वीरगंज । अगामी फागुन २१ गते हुन गइरहेको निर्वाचनलाई लक्षित गर्दै जनमत पार्टी पर्साले पर्सा निर्वाचन क्षेत्र नम्बर १ मा चुनावी गतिविधि तीव्र बनाएको छ। पार्टीले मतदाता भेटघाट, संगठन विस्तार तथा बुथस्तरीय कमिटी गठनलाई प्राथमिकतामा राख्दै अभियान अघि बढाएको हो।
पर्सा क्षेत्र नम्बर १ बाट जनमत पार्टीका तर्फबाट सिफारिस भएका उम्मेदवार ओमप्रकाश सर्राफले पछिल्लो एक हप्ताभित्र वीरगंज महानगरपालिकाका वडा नम्बर २, १४, १५, १६, १८, २१, २३, ३१ र ३२ मा वृहत भेटघाट कार्यक्रम सञ्चालन गरेका छन्। भेटघाटका क्रममा उनले पार्टी कार्यकर्ता, स्थानीय अगुवा तथा सर्वसाधारणसँग प्रत्यक्ष संवाद गर्दै संगठन विस्तारमा जोड दिएका छन्।
सर्राफका अनुसार ती वडाका बुथस्तरमा युवा, महिला तथा मूल कमिटी गठन तथा पुनर्गठन गरिएको छ। संगठनलाई थप मजबुत बनाउने उद्देश्यले स्थानीय तहमै जिम्मेवारी बाँडफाँड गर्दै जनमत पार्टीको आधार विस्तारमा जोड दिइएको उनले बताए।
भेटघाटका क्रममा स्थानीय बासिन्दाले उठाएका दैनिक जीवनसँग सम्बन्धित समस्या, विकासका अवरोध तथा प्रशासनिक झन्झटहरू समाधानका लागि आफू प्रतिबद्ध रहेको सर्राफले स्पष्ट पारे। शिक्षा, स्वास्थ्य, रोजगारी, खानेपानी तथा आधारभूत पूर्वाधार आफ्नो मुख्य एजेन्डा रहेको उनले बताए।
क्षेत्र नम्बर १ का पर्यवेक्षक डा. मनोज कुमारका अनुसार भेटघाटका क्रममा उठाइएका समस्या तत्काल सम्बन्धित निकायसम्म पुर्याई समाधानका लागि पहलसमेत गरिएको छ। सर्राफले जनमत पार्टीका केन्द्रीय अध्यक्ष डा. सिके राउतको भिजन र नेतृत्वले मात्र मधेश, प्रदेश तथा देशको समग्र विकास सम्भव हुने दाबी गर्दै कार्यकर्तालाई एकताबद्ध भएर लाग्न आग्रह गरेका थिए।
जनमत पार्टी पर्साले आगामी दिनमा पनि घरदैलो अभियान, बुथस्तरीय बैठक तथा जनसंवाद कार्यक्रमलाई निरन्तरता दिने जनाएको छ। फागुन २१ को निर्वाचन नजिकिँदै जाँदा पर्सा क्षेत्र नम्बर १ मा राजनीतिक चहलपहल बढ्दै गएको छ भने जनमत पार्टीले संगठनात्मक सक्रियतामार्फत आफ्नो उपस्थिति थप बलियो बनाउँदै लगेको देखिन्छ।
भेटघाट टोलीमा बिध्यालाल प्रसाद, सिए देवराज, निराजन कुशवाहा, नागेन्द्र गुप्ता, सहनवाज राकी लगायतको सक्रिय भूमिका रहेको थियो।
