विश्वविद्यालय स्थापनाका लागि करिब दुई दशकअघि संकलन गरिएको रकम बैंक खाताबाट निकालिएको विषयमा नेपाल प्रहरीको केन्द्रीय अनुसन्धान ब्युरो (सीआईबी)ले अनुसन्धान अघि बढाएको छ।
विश्वविद्यालय स्थापनाका लागि हरिखेतान बहुमुखी क्याम्पसका शिक्षक तथा कर्मचारीले एक दिनको तलब योगदान गरेका थिए। त्यस्तै तत्कालीन गाविस, संविधानसभा सदस्य, उद्योगी–व्यवसायी तथा विभिन्न संघसंस्थाबाट समेत रकम संकलन गरिएको थियो। अभियानबाट २ करोड रुपैयाँभन्दा बढी रकम जम्मा भएको बताइएको छ।
संकलित रकम वीरगन्जस्थित कुमारी बैंकको खातामा राखिएको थियो। उक्त खाताबाट तत्कालीन हरिखेतान क्याम्पस प्रमुख भगवानप्रसाद यादवले चेकमार्फत रकम निकालेको विषयमा प्रहरीले अनुसन्धान गरिरहेको जनाएको छ।
रकम निकाल्दा खातासम्बन्धी प्रक्रिया तथा कागजातमा अनियमितता भएको र व्यक्तिगत रूपमा रकम प्रयोग गरिएको हुन सक्ने विषयमा अनुसन्धान केन्द्रित रहेको प्रहरी स्रोतले जनाएको छ।
सीआईबीले अनुसन्धानसम्बन्धी फाइल जिल्ला प्रहरी कार्यालय पर्सामा पठाएपछि बैंकसँग आवश्यक विवरण मागेर छानबिन अघि बढाइएको पर्साका प्रहरी उपरीक्षक पवन भट्टराईले बताए।
यसअघि जिल्ला प्रशासन कार्यालय पर्साले पनि कुमारी बैंकसँग विश्वविद्यालयको खातासम्बन्धी विवरण मागेको थियो। बैंकबाट प्राप्त विवरणमा विश्वविद्यालयको नाममा रहेको खाताबाट भगवानप्रसाद यादवले चेकमार्फत रकम निकालेको देखिएको जनाइएको छ।
विश्वविद्यालय स्थापनाका लागि योगदान गरेका शिक्षक तथा कर्मचारीले लामो समयसम्म रकम उपयोग नभएको अवस्थामा निकासीको विषयमा अनुसन्धान सुरु भएपछि चासो व्यक्त गरेका छन्। जग्गा व्यवस्थापनलगायतका विषय टुंगोमा पुग्न नसक्दा प्रस्तावित विश्वविद्यालय स्थापनाको प्रक्रिया लामो समयदेखि अघि बढ्न सकेको छैन।
