वीरगंज । मधेस प्रदेशमा मुख्यमन्त्री कृष्णप्रसाद यादवको नेतृत्वमा गठन भएको प्रदेश सरकारले करिब एक महिनापछि मन्त्रिपरिषद्लाई पूर्णता दिएको छ। मुख्यमन्त्रीको नेतृत्वमा गठित सरकारले बुधबार थप ६ जना मन्त्री नियुक्त गरेसँगै मन्त्रिपरिषद् पूर्ण बनेको हो।
जनकपुरधामस्थित मधेस भवनमा आयोजित समारोहमा नवनियुक्त मन्त्रीहरूले प्रदेश प्रमुख डा. सुरेन्द्रलाभ कर्णसमक्ष पद तथा गोपनीयताको शपथ ग्रहण गरेका छन्। मन्त्रिपरिषद् विस्तारसँगै पर्सा जिल्लाको प्रतिनिधित्व सशक्त रूपमा स्थापित भएको छ।
नवनियुक्त मन्त्रीहरूमध्ये शङ्करप्रसाद चौधरी पर्सा जिल्लाबाट वन तथा वातावरण मन्त्रीमा नियुक्त भएका छन् भने श्यामप्रसाद पटेल पर्साबाटै भूमि व्यवस्था, कृषि तथा सहकारी मन्त्रीको जिम्मेवारी पाएका छन्। पर्साका दुई जना नेताले महत्वपूर्ण मन्त्रालय सम्हालेपछि जिल्लाको विकास, वातावरण संरक्षण, कृषि र भूमि व्यवस्थापनमा सकारात्मक प्रभाव पर्ने अपेक्षा गरिएको छ।
यसैगरी मनिषकुमार सुमनलाई श्रम तथा यातायात मन्त्रालय, राजकुमार गुप्तालाई भौतिक पूर्वाधार विकास मन्त्रालय, वसन्तकुमार कुशवाहालाई खेलकुद तथा समाज कल्याण मन्त्रालय तथा फकिरा महतोलाई गृह, सञ्चार तथा कानुन मन्त्रालयको जिम्मेवारी प्रदान गरिएको छ।
नयाँ मन्त्रीहरूको नियुक्तिसँगै मधेस प्रदेश सरकारको प्रशासनिक गतिविधि थप सक्रिय हुने विश्वास व्यक्त गरिएको छ। विशेषतः पर्सा जिल्लाबाट प्रतिनिधित्व गर्ने मन्त्रीहरूले जिल्लाको समग्र विकासलाई प्राथमिकतामा राखेर काम गर्ने अपेक्षा गरिएको छ।
