वीरगंज । पछिल्लो केही दिनदेखि बढ्दै गएको शितलहरलाई मध्यनजर गर्दै पर्साका दुई स्थानीय तहले थप विद्यालय बन्द गर्ने निर्णय गरेका छन्। वीरगंज महानगरपालिका र पोखरीया नगरपालिकाले सामुदायिक तथा संस्थागत विद्यालय, मन्टेश्वरी र कोचिङ्ग सेन्टरहरूलाई थप ३ दिनका लागि जाडो बिदा दिएका हुन्।
वीरगंज महानगरपालिकाको नगर कार्यपालिकाको कार्यालयद्वारा जारी सूचनाअनुसार महानगरपालिका अन्तर्गतका सबै सामुदायिक तथा संस्थागत विद्यालय, मन्टेश्वरी र कोचिङ्ग सेन्टरहरू २०८२ पौष १६ गतेदेखि १८ गतेसम्म जाडो बिदा रहनेछन्। उक्त बिदा वर्षे बिदाबाट कट्टा हुने जनाइएको छ । महानगरपालिकाले २०८२ साल पौष २० गतेदेखि साबिककै समयअनुसार शैक्षिक संस्था सञ्चालन हुने वीरगंज महानगरपालिकाका शिक्षा महाशाखा प्रमुख आनन्द लामिछानेले जानकारी दिए ।
यस्तै, पोखरीया नगरपालिकाले पनि बढ्दो शितलहरको असरलाई ध्यानमा राख्दै नगरभित्रका सम्पूर्ण सामुदायिक तथा संस्थागत विद्यालयहरू २०८२ पौष १६ गतेदेखि १८ गतेसम्म बन्द रहने निर्णय गरेको छ। यो बिदा पनि वर्षे बिदाबाट कट्टा हुने पोखरीया नगरपालिकाले जनाएको छ।
उक्त सूचना पोखरीया नगरपालिकाका प्रमुख प्रशासकीय अधिकृत राम विनय कुमार सिंहद्वारा जारी गरिएको हो ।
शितलहरका कारण विद्यार्थीहरूको स्वास्थ्यमा प्रतिकूल असर पर्न सक्ने सम्भावनालाई ध्यानमा राख्दै स्थानीय तहहरूले सावधानीस्वरूप बिदा दिने निर्णय गरेको जनाइएको छ ।
